Kisah Boko Rasul 22 - Porjanjian Boharu Torjomahan Baso Dilakng Soari-ari

Paulus bopandir ko urakng banya'

¹ Kato Paulus, “Boko somadikan huatan boko pombopaian, dinga'anku bo. Aku honda' bopandir ko kaitn pakai' mombela diri siku'.”

² Urakng banya' nantai monjadi lobih langunt obai io bopandir dalapm baso Ibrani. Paulus molajuan bopandir,

³ “Aku urakng Yahudi samo sama'an kaitn jam. Aku dilahiran di kota Tarsus di propinsi Kilikia. Apo aku dibosaran di kota Yerusalem ni'in. Tangga'i kocit, aku bolajar boko porintah huatan poraturan Allah inyo ditulis Musa dalapm Hukupm Torat. Guru Bosar Gamaliel inyo mongajar huatan mondidik aku agatn toliti. Ongko, aku sobobondarnyo taat molayati Allah, samo sama'an somuo kaitn ari ni'in jam.

⁴ Komainyo, aku mondorako'i boko urakng inyo jumpat boko ajaran Tuhatn. Aku mondorako'i sia' sampai bomatian, aku jam inyo monangkap ongko monyorahan sia' pakai' di ponjara, boi' lolaki boi' pan botina'.

⁵ Imam Agukng huatan somuo kolompok pomimpitn agama inyo kotakan bokuaso ulih momadahan obai hal nantai bondar. Obai aku mondapat'an boko surat doi' sia' inyo ditujuan ko boko pomimpitn boko rumah sombayakng agama Yahudi di kota Damsyik. Di kota nantai ado jam boko urakng inyo jumpat boko ajaran Tuhatn Yesus. Boko surat nantai moonji'i hak oca' aku ulih monangkap sia'. Hajatku honda' mombaba' sia' bobali' ko kota Yerusalem ni'in, oca' sia' dihukupm.

⁶ Apo, dalapm pojalatan aku ko su'utn ado sosuatu inyo tojadi. Watu tongah ari aku udah dampikng kota Damsyik nantai. Sopongirap ado cohayo doi' langit. Cohayo nantai momanjah sokolilikng aku.

⁷ Lansukng aku tokorobah ko tanah. Aku mondinga' ado saro inyo bopandir, ‘Saulus, Saulus, tongga'ancam kolai mondorako'i Aku!’

⁸ Ongko aku botakutn, ‘Sopo Duatn, Tuhatn?’ Timbas-Nyo, ‘Aku ninam Yesus, urakng Nazaret, inyo kolai dorako'i nantai!’

⁹ Boko urakng inyo tuyut bosamo agatn aku pan moniant cohayo nantai. Apo kinyo kodinga'an sia' saro inyo bopandir ko aku.

¹⁰ Lopas nantai, aku botakutn, ‘La'apo inyo gola' aku labuhan, Tuhatn?’ Kato Tuhatn ko aku, ‘Bodiritncam ongko botula' ko kota Damsyik. Nono Aku paca'an moonji'i tugas ko kolai. Di kota Damsyik paca'an ado urakng inyo momadahan somuonyo ko kolai.’

¹¹ Apo cohayo nantai monyilauan matoku. Aku co ulih moniant la'apo pan. Jadi, boko urakng inyo samoan agatn aku moncanggapm longanku. Sia' moirikan aku momansu'i kota Damsyik nantai.

¹² Di santai, ado siku' urakng inyo bodamo Ananias. Io siku' urakng inyo kotakan sotia monaati boko poraturan Allah inyo ditulis Musa dalapm Hukupm Torat. Somuo urakng Yahudi inyo tinggal di su'utn mohormati io.

¹³ Io datakng bodiritn di sopia' aku. Katonyo, ‘Somadikanku, Saulus, ni'inan kolai uliham moniant agi'!’ Watu nantai jam aku ulih moniant io.

¹⁴ Ongko Ananias bopandir ko aku, ‘Allah angki-bayatn kito udah momilih kolai pakai' mongotohu'i kohonda'-Nyo, pakai' moniant Yesus inyo hala hidup bondar di hadapan Allah, pakai' jam mondinga' saro-Nyo doi' nyao Sio siku'.

¹⁵ Hal nantai tojadi ko kolai oca' kolai monjadi sasi-Nyo. Kolai gola' momboritoan ko somuo urakng mongona'i somuo inyo udah kolai tiat ongko dinga'.

