Kisah Boko Rasul 16 - Porjanjian Boharu Torjomahan Baso Dilakng Soari-ari

Timotius tuyut Paulus ongko Silas dalapm polayatan

¹ Paulus ongko Silas botula' ko kota Derbe ongko ko kota Listra. Di Listra ado Timotius. Io udah pocayo agatn Yesus. Indainyo urakng Yahudi inyo udah pocayo agatn Yesus, apo bopainyo urakng Yunani.

² Somuo urakng inyo pocayo Yesus di Listra ongko Ikonium mongatoan obai Timotius nantai urakng boi'.

³ Paulus honda' oca' Timotius pan tuyut sia'. Apo somuo urakng di doerah nantai udah tohu obai Bopai Timotius urakng Yunani. Obai nantai, Paulus monyiuh oca' Timotius disunant oca' boko urakng Yahudi di doerah nantai ulih monorima' io.

⁴ Jadi, Paulus, Silas ongko Timotius botula' doi' kota ko kota bukai mondataki boko jomaat di doerah nantai. Sia' monyampaian koputusan boko rasul huatan boko ponotua' doi' Yerusalem. Sia' monosihat'i boko jomaat oca' koputusan nantai dituruti.

⁵ Agatn caro nantai, boko jomaat monjadi lobih kuat pocayo ko Yesus. Mongkitn manah mongkitn banya' urakng monjadi pocayo agatn Yesus.

Roh Allah moirikan Paulus ko doerah Makedonia

⁶ Lopas nantai, Paulus, Silas ongko Timotius botula' ko doerah Frigia huatan doerah Galatia. Sobondarnyo sia' honda' momboritoan Kabar Boi' ko doerah Asia. Apo Roh Allah morarakng sia'.

⁷ Sia' pan tuntukng di porbatasan doerah Misia. Doi' su'utn, sia' honda' botula' ko doerah Bitinia. Apo, sokali agi' Roh Yesus morarakng sia'.

⁸ Jadi, sia' bojalatn torus molalu'i doerah Misia tuntukng di kota Troas.

⁹ Pado malapm arinyo, Paulus ado poniant'an. Io moniant siku' urakng doi' doerah Makedonia. Urakng nantai bodiritn kapikng momuhun ko Paulus. Katonyo, “Tulukng datakng ko Makedonia pakai' monulukng koi!”

¹⁰ Doi' poniant'an nantai, koi monyimpulan obai Allah moningkau koi pakai' momboritoan Kabar Boi' ko boko urakng Makedonia. Jadi, koi lansukng bogoyap tumpakan inyo botula' ko su'utan.

Paulus di kota Filipi di doerah Makedonia Lidia monjadi pocayo ko Yesus (16:11-15)

¹¹ Ongko, koi botula' doi' Troas, bolayar ko pulau Samotrake. Kohobu'annyo, koi ko kota Neapolis.

¹² Doi' su'utn, koi ko kota Filipi. Kota Filipi nantai tomansu' kota inyo pontikng di doerah Makedonia. Kota nantai jajahan urakng Roma. Koi tinggal di su'utn boboropo ari.

¹³ Pado Ari Sabat, koi bogoyap tompat urakng Yahudi bokumpul pakai' bodoa. Koi bopikir tompat nantai ado di luar kota. Jadi, koi botula' ko luar pintu gerbakng kota nantai ongko ko pinggir sungai. Ado boko botina' udah bokumpul di santai. Koi dudu' ongko bopandir agatn sia'.

¹⁴ Salah siku' doi' sia' nantai ponjual koitn ungu inyo mahal. Damonyo Lidia. Io boasal doi' kota Tiatira. Io nantai bukai urakng Yahudi apo udah monjadi urakng inyo pocayo agatn Allah. Watu Paulus mongajar boko botina' nantai, Tuhatn bulah hati Lidia monorima' ajaran Paulus. Jadi, io pocayo ajaran Paulus mongona'i Yesus.

¹⁵ Io huatan somuo urakng inyo bodiapm di rumahnyo dibaptis. Ongko, Lidia mohundakng koi ko rumahnyo. Katonyo, “Aman kaitn moanggap obai aku bondar-bondar pocayo ko Tuhatn Yesus, huncapm bujakng ko rumah aku.” Obai io monyosahan, jadi koi monorima' tawarannyo nantai.

Paulus ongko Silas dimansu'an ko ponjara (16:16-24)

¹⁶ Timpu ari inyo bukainyo, koi botula' agi' ko tompat bodoa nantai. Dalapm pojalatan ko su'utn, koi botomu siku' urakng hulutn botina'. Hulutn botina' nantai udah dikuaso'i ulih roh potonung. Roh potonung nantai bulah hulutn botina' nantai ulihnyo botonungan la'apo inyo paca'an tojadi nononyo ko boko urakng inyo minto potonungan. Obai nantai am boko habakngnyo nantai mondapat kountukan inyo bosar.

¹⁷ Botina' nantai hala bojalatn di bolikat koi agatn Paulus, kapikng mondongkakng-mondorah. Katonyo, “Boko urakng ni'in Polayatn Allah inyo Maho Tinggi! Sia' momboritoan ko kito mongona'i jalatn kosolamant'an!”

¹⁸ Boari-ari tumbas io molabuhan nantai timpu botomu agatn Paulus. Koponsuahannyo, Paulus kinyo tahatn agi' obai ganggu'an nantai. Jadi, Paulus mongilikng ko bolikat. Katonyo ko roh potonung nantai, “Dalapm damo Yesus Kristus, aku tundukng kolai ko luar doi' botina' ni'in!” Lansukng roh jahat nantai koluar.

