Kisah Boko Rasul 25 - Porjanjian Boharu Torjomahan Baso Dilakng Soari-ari

Paulus di hadapan gubernur Festus huatan boko pomimpitn banso Yahudi

¹ Jadi, Festus monjadi gubernur di propinsi Yudea nantai. Io datakng di Kaisarea, ibu kotanyo. Lopas tigo ari, io botula' ko Yerusalem.

² Di su'utn, boko imam kopala' huatan boko pomimpitn urakng Yahudi inyo bukai datakng ko io. Sia' monyampaian ko gubernur Festus boko tuduhan sia' tohadap Paulus.

³ Sia' minto potulukan doi' gubernur Festus nantai. Sia' sangant muhun oca' Paulus dibaba' ko Yerusalem. Apo sia' ado hajat pakai' mombunuh Paulus di dalapm pojalatan.

⁴ Gubernur Festus monimbas, “Paulus ija' ditahatn di Kaisarea. Dalapm boboropo ari aku paca'an ko su'utn.

⁵ Jadi, soboi'nyo boko pomimpitn kaitn botula' samoan aku. Aman Paulus memang bulah kosalahan, tuduhan kaitn ulih disampaian di su'utn.”

⁶ Festus bodiapm di Yerusalem kurakng lobih dolapatn sampai sopuluh ari. Ongko, io bobali' ko Kaisarea bosamo boko pomimpitn urakng Yahudi nantai. Soari lopas io datakng di Kaisarea, Festus moadoan sidakng pongadilan. Jadi, io monyiuh oca' Paulus dibaba' doi' ponjara.

⁷ Lopas jadi Paulus dibaba' mansu' ko ruakan nantai, somuo urakng Yahudi inyo datakng doi' Yerusalem bodiritn mongoliliki io. Sia' moajuan banya' tuduhan inyo borat tohadap io. Apo sia' kinyo ulih mombutiannyo.

⁸ Lopas nian, Paulus mombela diri. Katonyo, “Aku co kalo molanggar boko poraturan urakng Yahudi inyo ditulis Musa dalapm Hukupm Torat. Aku co molanggar poraturan mongona'i Rumah Allah. Aku pan co molawatn Kaisar negara Roma.”

⁹ Apo Festus honda' monyonangan boko urakng Yahudi. Jadi, io botakutn ko Paulus, “Apobai kolai honda' botula' ko Yerusalem? Aku ulih moadili kolai di su'utn, ongko bulah koputusan dalapm pokaro ni'in.”

¹⁰ Apo Paulus monimbas, “Ni'inan aku ado di si'itn. Ni'in ia'an tompat pongadilan resmi di pomorintahan Romawi. Jadi, aku gola' diadili di si'itn ja'am kinyo di Yerusalem. Aku kinyo bosalah tohadap urakng Yahudi. Kolai siku' udah mongotohu'i nantai.

¹¹ Aman aku bondar-bondar udah molabuhan kojahatan ulihmo aku dihukupm mati, aku monorima' hukupan nantai. Apo aman tuduhan sia' tohadap aku kinyo bondar, co nyiant urakng inyo ulih monyorahan aku ko sia'. Socaro resmi ni'inan aku minto oca' pokaroku ditorusan ko Kaisar negara Roma.”

¹² Jadi, gubernur Festus bohoupm agatn boko ponosihatnyo. Ongko io bopandir, “Boi'am! Kolai udah minto oca' pokaro kolai ditorusan ko Kaisar negara Roma. Jadi, kolai paca'an diadili ulih io di su'utn.”

Paulus di hadapan rajo Agripa Gubernur Festus minto nosihat doi' Rajo Agripa (25:13-22)

¹³ Boboropo ari lopas nian, rajo urakng Yahudi inyo bodamo Agripa huatan adikng botina'nyo inyo bodamo Bernike datakng di Kaisarea. Sia' datakng pakai' moonji'i ucapan solamant ko Festus obai hoyu' monjadi gubernur.

¹⁴ Sia' monotap di su'utn boboropo ari. Ongko, watu nantai, Festus monjolasan mongona'i pokaro Paulus oca' bodapat nosihat doi' rajo Agripa. Katonyo, “Ado siku' urakng tahatan di si'itn. Damonyo Paulus. Timpu Feliks tongga' jadi gubernur, io kinyo monyolosaian pokaro Paulus nantai.

