Kisah Boko Rasul 18 - Porjanjian Boharu Torjomahan Baso Dilakng Soari-ari

Paulus di kota Korintus Akwila ongko Priskila (18:1-4)

¹ Lopas nantai, Paulus botula' doi' kota Atena. Io botula' ko kota Korintus.

² Di su'utn io botomu agatn siku' urakng Yahudi inyo boasal doi' propinsi Pontus. Damonyo Akwila. Bininyo bodamo Priskila. Boboropo watu sobolupmnyo, sia' duo nantai tinggal di kota Roma di propinsi Italia. Apo Kaisar negara Roma inyo bodamo Klaudius, momorintahan oca' somuo urakng Yahudi gola' koluar doi' kota Roma. Obai nantai Akwila ongko Priskila pan pindah ko Korintus. Bolupm manah sia' bodiapm di kota Korintus, Paulus datakng ko rumah sia'.

³ Pokoroja'an sia' samo sama'an Paulus. Sia' bulah tenda pakai' dijual. Jadi, Paulus tinggal huatan bokorojo bosamo sia'.

⁴ Apo sotiap Ari Sabat, Paulus botula' ko rumah sombayakng agama Yahudi. Di santai io bopandir ko somuo urakng inyo datakng, boi' boko urakng Yahudi sama'an nian jam ko boko urakng Yunani. Io bousaha moyakit'an sia' oca' pocayo agatn Yesus.

Silas ongko Timotius datakng monulukng Paulus momboritoan mongona'i Yesus (18:5-11)

⁵ Lopas nian, Silas ongko Timotius datakng doi' propinsi Makedonia. Jadi, Paulus ulih momakai somuo watunyo pakai' momboritoan ko somuo urakng inyo boagama Yahudi. Paulus momboritoan agatn jolas obai Yesus nantai Rajo Inyo Dijanjian Allah.

⁶ Apo boko urakng Yahudi nantai molawatn huatan mohayam Paulus. Jadi, io mongibasan dobu doi' pakai'annyo pakai' tando poringant'an. Kato Paulus ko sia', “Aku udah botanggukng jawab momboritoan Kabar Boi' ko kaitn somuo. Apo kaitn totap co pocayo agatn Yesus. Nononyo aman kaitn dihukupm Allah, nantai kosalahan kaitn siku'. Aku co botanggukng jawab agi'. Jadi, mula'i watu ni'in, aku paca'an botula' momboritoan Kabar Boi' ko boko banso inyo bukainyo banso Yahudi.”

⁷ Ongko Paulus moninggalan sia'. Io botula' ko rumah inyo ado di sopia' rumah sombayakng nantai. Nantai rumah Titius Yustus. Io nantai bukai urakng Yahudi apo udah monjadi urakng inyo pocayo ko Allah.

⁸ Banya' urakng di Korintus mondinga' ajaran Paulus ongko monjadi pocayo agatn Yesus, tomansu' Krispus, kopala' rumah sombayakng nantai huatan somuo urakng inyo tinggal dalapm rumahnyo. Somuo urakng pocayo nantai dibaptis jam.

⁹ Pado suatu malapm, Paulus ado poniant'an. Tuhatn bopandir ko io, “Jangan gola'! Torus ja' momboritoan Kabar Boi'. Jangan botongga' momboritoan mongona'i hal nantai.

¹⁰ Jangan gola' obai Aku monyoroto'i kolai! Co nyiant siku' urakng pan inyo paca'an mondorako'i kolai. Torus ja' mongajar obai boko umant-Ku di kota ni'in.”

¹¹ Ongko, Paulus monotap di Korintus somanah sotohutn sotongah huatan momboritoan pomandiran Allah mongona'i Yesus.

Gubernur Galio kinyo moadili Paulus (18:12-17)

¹² Pado watu Paulus ija' di kota Korintus, pomorintah Romawi moangkat Galio monjadi gubernur propinsi Akhaya nantai. Watu nantai, boko urakng Yahudi bosamo-samo molawatn Paulus. Sia' mombaba' io ko pohadapan Galio pakai' diadili.

¹³ Sia' monuduh Paulus. Kato sia', “Urakng ni'in mongajar boko urakng pakai' monyombah Allah. Apo ajaran io bolawatan agatn boko porintah agama koi urakng Yahudi.”