¹⁹ Boko habakng botina' nantai moniant obai sia' co paca'an mondapat'an kountukan agi' doi' pogota'an io. Obai nantai, boko habakng nantai monangkap Paulus ongko Silas, ongko mombaba' sia' duo ko boko pojabat kota di tompat potomuan umum di pasar.

²⁰ Boko habakng nantai bopandir ko boko pojabat, “Boko urakng ni'in urakng Yahudi. Sia' bulah unar di kota kito.

²¹ Sia' jam moajaran boko adat urakng Yahudi. Apo kito ni'in warga negara Roma. Jadi, kito co ulih sonjumpat'an boko adat sia'.”

²² Ongko urakng banya' pan tuyut monggodi'i Paulus ongko Silas. Boko pojabat nantai monyiuh oca' pakai'an sia' duo dibirat-birat doi' bukakng sia'. Ongko, boko pojabat nantai momorintahan oca' Paulus ongko Silas dipoduda'an pakai' tungkah.

²³ Opat sia' dipantu' kotakan kuat. Ongko, sia' dimansu'an ko dalapm ponjara. Boko pojabat kota monyiuh kopala' ponjara oca' monjago sia' agatn ketat.

²⁴ Obai porintah nantai, ongko kopala' ponjara momansu'an Paulus ongko Silas ko dalapm ruakan palikng di tongah-tongah. Kaki sia' pan dikopih kotakan kuat di antaro duo balok kayu inyo dipulah bolubakng.

Kopala' ponjara huatan koluarganyo monjadi pocayo agatn Yesus (16:25-34)

²⁵ Pas tongah malapm, Paulus ongko Silas tongahan bodoa huatan bonyanyi puji-pujian ko Allah. Somuo tahatan inyo bukai mondinga'an sia'.

²⁶ Ntobukan ado gompa bumi. Gompa bumi nantai kotakan kuat sampai pondasi ponjara nantai toguyakng. Lansukng somuo lawakng ponjara nantai tobuka'. Sotiap rantai tolopas doi' somuo tahatan di santai.

²⁷ Lopas nantai, kopala' ponjara nantai tohuas. Io moniant obai boko lawakng ponjara nantai udah tobuka'. Io bopikir somuo tahatan udah morarian diri. Jadi, io moncabut podakngnyo pakai' bunuh diri.

²⁸ Apo Paulus bopandir ko io agatn saro borakng, “Jangan kolai bunuh diri! Koi somuo ija' ada'an di si'itn.”

²⁹ Kopala' ponjara nantai monyiuh hulutnnyo monguti' obor. Ongko, sia' bonggidi'an mansu' ko dalapm. Kopala' ponjara topogola', io bogogora' ongko tokodudu' di hadapan Paulus ongko Silas.

³⁰ Lopas nian, io moonju'an sia' duo ko luar. Io botakutn, “Boko habakng, la'apo inyo gola' aku labuhan oca' aku disolamant'an?”

³¹ Kato sia', “Pocayocam ko Tuhatn Yesus, ongko kolai paca'an disolamant'an. Ubo nian jam soharusnyo dilabuhan ulih somuo urakng inyo tinggal di dalapm rumah kolai.”

^32-34 Kopala' ponjara nantai mombaba' sia' duo ko rumahnyo. Io momborosihi boko luko sia', moonji'i sia' pomakatn. Ongko, Paulus ongko Silas monyampaian pomandiran Tuhatn Yesus ko io huatan somuo urakng inyo bodiapm di rumahnyo. Pado malapm nantai jam, kopala' ponjara huatan somuo urakng inyo bodiapm di rumahnyo dibaptis. Kopala' ponjara nantai kotakan rindakng obai sia' somuo pocayo ko Allah.

Paulus ongko Silas dibebasan doi' ponjara (16:35-39)

³⁵ Sunsukng kohobu'annyo, boko pojabat moutus boboropo potugas koamanan kota ko kopala' ponjara nantai. Boko potugas nantai momadahan ko io oca' Paulus huatan Silas dibebasan.

³⁶ Kopala' ponjara monyampaian nantai ko Paulus. Katonyo, “Boko pojabat udah monyiuh oca' kaitn duo dibebasan. Jadi, ni'inan kaitn ulih koluar. Botula' cam agatn solamant.”

³⁷ Apo Paulus bopandir ko boko potugas inyo datakng, “Boko pojabat kota ni'in udah monyiuh oca' koi dipoduda'an di muka' umum. Sia' momansu'an koi ko dalapm ponjara. Apo, sia' co moadili koi doholu, obai koi warga negara Roma! Ni'inan sia' honda' koi botula' socaro bototapu'. Co mungkitn! Biar sia' siku' datakng ko si'itn ongko mongoluaran koi koluar doi' ponjara!”

³⁸ Boko potugas nantai botula' molaporan pomandiran Paulus ko boko pojabat nantai. Watu sia' mondinga' obai Paulus ongko Silas nantai warga negara Roma, sia' monjadi gola' kona' hukupan.

³⁹ Jadi, boko pojabat nantai datakng ongko momuhun maap ko Paulus ongko Silas. Lopas nantai, sia' moonju'an Paulus ongko Silas ko luar ponjara nantai. Sia' mominto oca' sia' duo moninggalan kota nantai.

Paulus ongko Silas monosihat'i boko urakng pocayo di kota Filipi (16:40)

⁴⁰ Lopas nantai, Paulus ongko Silas botula' doi' ponjara ko rumah Lidia. Sia' bokumpul agatn boko somadikan di kota nantai. Paulus ongko Silas monosihat'i sia' oca' totap pocayo ko Yesus. Lopas nantai, sia' botula' doi' kota nantai.