Kisah Boko Rasul 2 - Porjanjian Boharu Torjomahan Baso Dilakng Soari-ari

Roh Allah turutn doi' sorugo moisi'i boko urakng inyo pocayo agatn Yesus

¹ Watu Ari Pentakosta, somuo urakng inyo pocayo agatn Yesus bokumpul. Sia' bokumpul di sobuah rumah.

² Sia' somuo dudu' di santai. Timpu sia' dudu', kali-labuh ado bunyi doi' langit. Bunyinyo ubo bonakau. Bunyi nantai kotakan borakng, somuo urakng di dalapm rumah mondinga'nyo.

³ Lopas nian sia' moniant sosuatu inyo kotiat'annyo sama'an boko lidah ubo lidah api. Ongko moroit huatan ninggur ko sia' masikng-masikng.

⁴ Roh Allah moisi'i somuo sia', ongko bulah sia' masikng-masikng bopandir pakai boko baso inyo bukai mombuka'i doi' baso sia' siku'.

⁵ Watu nantai, di kota Yerusalem banya' jam urakng Yahudi inyo boasal doi' boko banso bukai di dunia. Sia' nantai boko urakng inyo monyombah huatan monaati Allah agatn sotia.

⁶ Watu urakng banya' nantai mondinga' bunyi bonakau inyo borakng tontai, sia' datakng bokumpul mohampiki rumah nantai jam. Tokonyant ongko topocongo sia' obai mondinga' boko murid Yesus tongahan bopandir pakai baso sia'.

⁷ Somuo sia' hiratn bondar. Kato sia' siku'-monyiku', “Boko urakng inyo bopandir nantai somuonyo urakng Galilea.

⁸ Apo sia' kotakan tohu bondar bopandir pakai baso doerah kito! Somuo kito boasal doi' boko doerah bukai,

⁹ tomansu' Partia, Media, Elam, huatan pondudu' Mesopotamia, Yudea, Kapadokia, Pontus, ongko Asia.

¹⁰ Tomansu' jam doerah Frigia, Pamfilia, Mesir, huatan boko bagian Libia inyo dampikng kota Kirene. Ado jam inyo datakng doi' ibu kota Roma,

¹¹ doi' pulau Kreta, huatan boko urakng Arab. Kito inyo bokumpul kinyo bayo urakng Yahudi asli, apo urakng doi' banso bukai jam inyo udah mansu' agama Yahudi. Jadi aneh bondar, boko murid Yesus ulih bopandir pakai baso kito ni'in! Sia' bopandir mongona'i boko hal luar biaso inyo dilabuhan Allah.”

¹² Boko urakng nantai hiratn huatan topocongo. Ado di antaro sia' inyo bopandir ko siku'-monyiku', “Kito co mongoroti la'apo inyo tojadi ni'in.”

¹³ Apo ado jam boboropo urakng bukai inyo monontao'i boko murid Yesus nantai. Kato sia', “Ah, boko urakng nantai udah minum anggur manis tolalu banya'. Sia' bayo mabu'mo!”

Rasul Petrus monjolasan Yesus nantai Rajo Inyo Dijanjian Allah

¹⁴ Lopas nian Petrus maju bosamo kosobolas rasul inyo bukai. Agatn saro borakng io bopandir ko somuo urakng banya' nantai, “Boko somadikan urakng Yahudi huatan somuo urakng inyo bodiapm di Yerusalem! Dinga'anbo pomandiranku ni'in. Aku paca'an monjolasan masud doi' somuo inyo tojadi ni'in.

¹⁵ Ado di antaro kaitn inyo monyangko koi ni'in mabu'. Nantai kinyo bondar obai ni'in hoyu' japm sombilatn sunsukng.

¹⁶ Sobondarnyo watu joman komai Allah udah mombori'tohuan molalu'i Nabi Yoel mongona'i poristiwa kodatakan Roh Allah ni'in. Nabi Yoel monulis,

¹⁷ Allah bopandir, ‘Watu ahir joman, Aku paca'an moonji'i Roh-Ku ko somuo urakng. Ongko boko ana' kaitn, lolaki huatan botina' tajahan monyampaian posatn-Ku ko boko urakng. Boko bujakng muda' kaitn paca'an bodapat boko poniant'an, Boko urakng tuho kaitn paca'an bodapat boko mimpi husus.

