Kisah Boko Rasul 20 - Porjanjian Boharu Torjomahan Baso Dilakng Soari-ari

Paulus di propinsi Makedonia huatan Akhaya

¹ Lopas boko urakng di kota Efesus langunt am, Paulus mongumpulan boko urakng pocayo. Io monulukng oca' sia' pocayo ko Yesus agatn lobih yakitn, ongko bopadah pulakng. Lopas nantai, io botula' ko propinsi Makedonia.

² Io mondataki boko urakng pocayo di boko doerah di propinsi nantai. Io moonji'i banya' nosihat oca' sia' pocayo ko Yesus agatn lobih yakitn. Lopas nian, io botula' ko propinsi Akhaya, inyo jam disobut tanah Yunani.

³ Io monotap di su'utn somanah tigo bulatn. Lopas nantai, io bososiap pakai' bolayar ko propinsi Siria. Apo io mondinga' ado boko urakng Yahudi tongahan bohajat pakai' mombunuh io dalapm pojalatan nantai. Obai nantai, io momutusan pakai' bobali' ko Yerusalem molalu'i Makedonia.

⁴ Ado boko urakng inyo monyoroto'i io dalapm pojalatan nantai, ia'an: Timotius, Sopater (ana' Pirus doi' kota Berea), Aristarkhus ongko Sekundus (koduo urakng nantai doi' kota Tesalonika), Gayus (doi' kota Derbe), huatan Tikhikus ongko Trofimus (koduonyo doi' propinsi Asia).

⁵ Sia' botula' lobih doholu doi' koi. Jadi, sia' monanti koi di kota Troas.

⁶ Koi singgah di kota Filipi. Lopas jadi ari rayo Roti Co Boragi, koi bolayar ko Troas. Lopas jadi lima' ari pojalatan, koi duo datakng. Di santai koi botomu agatn sia' inyo mondoholu'i koi. Koi somuo tinggal di su'utn somanah tujuh ari.

Di Troas, Paulus bulah Eutikhus bobali' hidup

⁷ Pado ari potamo dalapm minggu nantai, koi huatan boko urakng pocayo di Troas bokumpul. Koi somuo honda' morayaan Porjamuan Kudus. Paulus huatan koi kawal sopojalatannyo bohajat pakai' botula' doi' Troas sunsukng hobu'nyo. Ongko, Paulus mongajar sia' manah bondar, sampai tongah malapm.

⁸ Koi somuo bokumpul di ruakan di tingkat pucu', lantai tigo. Ado banya' pompolitoan inyo bonyalo.

⁹ Di santai, ado siku' bobia' muda' dudu' di jondela. Damonyo Eutikhus. Pontongahan Paulus ija' bopandir, Eutikhus kotakan ngantu' bondar. Ponsuahannyo io co ulihnyo monahan kantu'nyo. Io pan toidu' ngindo, ongko togoligap jatu' doi' tingkat tigo tuntukng ko tanah. Samo-jatu' jam ado urakng turutn mongatut io. Ruponyo, io udah mati.

¹⁰ Apo Paulus turutn, morobahan diri ko pucu' bukakng bobia' muda' nantai, ongko mongolu'inyo. Biar pan sia' tohu bobia' muda' nantai udah mati, apo Paulus bopandir ko somuo urakng di santai, “Jangan sosa', obai io ija' hidup.”

¹¹ Lopas nian koi somuo bobali' noi' ko pucu'. Paulus momimpitn koi dalapm Poraya'an Porjamuan Kudus nantai. Lopas jadi makatn, Paulus torus mongajar sampai dinihari. Lopas jadi nantai, io botula' bosamo-samo agatn koi kawal sopojalatannyo.

¹² Eutikhus nantai dionju'an pulakng ko rumahnyo. Somuo urakng pocayo di kota Troas nantai kotakan sonang obai io ija' hidup.

Pojalatan Paulus doi' Troas ko kota Miletus

¹³ Jadi rombokan koi botula' doi' Troas ko kota Asos. Paulus udah moatur hajatnyo. Io sonsiku'an molalu'i jalatn darat, apo koi inyo bukai bolayar. Jadi, koi lobih doholu datakng di Asos ongko monanti Paulus di su'utn.

¹⁴ Watu Paulus datakng di Asos, io pan jumpat kapal samoan koi. Ongko, koi somuo molajuan pojalatan ko kota Metilene.

¹⁵ Pas kohobu'-kolusoannyo, koi bolayar doi' Metilene tuntukng ko dampikng pulau Khios. Ari kohobu'-kolusoannyo agi', koi molalu'i pulau Samos. Soari agi' lopas nantai, koi datakng di kota Miletus.

¹⁶ Doi' pulau Samos ko kota Miletus, koi kinyo singgah di kota Efesus. Paulus udah momutusan nantai. Io co honda' tolalu manah di propinsi Asia obai io honda' hagar tuntukng ko Yerusalem. Aman ulih, io honda' ado di su'utn pado ari rayo Pentakosta.

Paulus bopadah pulakng ko boko ponotua' doi' Efesus

¹⁷ Obai koi co singgah di Efesus, jadi Paulus monyiuh siku' urakng pakai' monyampaian posatn ko boko ponotua' di su'utn. Io minto oca' sia' datakng monomu'i io di Miletus.

¹⁸ Jadi, sia' datakng. Ongko, Paulus bopandir ko sia', “Kaitn tohu caro aku hidup somanah aku tinggal di antaro kaitn. Doi' ari potamo aku datakng di Asia sampai watu ni'in, kaitn udah tohu somuonyo.