¹⁴ Paulus bodiritn honda' bopandir apo gubernur Galio lansukng monimbas sia'. Kato Galio, “Oi boko urakng Yahudi. Kaitn mombaba' urakng ni'in ko aku pakai' diadili. Aman io molanggar hukupm Romawi damo molabuhan kojahatan inyo bukainyo, aku ulih sabar mondinga' pongaduan kaitn.

¹⁵ Apo ni'in bayo mosalah pomandiran, kata'an mosalah namo, kata'an mosalah hukupm kaitn ja'. Biar kaitn mourus siku' mosalah ni'in. Aku co honda' moadili mosalah sama'an ni'in.”

¹⁶ Ongko Galio monundukng sia' doi' ruakng pongadilan nantai.

¹⁷ Watu nantai, sia' somuo monangkap kopala' rumah sombayakng agama Yahudi. Damonyo Sostenes. Io dipodularan di tongah-tongah ruakan pongadilan nantai. Apo Galio samo sokali kinyo poduli.

Paulus bobali' ko Antiokhia, ibu kota di propinsi Siria

¹⁸ Lopas nantai, Paulus monotap cukup manah di Korintus. Ongko, io pamit ko boko urakng inyo pocayo agatn Yesus di santai. Paulus botula' doi' santai samoan Priskila ongko Akwila. Sia' tuntukng di kota polabuhan Kengkrea. Di santai, Paulus mongguntikng rambutnyo obai io udah bonajar ko Tuhatn, jadi Paulus udah momonuhi janjinyo nantai. Lopasnyo nantai, sia' bolayar ko propinsi Siria.

^19-21 Pas sia' datakng di kota Efesus, Paulus mansu' ko rumah sombayakng. Io agatn boko urakng Yahudi di santai bopandir mongona'i Yesus. Sia' mominto io pakai' monotap lobih manah di su'utn. Apo io monula'. Katonyo, “Aman Allah moijitan, aku paca'an datakng agi' ko si'itn.” Jadi, io botula' noi' kapal, apo Priskila ongko Akwila totap tinggal di kota Efesus nantai.

²² Paulus turutn doi' kapal di kota Kaisarea. Ongko, io botula' ko Yerusalem. Io mombori' salapm ko jomaat di su'utn. Ongko, io molajuan pojalatan ko Antiokhia.

²³ Io pan monotap cukup manah di su'utn. Ongko, io botula' monjongu' agi' boko urakng pocayo di propinsi Galatia huatan Frigia. Io monulukng oca' boko somadikan nantai pocayo ko Yesus agatn lobih yakitn.

Apolos di Efesus

²⁴ Pontongahan Paulus di propinsi Galatia huatan Frigia, ado urakng inyo mongajar mongona'i Yesus di kota Efesus di propinsi Asia. Urakng nantai bodamo Apolos. Io nantai urakng Yahudi inyo boasal doi' Aleksandria ibu kota di nogori Mesir. Io pintar bopandir. Io pan udah banya' mompolajari Buku Suci.

²⁵ Io kalo diajari ajaran inyo bondar mongona'i Tuhatn Yesus. Io mongajar mongona'i Yesus agatn somangant huatan toliti. Apo, io bayo mongotohu'i baptisan Yohanes.

²⁶ Di kota Efesus Apolos mula'i mongajar agatn borani di rumah sombayakng agama Yahudi. Ongko, Priskila ongko Akwila mondinga' ajaran Apolos nantai kurakng longkap. Obai nantai, sia' mohundakng io ko rumah sia'. Di santai, sia' monjolasan ko io sorinci-rincinyo agi' ajaran Allah mongona'i kosolamant'an molalu'i Yesus.

²⁷ Boboropo watu lopas nantai, Apolos honda' botula' ko propinsi Akhaya. Jadi boko urakng pocayo di Efesus honda' monulukng io. Sia' monulis surat ko boko urakng pocayo di su'utn oca' io ditorima' agatn boi'. Di Akhaya, ado boko urakng inyo pocayo Yesus obai Allah monunju'an koboi'an-Nyo ko sia'. Watu Apolos sampai di su'utn, io sangant monulukng sia'.

²⁸ Io kotakan pandai botikakng agatn boko urakng Yahudi inyo kinyo pocayo agatn Yesus. Di hadapan urakng banya', io molawatn sia' agatn koras. Io hala mongalahan sia'. Io momakai Buku Suci pakai' mombutian obai Yesus nantai Rajo Inyo Dijanjian Allah.