Kisah Boko Rasul 15 - Porjanjian Boharu Torjomahan Baso Dilakng Soari-ari

Potomuan di Yerusalem pakai' mombahas mongona'i sunant

¹ Timpu Paulus ongko Barnabas ija' ado di kota Antiokhia nantai, ado boboropo urakng doi' doerah Yudea datakng. Boboropo urakng nantai mula'i mongajar boko urakng inyo pocayo agatn Yesus. Kato sia', “Pado joman komai, Musa moajaran poraturan Allah. Sotiap urakng dalapm umant Allah gola' disunant. Jadi, kaitn urakng inyo bukainyo Yahudi gola' monuruti poraturan nantai, samo sama'an urakng Yahudi. Aman cado, kaitn co paca'an disolamant'an.”

² Apo Paulus ongko Barnabas kotakan kinyo sotuju agatn ajaran boko urakng nantai. Nontu sia' botikakng mongona'i mosalah nantai. Obai nantai, Paulus ongko Barnabas huatan boko urakng bukai diutus ko kota Yerusalem. Sia' diutus pakai' mombahas mosalah sunant nantai agatn boko rasul Yesus huatan boko ponotua' di Yerusalem.

³ Jadi jomaat di Antiokhia nantai moonju'an sia' sampai ko luar kota. Ongko sia' molajuan pojalatan ko Yerusalem. Sia' molalu'i doerah Fenisia ongko Samaria. Di boko doerah nantai, sia' mongisahan ko boko urakng pocayo di santai, obai banya' urakng inyo bukainyo Yahudi udah monjadi pocayo agatn Yesus. Borito nantai monyonangan hati boko urakng pocayo di santai.

⁴ Lopas nantai, Paulus ongko Barnabas huatan kolompok urakng doi' Antiokhia tuntukng ko Yerusalem. Sia' duo ditorima' agatn boi' ulih somuo jomaat tomansu' boko ponotua' jomaat huatan boko rasul. Paulus ongko Barnabas mongisahan somuo inyo udah Allah labuhan dalapm polayatan sia' ko boko urakng bukainyo Yahudi.

⁵ Apo ado boboropo urakng inyo pocayo agatn Yesus inyo komainyo pomimpitn agama Yahudi doi' kolompok Farisi. Sia' bopandir, “Boko urakng pocayo inyo bukainyo urakng Yahudi gola' disunant samo sama'an urakng Yahudi. Kito gola' monyiuh sia' pakai' monaati somuo poraturan inyo ditulis Musa.”

⁶ Lopasnyo, boko rasul huatan boko ponotua' bokumpul pakai' pokaro mosalah nantai.

⁷ Manah bondar sia' mombahas mosalah nantai. Lopas nantai, rasul Petrus bodiritn. Katonyo, “Boko somadikan! Kaitn tohu obai Allah udah momilih aku doi' antaro kaitn. Boboropo watu inyo komai, Allah momilih aku pakai' momboritoan Kabar Boi' ko boko urakng inyo bukainyo urakng Yahudi. Allah molabuhan nantai oca' sia' ulih mondinga' ongko monjadi pocayo agatn Yesus.

^8-9 Allah mongotohu'i isi hati sotiap urakng. Allah co monyoropihi antaro kito urakng Yahudi agatn sia' inyo bukainyo urakng Yahudi. Sia' pocayo ko Yesus. Agatn caro nantai, Allah bulah hati sia' borosih ubo nian jam hati kito diborosihi. Komainyo Allah moonji'i Roh-Nyo ko kito. Allah pan udah moonji'i Roh-Nyo ko boko urakng inyo bukainyo urakng Yahudi inyo pocayo agatn Yesus. Nanam caronyo Allah monunju'an obai Sio monorima' sia', co nyiant caro bukai.

¹⁰ Jadi, aman nian kohonda' Allah, jangan molawatn Sio. Jangan momoso boko urakng bukai Yahudi oca' monaati somuo porintah ongko poraturan Allah inyo ditulis Musa dalapm buku Hukupm Torat. Hal nantai samo sama'an momoso sia' pakai' momikul bobatn inyo borat dipikul. Angki-bayatn kito huatan kito siku' pan co mampu molabuhan somuo poraturan nantai.