¹⁸ Watu ahir joman nantai jam, Aku paca'an moonji'i Roh-Ku malahan ko boko hulutn-Ku, lolaki huatan botina'. Sia' paca'an monyampaian posatn-Ku ko boko urakng.

¹⁹ Aku pan tajahan bulah boko tando mujisat inyo luar biaso di langit huatan di bumi. Watu nantai paca'an ado darah, api ongko ansap tobal.

²⁰ Matoari paca'an monjadi golap. Bulatn paca'an monjadi mirah ubo darah. Boko hal nantai paca'an tojadi sobolupm Tuhatn datakng. Ari kodatakan Tuhatn nantai ari inyo pontikng huatan luar biaso.

²¹ Watu ari nantai, somuo urakng inyo mondorah mominto potulukan-Nyo, sia' paca'an disolamant'an.’

²² Petrus molajuan pandirnyo, Watu ni'in boko somadikanku urakng Israel, dinga'an pomandiranku ni'in. Yesus doi' laman Nazaret diutus ulih Allah. Allah udah mombutian nantai obai Allah molabuhan somuo macapm mujisat di tongah-tongah kaitn somuo molalu'i Sio. Kaitn udah mongotohu'i nantai.

²³ Biar pan kaitn mongotohu'i nantai, kaitn monyorahan Sio ko boko urakng inyo kinyo mongonal Allah. Kohonda' kaitn oca' Sio dihukupm mati di kayu salib. Apo somuonyo nantai tojadi sosuai agatn kohonda' Allah. Hajat Allah nantai udah ditotapan-Nyo doi' joman komaimo.

²⁴ Jadi, co mungkitn Yesus ija' totap mati. Obai nantaiam, Allah udah bulah Sio bobali' hidup huatan mombebasan Sio doi' ajab sonsaro komatian.

²⁵ Kito udah mongotohu'i nantai obai joman komai Rajo Daud monulis mongona'i Sio. Dinga' ni'in bunyinyo: ‘Aku, monyadari obai Duatn, Tuhatn, hala monyoroto'iku. Aku cuku paca'an gola' agatn boko musuh-Ku obai Duatn hala monulukng-Ku agatn kokuatan Duatn.

²⁶ Obai nantai, hati-Ku rindakng, mulut-Ku momuji Duatn, malahan bukakng-tubuh-Ku pan mooso logo hidup boharap ko Duatn.

²⁷ Aku mooso logo obai Duatn co paca'an mombiaran Aku totap mati. Duatn co paca'an mombiaran utusan Duatn inyo Suci sampai momburu' di pasaran obai Aku hala taat huatan sotia agatn Duatn.

²⁸ Duatn udah mombori'tohu ko Aku obai Aku paca'an hidup agi' doi' komatian. Aku paca'an hala rindakng obai Aku dapat hidup bosamo agatn Duatn.’

²⁹ Petrus torus bopandir, Watu ni'in boko somadikan, aku pontikng bopandir torus torakng ko kaitn. Daud, rajo angki-bayatn kito nantai pasti io co monulis pomandiran nantai mongona'i dirinyo siku'. Io udah mati huatan dipasaram. Pasarannyo sampai ni'in ija' ado.

³⁰ Apo io nantai nabi. Io udah mongotohu'i la'apo inyo paca'an tojadi. Io ado janji doi' Allah. Janji nantai kuat bondar. Ni'innam janji-Nyo: siku' urakng doi' koturutan Daud paca'an monjadi rajo. Rajo nantai paca'an momorintah umant Allah.

³¹ Jadi, watu Daud monulis ‘Allah co tajahan mombiaran Aku totap mati’ huatan ‘Allah co paca'an mombiaran bangkai-Ku monjadi buru' di pasaran’, sobondarnyo Daud monulis pomandiran Rajo Inyo Dijanjian Allah nantai. Daud udah tohu Allah paca'an bulah Rajo nantai hidup agi' doi' komatian.

³² Boko somadikan, Yesus nanam Rajo nantai! Lopas Yesus mati, Allah bulah Sio hidup agi' doi' komatian. Koi somuo udah moniant Sio. Koi moniant agatn mato kopala' koi siku'.

