Kisah Boko Rasul 23 - Porjanjian Boharu Torjomahan Baso Dilakng Soari-ari

¹ Paulus moncorona'i lansukng ko boko pomimpitn Yahudi nantai. Katonyo, “Boko somadikan, sampai ari ni'in aku totap hidup agatn hati nurani inyo borosih di hadapan Allah.”

² Ananias, Imam Kopala' inyo palikng bokuaso, ado di santai. Watu io mondinga' pomandiran Paulus nantai, io monyiuh oca' siku' urakng inyo bodiritn di sopia' Paulus monompilikng tutu'-mulutnyo.

³ Jadi, Paulus bopandir ko Ananias nantai, “Kolai ni'in urakng inyo pompadah boi' mo samo sama'an dindikng jaha'i inyo dicat poputih! Nono, Allah paca'an monompilikng kolai jam! Kolai dudu' di santai momakai boko porintah huatan poraturan inyo ditulis Musa pakai' moadili aku. Apo kolai monyiuh oca' aku ditompilikng biar pan aku co bulah kosalahan. Jadi, kolai mo inyo molanggar boko poraturan nantai!”

⁴ Sia' inyo bodiritn di dampikng Paulus bopandir, “Jangan mohayam Imam Agukng. Io nantai hulutn Allah!”

⁵ Timbas Paulus, “Boko somadikan, aku co tohu io nantai Imam Agukng. Memang ado porintah di dalapm Buku Suci: Jangan kolai mohayam pomimpitn banso kolai.”

^6-8 Paulus udah mongotohu'i di antaro boko pomimpitn inyo hadir, ado inyo doi' kolompok Saduki huatan ado jam inyo doi' kolompok Farisi. Io udah mongotohu'i urakng Saduki kinyo pocayo aman urakng mati paca'an hidup agi'. Sia' jam kinyo pocayo ado boko molekat damo boko roh. Apo urakng Farisi pocayo somuo hal nantai. Obai nantaiam, io mondorah, “Boko somadikan, aku ni'in urakng Farisi. Bopaiku pan urakng Farisi. Aku pocayo obai urakng mati paca'an hidup agi'. Nanam alasan aku diadili ari ni'in!” Pomandiran Paulus bunyi nantai pakai' bulah boko urakng Farisi huatan boko urakng Saduki di santai botikakng. Potomuan sia' nantai monjadi tobagi-bagi.

⁹ Sia' monjadi kotakan camuh. Ongko, boboropo guru agama doi' kolompok Farisi bodiritn. Sia' molawatn boko urakng Saduki agatn koras. Sia' bopandir, “Monurut koi, urakng ni'in samo sokali kinyo bosalah! Mungkitn ado molekat damo roh inyo bopandir ko io.”

¹⁰ Ongko, posolisihan monjadi mongkitn monjadi. Komandatn pasukan gola' aman Paulus paca'an dibunuh sia'. Jadi io monyiuh boko projuritnyo oca' turutn doi' markas ongko monyolamant'an Paulus doi' tongah-tongah sia'. Sia' mombaba' io ko dalapm markas agi'.

¹¹ Pas malapm nantai Tuhatn Yesus bodiritn di sopia' Paulus ongko bopandir ko io, “Jangan gola'. Kolai udah borani momboritoan mongona'i Aku di Yerusalem. Nononyo kolai gola' borani jam momboritoan mongona'i Aku di Roma.”

Boko urakng Yahudi bohajat pakai' mombunuh Paulus

^12-13 Kohobu'annyo, ado lobih doi' ompat puluh urakng Yahudi inyo bulah hajat pakai' mombunuh Paulus. Sia' bulah hajat nantai socaro rahasia. Sia' somuo bosumpah ko Allah obai sia' co paca'an makatn damo minum sobolupm sia' bohasil mombunuh Paulus.

¹⁴ Jadi, sia' botula' ko boko imam kopala' huatan boko pomimpitn Yahudi inyo bukai. Sia' momadahan hajat sia' nantai. Kato sia', “Koi udah bosumpah ko Allah obai koi co paca'an makatn damo minum sobolupm koi bohasil mombunuh Paulus.

¹⁵ Ni'inan koi muhun oca' boko pombopaian mongopal ko somuo Kolompok pomimpitn inyo kotakan bokuaso doi' banso kito urakng Yahudi. Samoan agatn sia', mintocam ko komandatn pasukan Romawi oca' Paulus dibaba' doi' markas pakai' mohadap kaitn. Kaitn pompadah honda' boriso'i pokaronyo lobih toliti. Apo watu io dalapm pojalatan, koi udah siap pakai' mombunuh io.”

¹⁶ Apo ana' somadikan Paulus mondinga' mongona'i hajat nantai. (Io nantai ana' lolaki doi' somadikan botina' Paulus). Lopas jadi mondinga' mongona'i hajat nantai, io botula' ko markas ongko momadahannyo ko Paulus.

¹⁷ Jadi, Paulus moningkau salah siku' powira. Katonyo, “Tulukng baba' bobia' muda' ni'in ko komandatn pasukan. Ado inyo honda' io padahan ko komandatn.”