¹⁵ Pas aku ado di Yerusalem, boko imam kopala' huatan boko pomimpitn urakng Yahudi inyo bukai datakng ko aku. Sia' monyampaian boko tuduhan sia' tohadap Paulus. Sia' minto oca' io ulih dihukupm.

¹⁶ Apo aku monimbas obai hukupm pomorintah Romawi kinyo moijitan nantai. Siku' urakng inyo dituduh, kinyo ulih lansukng disorahan ko boko urakng inyo monuduh io. Io gola' diporiso doholu. Di santai io mohadap boko urakng inyo monuduh io. Io gola' dionji'i kosompatan pakai' mombela diri tohadap tuduhan nantai.

¹⁷ Jadi, sia' datakng ko si'itn samoan aku. Soari lopas aku datakng di Kaisarea, aku moadoan pokaro bosar. Jadi, aku monyiuh oca' Paulus dibaba' doi' ponjara.

¹⁸ Lopas nian, somuo urakng inyo monuduh io bodiritn mongoliliki io. Aku monyangko tuduhan sia' paca'an ado hubukan agatn porbuatan inyo jahat bondar. Apo tuduhan sia' kinyo samo sama'an nantai.

¹⁹ Mosalahnyo bayo mongona'i ajaran agama sia' mo. Ado jam mosalah agatn siku' urakng inyo bodamo Yesus. Io udah mati. Apo Paulus bopandir agatn togas obai Yesus hidup.

²⁰ Aku bingung ubo apo aku gola' monyolidiki mosalah ni'in. Obai nantai, aku monakutan io aman io honda' botula' ko Yerusalem. Aku ulih moadili io di su'utn, ongko bulah koputusan dalapm pokaro nantai.

²¹ Apo Paulus minto ditahatn sampai Kaisar negara Roma ulih moadili pokaronyo. Jadi, aku monyiuh oca' io totap ditahatn sampai aku ulih mombaba' io ko rajo kito di su'utn.”

²² Lopas nian, rajo Agripa bopandir ko gubernur Festus, “Aku siku' honda' mondinga' doi' urakng nantai.” Timbas Festus, “Aman ubo nian, hobu' duatn ulih mondinga' doi' io.”

Paulus dibaba' ko hadapan Rajo Agripa (25:23-27)

²³ Jadi, kohobu'annyo, rajo Agripa bosamo Bernike datakng. Sia' dihalu agatn upacara ponghormatan inyo kotakan ramai. Sia' mansu' ko dalapm ruakan tompat pokaro bososamo agatn boko komandatn pasukan huatan boko urakng pontikng inyo bukai doi' kota nantai. Ongko Festus monyiuh oca' Paulus dibaba' mansu'.

²⁴ Lopas nian Festus bopandir, “Rajo Agripa huatan somuo inyo hadir di si'itn. Kaitn tiat urakng ni'in. Io dituduh ulih somuo urakng Yahudi, boi' inyo ado di Yerusalem honda' pan inyo ado di si'itn. Sia' udah datakng ko aku kapikng mondongkakng-mondorah obai io kinyo ulih hidup lobih manah.

²⁵ Apo aku udah boriso'i io. Aku co monomuan sobuti' kosalahan pan sampai io gola' dihukupm mati. Io siku' mominto oca' pokaronyo ditorusan ko Kaisar negara Roma. Jadi, aku momutusan pakai' mongiripm io ko rajo kito di su'utn.

^26-27 Aku gola' monulis surat mongona'i io ni'in ko rajo kito. Apo co nyiant alasan inyo mansu' akal pakai' aku tulis dalapm surat nantai. Monurut pondapat aku, kinyo boi' aman mombaba' siku' urakng tahatan ko rajo kito aman co monjolasan boko tuduhan tohadap io. Obai nantai, aku mohadapan io ko kaitn, toutamo ko duatn, Rajo Agripa. Aku boharap lopas io diporiso, aku ado alasan inyo jolas pakai' ku tulisan dalapm surat ko Kaisar kito di Roma.”