¹⁹ Aku molayati Tuhatn agatn rondah hati. Dalapm polayatan nantai, opat aku sampai monangis. Aku moalapi banya' ajab sonsaro obai urakng Yahudi inyo kinyo pocayo agatn Yesus opat bulah kojahatan ko aku.

²⁰ Biar pan ubo nian, aku totap momboritoan mongona'i Yesus. Aku co kalo monahan sobuti' ajaran pan inyo boguno pakai' kaitn. Aku mongajar di muka' umum honda' pan doi' rumah ko rumah.

²¹ Aku hala mongajar agatn torus torakng, boi' ko boko urakng Yahudi huatan ko boko urakng Yunani oca' sia' botongga' bulah dosa huatan hidup monyonangan hati Allah. Sia' gola' pocayo ko Yesus, Tuhatn inyo bokuaso pucu' kito.

²² Ni'inan, aku gola' ko Yerusalem obai Roh Allah udah monyiuh aku. Aku gola' monaati-Nyo biar pan aku co tohu la'apo inyo paca'an tojadi ko aku di su'utn.

²³ Aku bayo tohu ni'in. Timpu aku botula' doi' kota ko kota, Roh Allah udah momadahan ko aku, nononyo aku paca'an dimansu'an ko dalapm ponjara. Aku pan paca'an moalapi ajab sonsaro.

²⁴ Apo aku co poduli. Biar pan aku dibunuh, aku totap co poduli. Tuhatn Yesus udah moonji'i tugas ko aku pakai' momboritoan Kabar Boi' obai Allah udah monyatoan koboi'an-Nyo ko monsio. Aku gola' monyolosaian tugasku nantai. Nianam inyo pontikng, bukainyo hidup aku.

²⁵ Aku udah tohu kaitn somuo co paca'an botomu agatn aku agi'. Apo aku udah moajaran ko kaitn somuo mongona'i Koraja'an Allah.

^26-27 Agatn sotia, aku udah moajaran ko kaitn mongona'i la'apo inyo dikohonda'i Allah pakai' somuo monsio. Obai nantai, ari ni'in aku momandiran: Aman ado urakng di antaro kaitn inyo mondapat hukupan nononyo obai co pocayo agatn Yesus, nantai kinyo tanggukng-jawab aku agi'.

²⁸ Kaitn gola' monjago diri kaitn huatan urakng bukai inyo udah pocayo agatn Yesus oca' totap pocayo. Allah udah monobus monsio doi' hukupan dosa agatn darah-Nyo sikuꞌ. Jadi, sia' udah monjadi umant Allah siku'. Kaitn udah dipilih Roh Allah pakai' momimpitn sia' nantai. Obai nantai, kaitn gola' monjago sia' samo sama'an gombala monjago kabatn dombanyo.

²⁹ Aku tohu obai lopas jadi aku botula', paca'an ado boko urakng inyo datakng ko kaitn agatn ajaran inyo salah. Sia' paca'an moncubo monyosat'an urakng. Sia' samo sama'an boko payau ganas inyo honda' monyorakng boko domba kaitn.

³⁰ Malahan doi' antaro kaitn siku' paca'an ado urakng inyo moajaran ajaran inyo salah. Sia' paca'an bousaha oca' urakng bukai kinyo pocayo ajaran Yesus inyo bondar apo monjadi pongikut sia'.

³¹ Obai nantai, bojago-jagocam! Ingantcam somanah tigo tohutn, siakng ongko malapm aku co botongga' mongajar kaitn masikng-masikng. Aku monosihat'i kaitn agatn banya' ara'i mato oca' kaitn totap pocayo agatn Yesus.

³² Ni'inan, aku monyorahan kaitn ko Allah. Mudahan Allah molinduki kaitn. Totap ja' pocayo ko Kabar Boi' mongona'i koboi'an Allah. Mudahan Allah huatan Kabar Boi' nantai hala bulah hati kaitn pocayo ko Yesus mongkitn kuat. Obai Allah bokuaso moonji'i tuah inyo udah disodiaan husus bayo pakai' umant kokidah-Nyo.

³³ Aku co kalo mongohonda'i dionji'i kodampuan ulih urakng bukai, boi' borupo pira', omas, damo pakai'an.

³⁴ Kaitn siku' tohu obai aku bokorojo pakai' momonuhi somuo kopontikan aku. Aku bokorojo bulah kemah agatn bokorojo siku'. Doi' pokoroja'an nantai, aku mondapat'an cukup pakai' boko kawal inyo molayati bosamo agatn aku jam.

³⁵ Dalapm somuo inyo aku labuhan nantai, aku monjadi contoh pakai' kaitn. Kaitn pan gola' bokorojo koras ongko monulukng boko urakng inyo jaro. Jangan tongkolupatn pomandiran Tuhatn Yesus, ‘Allah lobih momborokati urakng inyo moonji'i bantu'an daripado urakng inyo monorima' bantu'an.’ ”

³⁶ Lopas jadi Paulus momandiran somuo nantai, io molota'an kopututnyo ongko bodoa bosamo somuo ponotua' doi' Efesus nantai.

³⁷ Sia' somuo monangis kapikng mongolu'i huatan monciupm-ngomomah io, sobagai tando sia' bopisah huatan sia' mongidah io.

³⁸ Sia' kotakan salu', tolobih obai Paulus bopandir obai sia' co paca'an botomu io agi'. Lopas nian, sia' moonju'an io ko kapal.