¹⁸ Ongko powira nantai mombaba' ana' somadikan Paulus ko komandatn pasukan. Katonyo, “Urakng tahatan nantai, Paulus, moningkau aku. Io minto oca' bobia' muda' ni'in dionju'an ko kolai. Ado sosuatu inyo honda' io padahan ko kolai.”

¹⁹ Komandatn pasukan nantai moncanggapm longan bobia' muda' nantai ongko mombaba' io aga' jojouh ko sopia'. Io botakutn, “La'apo inyo honda' kolai padahan ko aku?”

²⁰ Komana'an Paulus nantai bopandir, “Boko urakng Yahudi udah bulah hajat. Sia' paca'an mominto ko duatn oca' hobu' Paulus dibaba' doi' markas ni'in. Sia' jam paca'an bopandir ko duatn obai sia' honda' Paulus mohadap kolompok pomimpitn urakng Yahudi inyo palikng bokuaso. Sia' jam paca'an bopandir obai sia' honda' mondapat'an kotorakan inyo lobih jolas doi' Paulus. Apo sia' bayo pompadah mo.

²¹ Jadi, padohan Duatn mondinga'an sia', obai ado lobih doi' ompat puluh urakng udah siap monyorakng io dalapm pojalatan. Sia' udah bosumpah obai sia' co paca'an makatn damo minum sobolupm sia' bohasil mombunuh Paulus. Ni'in sia' udah siap agatn hajat sia' nantai. Sia' bayo ija' monanti Duatn bulah koputusan oca' Paulus dibaba' doi' si'itn.”

²² Mondinga' nantai, komandatn pasukan moonji'i porintah ko bobia' muda' nantai, “Jangan pandiran ko sopo pan aman kolai udah momadahan hal ni'in ko aku.” Ongko, io monyiuh bobia' muda' nantai pulakng.

Paulus diutus ko gubernur Feliks di Kaisarea

^23-24 Lopas nian komandatn pasukan nantai moningkau duo powira. Katonyo, “Siap'an projurit bobanya' pakai' mombaba' Paulus ko gubernur Feliks di Kaisarea. Io gola' sampai ko su'utn agatn aman. Jadi, siap'an duo ratus tontara bopodakng, duo ratus tontara botumba', huatan tujuh puluh ponunggakng kuda. Siap'an jam boboropo kuda pakai' Paulus. Bososiapcam pakai' botula' japm sombilatn malapm ni'in.”

²⁵ Ongko komandatn pasukan nantai monulis surat. Isinyo dinga' ni'innan,

²⁶ “Kopado inyo tohormat Gubernur Feliks di Kaisarea: Salapm doi' Klaudius Lisias, komandatn pasukan di Yerusalem.

²⁷ Bosamo agatn surat ni'in, aku mongiripm siku' urakng tahatan. Urakng ni'in udah ditangkap ulih boko urakng Yahudi. Sia' bomasud mombunuh io. Apo aku mondinga' obai io warga negara Roma. Jadi, aku datakng agatn boko projurit pakai' monyolamant'an io.

²⁸ Aku honda' mongotohu'i hibo io dituduh ulih sia'. Jadi, aku mongumpulan boko pomimpitn sia' urakng Yahudi inyo kotakan bokuaso. Aku mombaba' io mohadap sia'.

²⁹ Ruponyo mosalahnyo bayo mongona'i boko poraturan agama sia' mo. Jadi, sia' co nyiant alasan sampai io dihukupm mati damo dimansu'an ko dalapm ponjara.

³⁰ Apo ari ni'in jam aku udah dipadahan ado kolompok urakng Yahudi inyo bohajat pakai' mombunuh io. Ongko, aku lansukng monyiuh boko projurit pakai' mombaba' io ko duatn. Aku pan udah monyiuh sia' inyo monuduh io oca' sia' cam monyampaian tuduhan sia' di hadapan duatn. Ni'innam surat doi' aku.”

³¹ Jadi, boko projurit monuruti porintah inyo dionji'i ko sia'. Pas ari malapm, sia' mocaki Paulus doi' markas ongko holu moonju'an io ko kota Antipatris doholu.

³² Kohobu'annyo somuo ompat ratus projurit inyo bojalatn kaki pulakng ko markas di Yerusalem. Sia' mombiaran tujuh puluh pasukan bokuda molajuan pojalatan agatn Paulus ko Kaisarea.

³³ Watu pasukan bokuda nantai datakng di Kaisarea, sia' monyampaian surat nantai ko gubernur Feliks. Sia' pan monyorahan Paulus ko io.

³⁴ Jadi, gubernur mombaco surat nantai. Ongko, io botakutn ko Paulus, “Kolai boasal doi' propinsi mono?” Paulus monimbas, “Aku doi' propinsi Kilikia.”

³⁵ Kato gubernur, “Aku paca'an moadili pokaro kolai watu boko urakng inyo monuduh kolai udah datakng ko si'itn.” Jadi, io monyiuh oca' Paulus dibaba' ko istana Rajo Herodes pakai' ditahatn di santai.