Kisah Boko Rasul 19 - Porjanjian Boharu Torjomahan Baso Dilakng Soari-ari

Paulus mongajar di Efesus

¹ Timpu Apolos ija' ado di kota Korintus di propinsi Akhaya, Paulus udah mondataki boboropo doerah bukai di propinsi Galatia huatan Frigia. Io bojalatn torus sampai di Efesus di propinsi Asia. Di santai io botomu agatn boboropo urakng inyo pocayo.

² Io botakutn ko sia', “Timpu kaitn monjadi pocayo, apobai kaitn udah monorima' Roh Allah?” Timbas sia', “Bolupm. Malah koi bolupm kalo mondinga' obai ado Roh Allah.”

³ Jadi io bopandir, “Aman ubo nian, kaitn dibaptis agatn baptisan inyo mono?” Sia' bopandir, “Agatn baptisan Yohanes.”

⁴ Ongko, Paulus monjolasan. Katonyo, “Yohanes mombaptis boko urakng sobagai tando obai sia' udah moninggalan boko dosa sia'. Yohanes jam momboritoan obai paca'an ado Urakng inyo datakng lopas io. Yohanes bopandir obai boko urakng gola' pocayo agatn Urakng nantai. Urakng nantai ia'an Yesus.”

⁵ Timpu sia' mondinga' hal nantai, sia' dibaptis pakai' monunju'an obai sia' pocayo agatn Tuhatn Yesus.

⁶ Ongko, Paulus molota'an jarinyo ko pucu' sia'. Roh Allah turutn ko pucu' sia'. Sia' mula'i bopandir dalapm bomacapm baso inyo dionji'i Roh Allah. Momadahan boko posatn-pontal doi' Allah.

⁷ Ado kiro-kiro duo bolas urakng inyo dibaptis nantai.

⁸ Paulus pan botula' ko rumah sombayakng agama Yahudi di kota Efesus. Somanah tigo bulatn, io opat mongajar di santai. Agatn borani io botikakng agatn boko urakng di santai. Io monjolasan mongona'i Koraja'an Allah. Io bousaha moyakit'an sia' obai Yesus nantai Rajo Inyo Dijanjian Allah inyo momorintah di Koraja'an Allah nantai.

⁹ Apo ado boboropo urakng inyo kinyo honda' mondinga' mongona'i hal nantai. Sia' monula' pakai' pocayo agatn Yesus. Malah di muka' umum sia' mohayam ajaran Tuhatn Yesus nantai. Obai nantai, Paulus moninggalan rumah sombayakng nantai. Io mombaba' boko urakng pocayo di santai ko tompat bukai. Damo tompat nantai balai Tiranus. Paulus mongajar di santai sotiap ari.

¹⁰ Io mongajar boko urakng Yahudi huatan boko urakng Yunani somanah duo tohutn. Jadi, somuo urakng inyo bodiapm di propinsi Asia mondinga' mongona'i Tuhatn Yesus.

Yesus lobih bokuaso doi' ponohu

¹¹ Allah moonji'i kuaso ko Paulus pakai' molabuhan boko mujisat inyo luar biaso.

¹² Malahan sapu tangan damo koitn inyo kalo dipakai Paulus, ulih digunoan pakai' monyamani boko urakng. Aman boko koitn nantai dilota'an ko urakng boponyakit, ongko sia' monjadi nyamanam. Aman boko koitn nantai dilota'an ko boko urakng inyo korasu'an, ongko boko roh jahat koluar doi' sia'.

^13-14 Apo ado imam kopala' urakng Yahudi. Damonyo Skewa. Io bisi tujuh urakng ana' lolaki. Somuonyo monjadi tukakng sihir. Caro hidup sia' bokolilikng doi' kota ko kota. Di kota Efesus, sia' bousaha monundukng boko roh jahat agatn momakai kuaso Tuhatn Yesus. Kato sia', “Paulus mongajar mongona'i Yesus. Agatn kuaso Yesus nantai, koi porintahan roh jahat koluar doi' urakng ni'in.”

