Kisah Boko Rasul 17 - Porjanjian Boharu Torjomahan Baso Dilakng Soari-ari

Paulus ongko Silas di kota Tesalonika

¹ Doi' kota Filipi, Paulus ongko Silas bojalatn molalu'i kota Amfipolis huatan kota Apolonia. Ongko, sia' tuntukam ko Tesalonika, ibu kota propinsi Makedonia. Di kota nantai ado rumah sombayakng urakng Yahudi.

² Sama'an biaso, Paulus botula' ko rumah sombayakng nantai holu'ai. Di santai, io mongajar doi' Buku Suci. Somanah tigo minggu bojojurut, sotiap Ari Sabat Paulus agatn sia' bopandir mombahas Buku Suci di santai.

³ Io monunju'an boko bagian doi' Buku Suci mongona'i Rajo Inyo Dijanjian Allah. Io monjolasan obai Rajo nantai gola' ajab sonsaro ongko mati. Apo, Rajo nantai paca'an bobali' hidup. Ongko Paulus bopandir, “Aku momboritoan ko kaitn mongona'i Yesus. Sio nantai Rajo Inyo Dijanjian Allah.”

⁴ Sobagi'an urakng Yahudi doi' kota nantai monjadi pocayo ongko monjadi pongikut Yesus samo sama'an Paulus agatn Silas. Ado jam boko urakng Yunani inyo doholu udah monjadi urakng inyo pocayo ko Allah. Cukup banya' doi' sia' monjadi pocayo ko Yesus. Banya' botina' inyo pontikng pan monjadi pocayo ko Yesus jam.

⁵ Apo ado boko urakng Yahudi bukainyo monjadi tungian obai banya' doi' sia' bopihak ko Paulus agatn Silas daripado ko sia'. Jadi, sia' mongumpulan boko golandakan jahat inyo co bogota'-bokorojo di pasar. Bosamo gorombolan nantai, sia' bulah korusuhan bosar di kota nantai. Sia' monggoyapi Paulus agatn Silas oca' boko urakng molawatn sia' duo nantai. Jadi, sia' monyorakng rumah Yason, obai Paulus agatn Silas bujakan di rumahnyo.

⁶ Apo sia' kinyo botomu Paulus agatn Silas di santai. Jadi, sia' monangkap Yason agatn boboropo urakng pocayo jam. Sia' momoso mombaba' Yason agatn boboropo urakng nantai ko boko pojabat kota. Sia' bopandir kotakan borakng, “Ado duo urakng inyo udah mongacauan boko kota di mono-mono. Watu ni'in, duo urakng nantai ado di kota kito jam!

⁷ Yason ni'in udah monorima' sia' duo di rumahnyo. Sia' somuo molanggar boko porintah Kaisar negara Roma, ponguaso totinggi negara ni'in. Sia' momandiran obai ado Rajo bukai. Damonyo Yesus.”

⁸ Timpu mondinga' pomandiran sia' nantai, urakng banya' huatan boko pojabat kota nantai monjadi godi.

⁹ Boko pojabat kota nantai momoso Yason ongko boko somadikan nantai moonji'i duit sobagai jaminan. Lopas nantai, sia' dilopasan.

Paulus ongko Silas di kota Berea

¹⁰ Pado malapm nantai, boko somadikan di santai hagar monyiuh Paulus ongko Silas botula' ko kota Berea. Di su'utn, sia' duo botula' ko rumah sombayakng urakng Yahudi.

¹¹ Boko urakng Yahudi di Berea bobeda doi' boko urakng Yahudi di Tesalonika. Boko urakng Yahudi di Berea nantai lobih mudah monorima' ajaran Paulus ongko Silas. Sia' sobobondarnyo honda' tohu ajaran mongona'i Yesus nantai memang bondar kata'an cado. Jadi, sotiap ari sia' monyolidiki Buku Suci.

¹² Banya' doi' boko urakng Yahudi nantai monjadi pocayo agatn Yesus. Sama'an nian jam agatn boko urakng Yunani monjadi pocayo, boi' boko botina' inyo pontikng huatan boko lolaki.

¹³ Apo boko urakng Yahudi di Tesalonika mondinga' mongona'i Paulus di Berea. Sia' mondinga' obai Paulus tongahan monyampaian borito doi' Allah mongona'i Yesus di kota nantai jam. Jadi, sia' pan botula' ko su'utn huatan monjahai'an Paulus.

¹⁴ Obai nantai, boko urakng pocayo di su'utn hagar moonju'an Paulus ko doerah pantai lout. Apo Silas ongko Timotius totap tinggal di Berea.

¹⁵ Boko urakng doi' Berea nantai moonju'an Paulus sampai ko kota Atena. Lopas nantai sia' bobali' ko Berea. Paulus boposatn ko sia' oca' Silas ongko Timotius hohagar mombodapan io.

Paulus di kota Atena

¹⁶ Jadi, Paulus monanti kodatakan Silas ongko Timotius di kota Atena. Pas io moniant di kota nantai ado banya' bondar lompatukng boko duato. Hal nantai mombulah hatinyo kotakan salu'.