³³ Lopas nantai, Sio udah noi' ko sorugo obai kuaso Allah. Yesus pan udah monorima' Roh Allah obai Roh Allah nantai udah dijanjian Bopai-Nyo. Jadi, watu ni'in Yesus moonji'i Roh Allah ko koi. Nanam kojadian inyo udah kaitn tiat huatan dinga' molalu'i boko urakng inyo bopandir agatn bomacapm baso di si'itn.

³⁴ Nah Daud siku' kinyo noi' ko sorugo, apo io monulis pomandiran ni'in: ‘Tuhatn bopandir ko Tuhatnku: Dudu'cam di tompat inyo tohormat di sopia' kanan-Ku.

³⁵ Dudu'cam di santai sampai Aku bulah boko musuh Duatn ubo kotonja'an kaki Duatn.’

³⁶ Ongko Petrus monyimpulan, Obai somuo buti nantai, ongko somuo urakng Israel gola' tohu ni'in agatn pasti: Allah monotap'an Yesus monjadi Tuhatn inyo bokuaso. Allah jam monotap'an Yesus monjadi Kristus, ia'an golar pakai' Rajo Inyo Udah Dijanjian Allah doi' joman komai. Apo kaitn bulah Sio dihukupm mati di kayu salib.”

³⁷ Timpu urakng banya' mondinga' hal nantai, hati sia' sangant monyosal. Sia' botakutn ko Petrus ongko boko rasul bukai, “Boko somadikan, la'apo inyo gola' koi labuhan?”

³⁸ Timbas Petrus, “Tinggalan cam dosa kaitn ongko hidup monyonangan hati Allah. Kaitn gola' dibaptis pakai' monunju'an obai kaitn pocayo ko Yesus Kristus. Agatn ubo nian, ongko dosa kaitn paca'an diamputi, ongko kaitn paca'an monorima' Roh Allah.

³⁹ Obai Roh nantaiam Allah janjian ko kaitn, ko boko poana'an kaitn, huatan ko boko urakng di tompat inyo jouh, ia'an somuo urakng inyo ditingkau Tuhatn Allah kito pakai' monjadi umant-Nyo.”

⁴⁰ Petrus bisi banya' pomandiran inyo bukai agi' pakai' monguat'an hati sia' huatan moingant'an sia'. Katonyo, “Allah tajahan monjatu'an hukupan ko boko urakng joman ni'in inyo jahat. Culih hala sonjumpat'an sia' oca' kaitn disolamant'an doi' hukupan nantai.”

⁴¹ Watu ari nantai, ado banya' urakng inyo pocayo pomandiran Petrus nantai, kiro-kiro tigo ribu urakng. Sia' dibaptis jam. Jadi, jumlah urakng inyo pocayo agatn Yesus botambah agi'.

⁴² Sia' hala tuyut somuo ajaran boko rasul. Somuo sia' opat bokumpul bosamo boko urakng bukai inyo pocayo. Sia' opat makatn huatan bodoa bosamo.

Caro hidup boko urakng inyo pocayo agatn Yesus

⁴³ Watu nantai, boko rasul molabuhan bomacapm mujisat Obai nantai, somuo urakng di Yerusalem mooso hiratn.

⁴⁴ Somuo urakng inyo pocayo totap bosatu. Sia' somuo mooso umputn sia' nantai umputn bosamo.

⁴⁵ Jadi opat ado doi' antaro sia' inyo monjual kodampuan umputnnyo. Hasil doi' ponjualan nantai, sia' pombagi-bagian ko boko urakng bukai inyo momontikan bantu'an.

⁴⁶ Sotiap ari sia' bokumpul di tongahlamanan Rumah Allah, pusat kogiatan koagamaan urakng Yahudi. Sia' bokumpul agatn sohati sopikiran. Sia' pan opat hala mohundakng pakai' makatn bosamo di boko rumah sia', huatan sia' morayaan Porjamuan Kudus jam. Sia' molabuhan somuo nantai agatn tulus hati huatan kotakan rindakng,

⁴⁷ kapikng momuji Allah. Somuo urakng sonang agatn sia'. Kolompok urakng inyo pocayo nantai botambah banya' obai sotiap ari ado boko urakng inyo disolamant'an Tuhatn.