Kisah Boko Rasul 21 - Porjanjian Boharu Torjomahan Baso Dilakng Soari-ari

Paulus botula' ko Yerusalem

¹ Osonyo borat hati koi bopisah agatn boko ponotua' jomaat Efesus. Koi botula' bolayar doi' Miletus lansukng ko pulau Kos. Kohobu'annyo, koi ko kota Rodos. Doi' santai, koi molajuan pojalatan sampai ko kota Patara.

² Di santai koi monomuan kapal inyo paca'an monyomborakng ko doerah Fenisia. Jadi, koi botula' jumpat kapal nantai.

³ Timpu koi tongahan bolayar, koi moniant pulau Siprus di sopia' kiba'. Apo koi torus bolayar sampai ko kota Tirus di doerah Fenisia di propinsi Siria. Kapal nantai singgah di santai pakai' monurutan muant'an di santai.

⁴ Jadi, koi monjongu' boko urakng inyo pocayo agatn Yesus di santai. Koi monotap bosamo agatn sia' somanah tujuh ari. Roh Allah momadahan ko sia' obai Paulus paca'an ajab sonsaro di Yerusalem. Jadi, sia' monosihat'i Paulus oca' co botula' ko su'utn.

⁵ Apo lopas udah watunyo, koi totap honda' botula' monuju ko Yerusalem. Somuo urakng pocayo di santai moonju'an koi sampai ko luar kota. Boko ana' bini sia' tuyut jam. Di pinggir pantai, koi somuo tundu' molota'an koputut ongko bodoa.

⁶ Lopas jadi bopadah pulakng, koi noi' jumpat ko kapal, huatan sia' pulakng ko rumah siku'-monyiku'.

⁷ Doi' Tirus, koi molajuan pojalatan ongko tuntukng di kota Potolemais. Ado boko urakng inyo pocayo Yesus di santai. Koi bosonsalapan agatn sia', ongko tinggal bosamo sia' so ari.

⁸ Kohobu'annyo, koi botula' ko kota Kaisarea. Di santai koi bodiapm di rumah Filipus. Io nantai urakng inyo momboritoan Kabar Boi'. Io jam salah siku' doi' kotujuh urakng inyo komai di Yerusalem dipilih pakai' molayati boko botina' balu.

⁹ (Io bisi ompat urakng ana' botina' inyo bolupm kawitn. Tuhatn moonji'i komampuan ko koompat urakng botina' nantai pakai' monyampaian posatn-Nyo).

¹⁰ Koi udah bodiapm di Kaisarea nantai somanah boboropo ari. Lopas nantai, ado nabi inyo datakng doi' propinsi Yudea. Damonyo Agabus.

¹¹ Io mohampiki koi pakai' monyampaian posatn doi' Allah. Io monguti' ikat pinggakng Paulus, ongko mongobat kaki ongko longannyo siku'. Katonyo, “Roh Allah bopandir obai urakng umputn ikat pinggakng ni'in paca'an dikobat agatn caro inyo samo. Boko urakng Yahudi di Yerusalem paca'an mongobat io. Ongko sia' paca'an monyorahan io ko boko urakng inyo bukainyo Yahudi oca' io dihukupm.”

¹² Koi huatan boko urakng inyo pocayo di santai mondinga' pomandiran nabi Agabus nantai. Jadi, koi somuo mominto Paulus oca' jangan molajuan pojalatan ko Yerusalem.

¹³ Apo Paulus monimbas, “Jangan kaitn monangis, obai nantai bulah hatiku salu'! Aku udah siap ditangkap di Yerusalem. Malahan, aku udah siap mati sobagai murid Tuhatn Yesus.”

¹⁴ Agatn pomandiran Paulus nantai, koi sadar io co honda' monorima' nosihat koi. Jadi, koi kinyo mominto io agi' pakai' morubah koputusannyo. Koi bayo bopandir, “Biaram kohonda' Tuhatn inyo tojadi.”

¹⁵ Lopas boboropo ari di Kaisarea, koi bososiap pakai' botula' ko Yerusalem.