¹⁷ Obai nantai, io opat mansu' ko rumah sombayakng urakng Yahudi. Di santai, io bopandir mongona'i Yesus bosamo boko urakng Yahudi huatan boko urakng inyo bukainyo urakng Yahudi jam inyo komai udah monjadi urakng inyo pocayo ko Allah. Kinyo bayo nantai, opat jam io ko pasar pakai' bopandir mongona'i Yesus ko sopo ja' inyo kotomuan di santai.

¹⁸ Ongko boboropo urakng Yunani inyo pintar-corodi' nantai mula'i botikakng agatn io. Ado inyo doi' kolompok Epikuros. Ado jam doi' kolompok Stoa. Sobagi'an sia' bopandir mongona'i Paulus. Kato sia', “Pomandiran urakng budu nantai kinyo mansu' akal.” Apo inyo bukai bopandir, “Ruponyo io bopandir mongona'i boko duato inyo bolupm kito konal.” Sia' momandiran nantai obai Paulus momboritoan Kabar Boi' mongona'i Yesus huatan sama'an apo boko urakng ulih bobali' hidup doi' komatian.

¹⁹ Ongko boko guru agama doi' Yunani nantai mombaba' Paulus mohadap ko potomuan boko pojabat kota nantai. Damo kolompok pojabat kota nantai disobut Areopagus. Di santai sia' bopandir, “Tulukng jolasan ko koi mongona'i ajaran boharu inyo kolai sampaian nantai.

²⁰ Koi udah mondinga' ajaran kolai. Ajaran nantai nongkonyant'i koi. Jadi, koi honda' tohu lobih jolas mongona'i roti ajaran nantai.”

²¹ (Ubonyo, boko urakng Atena huatan boko urakng pondatakng gala' mohabisan watu bayo pakai' mombahas agatn mondinga'an boko hal inyo boharu).

²² Jadi, Paulus bodiritn di hadapan urakng banya' di Areopagus nantai. Katonyo, “Boko urakng Atena, aku moniant kaitn somombondarnyo monyombah boko duato.

²³ Aku udah bojojalatn di kota ni'in. Aku moniant banya' tompat monyombah boko duato kaitn. Ado sobuti' mesbah tompat molota'an posombahan jam agatn tulisan ni'in: ‘Pakai' monyombah duato inyo bolupm dikonal.’ Kaitn bolupm mongonal Sio, apo totap monyombah Sio. Aku moajaran mongona'i Sio nantai.

²⁴ Sioam Allah inyo bulah dunia ni'in agatn somuo tontanaman, bonatakng ongko monsio inyo bodiapm di dalapmnyo. Sioam Tuhatn inyo umputn langit ongko bumi. Jadi, Sio kinyo bodiapm dalapm boko tompat inyo dipulah ulih monsio.

²⁵ Sio kinyo kokurakan la'apo pan. Jadi, Sio kinyo minto potulukan monsio. Malah sobali'nyo. Sio nam inyo moonji'i hidup, kosih, ongko somuo hal ko somuo monsio.

²⁶ Mulonyo, Allah mombulah siku' urakng. Doi' urakng nantai, Allah udah monjadian somuo banso di bumi. Sio udah monontuan kodiapan huatan monontuan boko musipm ko sotiap banso.

²⁷ Allah molabuhan somuonyo nantai oca' sia' paca'an bousaha monggoyapi Sio. Sio boharap sia' paca'an monggoyapi Sio huatan monomuan-Nyo. Apo, sobondarnyo Sio kinyo jouh doi' kito siku'-monyiku'.

²⁸ Obai Sio inyo moonji'i hidup ko kito, bulah kito mampu bogora' huatan moijitan kito ado di bumi. Samo sama'an ponulis puisi urakng kaitn inyo mangatoan, ‘Kito somuo ni'in boko koturutan-Nyo.’

²⁹ Obai kito nantai ‘koturutan-Nyo,’ jadi jangan bopikir Allah nantai sosuatu inyo dipulah doi' omas, pira' damo batu. Somuo bando nantai dirancakng huatan dipulah ulih monsio mo.

³⁰ Timpu joman komai, ado boko banso inyo kinyo mongotohu'i caro pakai' monyombah Allah. Jadi, Allah kinyo lansukng mohukupm sia' obai boko kosalahannyo. Apo ni'in Sio porintahan somuo urakng di mono-mono gola' moninggalan dosa huatan monyonangan hati Sio.

³¹ Kito gola' moninggalan dosa obai Allah paca'an mohakipi somuo urakng agatn adil. Sio udah monontuan sombilo ponghakipan nantai paca'an tojadi. Sio jam udah momilih siku' Urakng pakai' monjadi Hakipm. Allah mombutian somuo nantai agatn caro mombulah Urakng nantai bobali' hidup doi' komatian.”

³² Timpu boko urakng nantai mondinga' Paulus bopandir obai ado Urakng inyo kalo bobali' hidup doi' komatian, ado di antaro sia' inyo boulu'an Paulus. Apo inyo bukai bopandir, “Hobu'-luso cam, koi mondinga'an kolai bopandir agi' mongona'i hal ni'in.”

³³ Ongko, Paulus moninggalan sia'.

³⁴ Apo ado boboropo urakng mongopal ko Paulus huatan pocayo agatn Yesus. Sia' monjadi pocayo agatn Yesus. Tomansu' salah siku' pojabat kota doi' Areopagus nantai. Damonyo Dionysius. Ado jam siku' urakng botina' bodamo Damaris, huatan boboropo urakng bukai.