¹⁵ Apo roh jahat nantai monimbas, “Aku udah tohu agatn Yesus. Aku pan tohu Sio moonji'i kuaso ko Paulus pakai' monundukng koi. Apo kaitn co nyiant kuaso la'apo pan!”

¹⁶ Lansukng urakng inyo korasu'an roh jahat nantai moloncat, monyorakng sia' huatan bodularan sia' ongko mombirat pakai'an sia'. Sia' toposo rari, tokolanjakng huatan bolukoan.

¹⁷ Borito mongona'i kojadian nantai didinga' somuo urakng inyo tinggal di Efesus, boi' urakng Yahudi huatan urakng Yunani. Ongko, sia' somuo monjadi gola'. Sia' momuji damo Tuhatn Yesus obai sia' sadar Sio kotakan bokuaso.

¹⁸ Banya' urakng doi' sia' nantai monjadi pocayo ko Yesus, ongko datakng mongaku' boko porbuatan jahat sia' di muka' umum.

¹⁹ Banya' jam doi' sia' inyo kalo molabuhan boko ponohu. Sia' nantai mongumpulan boko buku ponohu sia' ongko moncuculnyo dihadapan somuo urakng. Rogo boko buku nantai dihitukng. Jumlahnyo kiro-kiro lima' puluh ribu kopikng duit pira'.

²⁰ Obai somuo nantai, mongkitn banya' urakng mondinga' borito mongona'i Tuhatn Yesus. Boko urakng monjadi sadar Yesus kotakan bokuaso. Mongkitn banya' urakng monjadi pocayo agatn Sio.

Kokacauan di Efesus

²¹ Lopas nantai, obai bimbikan Roh Allah Paulus bulah hajat pakai' botula' ko Yerusalem. Dalapm pojalatan ko su'utn, io honda' molalu'i propinsi Makedonia huatan Akhaya oca' io ulih mondataki boko urakng pocayo di su'utn. Io pan honda' ko kota Roma. Katonyo, “Lopas jadi aku botula' ko Yerusalem, aku gola' mondataki Roma.”

²² Jadi, Paulus mongiripm duo urakng kawal korojonyo, ia'an Timotius ongko Erastus. Sia' mondoholu'i io ko propinsi Makedonia. Apo io monotap cukup manah agi' di kota Efesus di propinsi Asia.

²³ Timpu nantai, ado boko urakng monontakng boko urakng inyo hidup sosuai agatn ajaran Tuhatn. Sia' bulah kokacauan bosar di kota Efesus nantai. Kokacauan nantai tojadi obai Demetrius

²⁴ Demetrius nantai bisi usaha pira'. Io bosamo kawal korojonyo bulah boko rumah hohayapan doi' pira'. Boko rumah hohayapan nantai dipulah dalapm rupo rumah pakai' monyombah dewi Artemis inyo ado di kota Efesus nantai. Sia' mondapat'an banya' duit doi' hasil usaha nantai.

²⁵ Demetrius nantai mongumpulan kawal korojonyo huatan somuo urakng doi' luar tompat korojonyo samo-samo tukakng pira' jam. Kato Demetrius ko sia', “Boko somadikan, kaitn somuo tohu obai kito mondapat banya' duit doi' pokoroja'an ni'in.

²⁶ Apo ni'inan kaitn siku' udah mondinga' ajaran Paulus. Io mongajar obai boko lompatukng sama'an inyo kito pulah, bukainyo duato apo bayo pulahan monsio mo. Kaitn siku' udah moniant obai Paulus udah morubah pomikiran banya' urakng, boi' pondudu' Efesus huatan pondudu' doi' somuo doerah di propinsi Asia.

²⁷ Nantai moancapm usaha kito. Boko usaha kito paca'an dihanyam. Apotolagi' kuil dewi Artemis kito ni'in nono paca'an dianggap nyiant-pasalnya. Nono urakng paca'an kinyo moanggap dewi Artemis cucu' disombah. Matiam! Obai io nanam dewi inyo disombah-sombah ulih somuo urakng di Asia malahan di soluruh dunia.”