¹⁶ Boboropo urakng pocayo di kota nantai tuyut samoan koi. Sia' moonju'an koi ko rumah Manason. Manason boasal doi' pulau Siprus. Io udah manah am monjadi pocayo agatn Yesus. Koi noluntukng di rumahnyo.

Paulus botomu agatn boko ponotua' jomaat di Yerusalem

¹⁷ Timpu koi sampai di Yerusalem, boko urakng inyo pocayo agatn Yesus mohalu koi agatn sonang hati.

¹⁸ Kohobu'annyo, Paulus samoan koi botula' monomu'i Yakobus. Somuo ponotua' inyo bukai pan udah bokumpul di santai.

¹⁹ Paulus bosonsalapan agatn sia'. Ongko io mongisahan agatn jolas mongona'i boko hal inyo dilabuhan Allah dalapm polayatannyo ko boko banso inyo bukainyo banso Yahudi nantai.

²⁰ Mondinga' hal nantai, somuo ponotua' momuji Allah. Ongko sia' bopandir ko Paulus, “Somadikan, kolai siku' ulih moniant udah ado ribuan urakng Yahudi inyo pocayo agatn Yesus. Sia' somuo rajitn monaati boko porintah Allah inyo ditulis Musa dalapm Buku Hukupm Torat.

²¹ Boko urakng Yahudi inyo pocayo di Yerusalem udah mondinga' obai kolai mongajar boko urakng Yahudi inyo monotap di doerah boko banso inyo bukainyo banso Yahudi. Sia' mondinga' jam obai kolai momandiran ko boko urakng Yahudi nantai oca' jangan sonjumpat'an agi' adat-baso kito urakng Yahudi sama'an monyunant boko ana' sia'. Jadi, di si'itn sia' monyangko obai kolai mongajar boko urakng Yahudi oca' co monaati Hukupm Torat agi'.

²² Jadi ni'inan kito gola' momutusan sosuatu pakai' mongomboi'i koadaan ni'in. Pasti sia' paca'an mondinga' obai kolai udah ado di si'itn.

²³ Jadi, koi ponotua' monosihat'i kolai pakai' molabuhan ni'in: Di antaro koi, ado ompat urakng inyo tongahan bolampah ko Allah.

²⁴ Tuyutcam bosamo sia' dalapm upacara inyo bulah sia' borosih agi' socaro rohani. Botula'cam samoan sia' ko tongahlamanan Rumah Allah. Bayaricam ungkus pakai' kurbatn inyo sia' paca'an posombahan ko Allah. Jadi, sia' ulih monota' rambutsobagai tando obai sia' udah bolampah nantai. Watu boko urakng moniant kolai bulah ubo nian, sia' paca'an tohu obai kolai totap mohormati huatan monaati boko porintah Allah inyo ditulis Musa dalapm buku Hukupm Torat. Jadi, sia' paca'an tohu borito mongona'i kolai inyo komai didinga' sia' samo sokali kinyo bondar.

²⁵ Sodakan mongona'i boko urakng inyo bukainyo urakng Yahudi inyo udah pocayo agatn Yesus, koi udah bulah surat ko sia'. Dalapm surat nantai, koi monjolasan koputusan koi mongona'i boko porintah inyo mono gola' ditaati sia'. Ia'an, jangan bomporajoan. Jangan momua'i pomakatn inyo diposombahan ko boko duato. Jangan momua'i dagikng bonatakng inyo mati dikoci'. Jangan momua'i darah.”

²⁶ Jadi, kohobu'-kolusoannyo, Paulus tuyut ompat urakng nantai dalapm upacara inyo bulah sia' borosih agi' socaro rohani. Lopas nantai, io botula' ko tongahlamanan Rumah Allah. Di santai, io momadahan ko boko imam watunyo upacara sia' paca'an jadiam. Watu nantai boko kurbatn posombahan siku'-monyiku' ulih dibaba' ko boko imam nantai pakai' sia'.