¹¹ Apo, kito pocayo obai Tuhatn Yesus monyolamant'an kito agatn koboi'an hati Siobukainyo obai kito monaati poraturan agama. Nanam caro boko urakng inyo bukainyo urakng Yahudi disolamant'an jam.”

¹² Somuo urakng di santai pan kotakan langunt ongko mondinga'an Paulus ongko Barnabas bopandir. Paulus ongko Barnabas mongisahan somuo mujisat inyo udah Allah labuhan dalapm polayatan sia' ko boko urakng inyo bukainyo urakng Yahudi.

¹³ Lopas sia' duo jadi bopandir, hoyu' Yakobus bopandir. Katonyo, “Boko somadikan, dinga'anbo aku.

¹⁴ Simon Petrus udah mongisahan pongalapannyo komai. Io mongisahan caro Allah monunju'an koboi'an ko boko banso bukai. Allah momilih boko urakng doi' antaro sia' oca' monjadi umant-Nyo.

¹⁵ Pado joman komai, boko nabi udah monulis mongona'i boko urakng inyo bukainyo urakng Yahudi monjadi umant Allah. Ado nabi monulis pomandiran Allah sama'an ni'in:

¹⁶ ‘Koraja'an Daud udah runtuh. Apo, Aku paca'an bobali'. Aku paca'an moninjakan agi' koraja'an nantai. Aku paca'an bulah koraja'an nantai lobih kuat agi'.

¹⁷ Aku paca'an molabuhan nantai oca' boko urakng bukai datakng monggoyapi Aku. Aku udah momilih doi' boko urakng inyo bukainyo urakng Yahudi pakai' monjadi umant-Ku. Sia' paca'an datakng ko Aku jam. Aku, Tuhatn, udah momandiran ni'in. Pasti, Aku paca'an molabuhan somuonyo ni'in.’

¹⁸ Tangga'i joman komai, Aku udah momadahan somuonyo ni'in.”

¹⁹ “Jadi, Boko somadikan, udah jolas Allah momilih boko urakng doi' boko banso bukai Yahudi huatan sia' udah datakng ko Allah. Obai nantai monurut pondapatku, jangan kito monambah bobatn ko sia'.

²⁰ Apo, soharusnyo kito monulis surat ko sia'. Kito momadahan ko sia' oca' jangan momporajoan. Jangan momua'i pomakatn inyo diposombahan ko boko duato. Jangan momua'i isi lou' inyo mati dikoci'. Jangan momua'i darah.

²¹ Soboi'nyo sia' disiuh monaati boko larakan nantai. Obai, tangga'i joman komai boko poraturan inyo ditulis Musa diboritoan di somuo kota. Sampai watu ni'in pan ija' dibacoan sotiap Ari Sabat di boko rumah sombayakng.”

Surat ko boko urakng bukainyo Yahudi inyo pocayo agatn Yesus

^22-23 Boko rasul, boko ponotua' huatan somuo boko urakng inyo pocayo agatn Yesus monorima' nosihat Yakobus. Sia' momutusan pakai' monulis surat ko boko urakng bukai Yahudi inyo pocayo agatn Yesus. Sia' momilih boboropo urakng doi' antaro sia' pakai' monyampaian surat nantai. Boko urakng nantai paca'an botula' ko kota Antiokhia bosamo Paulus ongko Barnabas. Jadi, sia' momilih Silas ongko Yudas (inyo disobut Barsabas). Koduo urakng nantai pomimpitn inyo dihormati di antaro boko urakng inyo pocayo agatn Yesus di Yerusalem. Surat inyo sia' sampaian, dinga' ni'innan bunyinyo: “Salapm ko boko somadikan inyo bukai Yahudi di kota Antiokhia, di propinsi Siria, di propinsi Kilikia. Hormat doi' koi, boko somadikan kaitn di kota Yerusalem. Koi boko rasul huatan boko ponotua'

²⁴ udah mondinga' borito doi' Paulus, Barnabas huatan urakng bukai inyo kaitn utus ko koi. Koi mondinga' ado boko urakng doi' antaro koi inyo datakng ko kaitn. Apo, koi kinyo moutus sia' nantai. Sia' mongajar kaitn gola' disunant aman honda' disolamant'an. Ajaran sia' nantai mombingungan kaitn, bulah hati kaitn gangga'-gua'an.