²⁸ Watu somuo tukakng pira' mondinga' nantai, sia' monjadi kotakan godi. Sia' mondongkakng-mondorah, “Hebat bondar Artemis, dewi urakng Efesus! Hebat bondar Artemis!”

²⁹ Banya' urakng bukai monjadi tolibat. Soluruh kota nantai monjadi kacau. Urakng banya' borindakng-ramai bonggidi'an momansu'i lapakan umum inyo bosar. Duo kawal Paulus ditangkap ongko dibaba' ko su'utn jam. Damo sia' Gayus ongko Aristarkhus. Sia' duo doi' Makedonia apo tuyut Paulus dalapm polayatannyo.

³⁰ Watu nantai, Paulus pan honda' mansu' ko dalapm lapakan nantai. Io honda' bopandir ko urakng banya' nantai. Apo boko urakng pocayo kinyo moijitannyo.

³¹ Malah boboropo pombosar propinsi Asia pan monyampaian posatn oca' io jangan mansu' ko tompat nantai. Boko pombosar nantai udah monjadi kawal Paulus doi' komai.

³² Koadaan di dalapm lapakan nantai kotakan kacau. Ado urakng inyo mondorah ni'in. Urakng bukai mondorah sosuatu inyo bukai. Kobanya'an urakng kinyo tohu samo sokali tujuan sia' bokumpul di santai.

³³ Boko urakng agama Yahudi monyurukan siku' urakng ko muka'. Damonyo Aleksander. Jadi, ado boko urakng bopikir io inyo bosalah. Aleksander moonji'i kode agatn jarinyo oca' urakng banya' langunt. Io honda' monjolasan obai mosalah ni'in kinyo disobaban ulih urakng Yahudi.

³⁴ Apo urakng banya' konal agatn io sobagai urakng Yahudi. Jadi, sia' kinyo honda' mondinga'an io. Sia' mondongkakng-mondorah, “Hebat bondar Artemis, dewi urakng Efesus!” Somanah kiro-kiro duo japm, urakng banya' hala mondorah sama'an nantai.

³⁵ Lopas nian, juru tulis kota nantai monyiuh oca' urakng banya' nantai langunt. Katonyo, “Hai urakng Efesus, jangan ramai! Pasti somuo urakng di dunia ni'in udah tohu obai kito urakng Efesus inyo monjago kuil Artemis, dewi inyo palikng hebat! Somuo urakng udah tohu obai kito ninam inyo monjago lompatukng Artemis. Lompatukng nantai jatu' doi' langit.

³⁶ Co nyiant urakng inyo ulih monikaki konyata'an nantai. Obai nantai, honda'nyo kito langunt. Jangan bulah kolaku'an ceroboh.

³⁷ Soharusnyo kaitn kinyo mombaba' koduo urakng ni'in ko si'itn agatn caro ni'in. Sia' kinyo mongolit la'apo pan doi' kuil duato kito. Sia' kinyo mohayam damonyo.

³⁸ Aman Demetrius ongko kawal korojonyo ado mosalah agatn siku' urakng, ado aturan pakai' monyolosaian mosalah nantai. Sia' gola' mombaba' pokaro nantai ko sidakng pongadilan. Ado boko hakipm inyo paca'an moadili pokaro antaro koduo pihak ni'in.

³⁹ Aman kaitn ija' ado mosalah inyo bukai, mosalah nantai gola' disolosaian dalapm sidakng rayat inyo sah.

⁴⁰ Kaitn co nyiant alasan inyo sah pakai' bokumpul ari ni'in. Aman kaitn bulah kokacauan sama'an ni'in, kito co ulih monjolasannyo ko pomorintah Romawi. Nantai mombohayoan, obai nono sia' ulih monyalahan kito somuo.”

⁴¹ Mondinga' pomandiran juru tulis kota nantai, jadi pokumpulan rayat nantai bubar.