Paulus ditangkap di Rumah Allah

²⁷ Watu tujuh ari nantai hampir habisam, Paulus ado di tongahlamanan Rumah Allah. Ado boboropo urakng Yahudi doi' propinsi Asia moniant Paulus di santai. Obai nantai sia' mohadu urakng banya' pakai' monangkap Paulus

²⁸ huatan mondorah, “Oi urakng Yahudi, tulukngbo! Ninam io inyo mongajar somuo urakng di mono-mono pakai' molawatn banso kito. Io mongajar urakng pakai' molawatn porintah huatan poraturan Allah inyo ditulis Musa dalapm buku Hukupm Torat. Io jam mongajar urakng pakai' co morogo'i Rumah Allah ni'in. Malahan timpu ni'in io udah bulah kotor socaro rohani tompat suci ni'in obai io mombaba' urakng bukai Yahudi ko si'itn.”

²⁹ (Sia' bopandir ubo nantai obai pado ari bukai, sia' moniant Paulus bosamo Trofimus. Io siku' urakng bukai Yahudi doi' kota Efesus. Sia' monyangko obai Paulus udah mombaba' io ko tongahlamanan Rumah Allah).

³⁰ Lopas pomandiran sia' nantai, soluruh kota monjadi kacau. Urakng banya' bonggidi'an bokumpul mongoliliki Paulus. Sia' monangkap io ongko monari' io ko luar doi' tembok Rumah Allah nantai. Lansukng somuo pintu gerbakng Rumah Allah ditutup.

³¹ Urakng banya' nantai honda' mombunuh Paulus. Apo borito mongona'i kokacauan nantai udah sampai ko komandatn pasukan tontara Roma.

³² Io bosamo boko powira huatan boko projurit lansukng botindak. Sia' maju ko tompat urakng banya' nantai. Timpu boko urakng Yahudi moniant komandatn pasukan huatan tontaranyo datakng, sia' botongga' bodularan Paulus.

³³ Lopas jadi komandatn pasukan nantai datakng, io monyiuh oca' Paulus ditangkap. Jadi, Paulus dikobat agatn duo rantai. Ongko, komandatn pasukan nantai botakutn, “Sopo urakng ni'in? Kosalahan la'apo inyo udah dilabuhannyo?”

³⁴ Apo ado urakng inyo mondorah sosuatu. Urakng bukainyo mondorah sosuatu inyo bukai. Saro boko urakng tolalu ramai. Jadi, komandatn pasukan nantai kinyo ulih momastian mono inyo bondar. Obai nantai, io momorintahan oca' Paulus dibaba' ko markas sia'.

^35-36 Jadi, sia' mombaba' Paulus ko su'utn. Apo, urakng banya' tuyut sia' sampai ko tanggo batu inyo monuju ko markas nantai. Urakng banya' nantai kotakan nyosahan sia' kapikng mondongkakng-mondorah, “Bunuhcam io! Bunuhcam io!” ongko, boko projurit toposo mongipa' Paulus.

Paulus minto ijitn bopandir ko boko urakng banya'

³⁷ Timpu boko projurit nantai honda' mombaba' Paulus ko dalapm markas, Paulus botakutn ko komandatn pasukan nantai. Katonyo, “Bopai, ulih cado bopandir sobontar agatn duatn?” Komandatn pasukan monimbas, “Kolai ulih bobaso Yunani!

³⁸ Jadi, kolai bukainyo pomborontak doi' Mesir nantai? Obai boboropo watu inyo komai, io bosamo ompat ribu urakng bosonjato molawatn pomorintah Romawi. Apo ni'in sia' somuo rari ko padakng pasir.”

³⁹ Paulus bopandir, “Aku ni'in bukainyo pomborontak nantai. Aku ni'in urakng Yahudi. Aku boasal doi' Tarsus, kota inyo pontikng di propinsi Kilikia. Aku ni'in warga doi' kota nantai. Jadi, ulih cado aku bopandir ko urakng banya' ni'in?”

⁴⁰ Ongko, kopala' pasukan moijitan Paulus. Paulus bodiritn di pucu' tanggo ongko moonji'i kode agatn jarinyo ko urakng banya' nantai oca' sia' langunt. Pas sia' langunt, io bopandir ko sia' dalapm baso urakng Yahudi, ia'an baso Ibrani.