¹⁶ Jadi ni'in, jangan monanti agi'. Bodiritn huatan bosodiacam pakai' dibaptis. Bodoacam ko Tuhatn Yesus oca' boko dosa kolai diamputi.’

¹⁷ Lopas nantai, aku bobali' ko Yerusalem. Timpu aku tongahan bodoa di Rumah Allah, aku ado poniant'an.

¹⁸ Dalapm poniant'an nantai Tuhatn bopandir ko aku, ‘Boko urakng Yahudi di si'itn kinyo paca'an pocayo pomandiran kolai mongona'i Aku. Jadi, kolai gola' hagar botula' doi' Yerusalem ni'in.’

¹⁹ Apo aku monimbasi, ‘Tuhatn, sia' tohu obai doholu aku ninam inyo molawatn boko urakng inyo pocayo agatn Duatn. Aku ninam inyo udah mansu' ko boko rumah sombayakng pakai' monangkap sia'. Aku bodularan ongko momansu'an sia' ko dalapm ponjara.

²⁰ Boko urakng Yahudi di si'itn pan ingant, timpu Stefanus dibunuh obai momboritoan mongona'i Duatn, aku ado di santai. Apo watu nantai, aku pan sotuju aman io dibunuh. Aku bodiritn di santai monjago jubah boko pombunuh nantai.’

²¹ Apo Tuhatn bopandir ko aku, ‘Botula'cam! Obai Aku paca'an moutus kolai ko boko tompat inyo jouh doi' si'itn. Kolai gola' momboritoan mongona'i Aku ko boko banso urakng inyo bukai Yahudi.’ ”

²² Urakng banya' nantai mondinga'an Paulus sampai io bopandir obai Tuhatn moutus io ko boko urakng inyo bukai Yahudi. Apo lopas nantai, sia' mondorah agatn kotakan borakng, “Bunuhcam urakng ni'in! Obai kinyo cucu' io hidup!”

Paulus di dalapm markas urakng Romawi

²³ Sia' hala mondorah. Sia' kotakan godi sampai sia' momucul jubah sia' ongko mohambur dobu ko pucu'.

²⁴ Ongko, komandatn pasukan nantai lansukng monyiuh oca' Paulus dibaba' mansu' ko dalapm markas. Io moonji'i porintah oca' Paulus diporiso kapikng dipodularan. Io honda' tohu ma'apo boko urakng banya' nantai mondorah kotakan godi agatn Paulus sama'an nantai.

²⁵ Jadi, boko projurit mombaba' Paulus ko dalapm. Sia' mongobatnyo oca' io ulih dipodularan. Apo sobolupm sia' bodularannyo, Paulus bopandir ko powira di santai, “Jangan lansukng bodularan aku obai aku warga negara Roma. Apotolagi', aku bolupm diadili socaro resmi.”

²⁶ Mondinga' pomandiran Paulus nantai, powira nantai molaporannyo ko komandatn pasukan. Katonyo, “Komandatn, urakng nantai warga negara Roma! La'apo inyo honda' duatn labuhan?”

²⁷ Ongko, komandatn pasukan nantai datakng ko Paulus. Io botakutn, “Apobai kolai bondar-bondar warga negara Roma? Pandiranbo ko aku.” Paulus monimbas, “Au bondaram.”

²⁸ Komandatn pasukan bopandir, “Aku gola' mombayar rogo mahal pakai' monjadi warga negara Roma.” Paulus bopandir, “Aku kinyo gola' bayar. Aku mondapat'an hak nantai obai aku lahir sobagai warga negara Roma.”

²⁹ Watu mondinga' obai Paulus bondar-bondar siku' urakng warga negara Roma, sia' somuo monjadi kotakan gola'. Boko projurit inyo disiuh pakai' bodularan io, sia' lansukng mundur. Komandatn pasukan nantai pan monjadi gola' obai io monyiuh oca' Paulus dikobat.

Paulus di hadapan kolompok pomimpitn agama Yahudi inyo palikng bokuaso

³⁰ Apo komandatn pasukan nantai honda' tohu socaro jolas ma'apo Paulus dituduh ulih boko urakng Yahudi nantai. Jadi, kohobu'annyo io monyiuh oca' Paulus dikoluaran doi' ponjara. Ongko, io mongumpulan somuo pomimpitn Yahudi. Ado boko imam kopala' huatan boko pomimpitn Yahudi inyo kotakan bokuaso di santai. Io monyiuh oca' Paulus dibaba' doi' markas ongko bodiritn di pohadapan sia'.