²⁵ Obai nantai, koi somuo agatn sohati bulah koputusan pakai' moutus boboropo urakng ko kaitn. Sia' nantai botula' bosamo koduo somadikan inyo kito kasihi, ia'an Barnabas ongko Paulus.

²⁶ Barnabas ongko Paulus molayati Tuhatn inyo monguaso'i hidup kito, ia'an Yesus Kristus. Biar pan sia' diancapm paca'an dibunuh, apo sia' totap molayati Yesus.

²⁷ Jadi koi udah moutus Yudas ongko Silas pakai' monyampaian huatan momandiran surat ni'in ko kaitn.

²⁸ Koi inyo diirikan Roh Allah udah bulah koputusan ni'in: Kaitn kinyo gola' diposo monaati somuo poraturan agama Yahudi. Apo ado boboropo doi' poraturan nantai inyo pontikng ditaati.

²⁹ Ia'an, jangan momporajoan. Jangan momua'i pomakatn inyo diposombahan ko boko duato. Jangan momua'i dagikng bonatakng inyo mati dikoci'. Jangan momua'i darah. Aman kaitn monaati poraturan nantai, kaitn bulah koboi'an. Singgo ni'inam surat koi. Salapm ko somuo somadikan.”

³⁰ Jadi, rombokan urakng inyo diutus momandiran salapm porpisahan ongko botula' ko Antiokhia. Di kota nantai, sia' minto oca' somuo urakng inyo pocayo ko Yesus bokumpul. Ongko, utusan nantai monyampaian surat nantai ko sia'.

³¹ Jadi, surat nantai dibaco. Boko urakng nantai rindakng bondar obai pomandiran dalapm surat nantai bulah hati sia' tokongkanti'i.

³² Yudas ongko Silas kododuo sia' nabi jam. Jadi, sia' opat monosihat'i boko somadikan di su'utn. Yudas ongko Silas monulukng boko somadikan oca' pocayo ko Yesus lobih kuat.

³³ Yudas ongko Silas monotap manah di bonuo nantai. Lopas nian, sia' duo diutus jomaat di Antiokhia pakai' pulakng ko jomaat di Yerusalem agatn lindukan Tuhatn.

³⁴ Apo Silas momutusan pakai' tinggal di su'utn mo.

³⁵ Apo Paulus ongko Barnabas ija' manah monotap di Antiokhia. Sia', bosamo agatn banya' urakng bukai, momboritoan ongko moajaran mongona'i boko pomandiran Tuhatn Yesus.

Paulus ongko Barnabas Bosongkayo

³⁶ Boboropo watu lopas nian, Paulus bopandir ko Barnabas, “Mara kito duo bobali' ko boko somadikan di sotiap kota inyo kalo kito dataki komai. Kito udah momboritoan mongona'i boko pomandiran Tuhatn Yesus di su'utn. Jadi, soboi'nyo kito moniant sama'an la'apo koadaan kopocaya'an sia'.”

³⁷ Barnabas sotuju, apo io honda' oca' Yohanes (inyo jam disobut Markus) tuyut bosamo sia' agi'.

³⁸ Apo Paulus kotakan kinyo sanggup mombaba' io obai komai io co molajuan polayatan sia' sampai jadi huatan moninggalan sia' di doerah Pamfilia.

³⁹ Jadi, ado potikakan inyo bosar antaro Paulus ongko Barnabas. Obai nantai, sia' bosongkayo. Barnabas mombaba' Markus, jumpat kapal ko pulau Siprus.

⁴⁰ Apo Paulus momilih botula' samoan Silas. Boko somadikan di Antiokhia bodoa pakai' sia' duo oca' Tuhatn momborokati sia' dalapm polayatan.

⁴¹ Paulus ongko Silas botula' mondataki boko kota di propinsi Siria huatan Kilikia. Di su'utn, sia' duo monulukng boko somadikan oca' pocayo agatn Yesus lobih kuat.