Kisah Boko Rasul 14 - Porjanjian Boharu Torjomahan Baso Dilakng Soari-ari

Paulus ongko Barnabas momboritoan Kabar Boi' di kota Ikonium

¹ Paulus ongko Barnabas tuntukng di kota Ikonium. Di kota nantai sia' botula' ko rumah sombayakng agama Yahudi doholu, samo sama'an inyo udah sia' labuhan di kota Antiokhia. Di su'utn, sia' mongajar agatn caro luar biaso. Jadi, boko urakng Yahudi huatan boko urakng inyo bukainyo urakng Yahudi monjadi pocayo ko Yesus.

² Apo ado boko urakng Yahudi inyo kinyo pocayo. Sia' mohadu boko urakng bukainyo urakng Yahudi oca' kinyo pocayo jam. Jadi, boko urakng nantai kotakan godi agatn boko urakng inyo pocayo.

³ Apo, Paulus ongko Barnabas bodiapm cukup manah di su'utn. Agatn borani, sia' duo momboritoan Kabar Boi' mongona'i Tuhatn Yesus. Sia' duo bopandir biar pan urakng kinyo cucu' pakai' disolamant'an, apo Yesus totap monunju'an koboi'an hati-Nyo. Tuhatn Yesus moonji'i kuaso ko Paulus ongko Barnabas pakai' molabuhan bomacapm mujisat. Niannam caronyo Tuhatn mombutian obai somuo pomandiran sia' bondar.

⁴ Jadi, pondudu' kota nantai topisah monjadi duo kolompok. Ado inyo bopihak ko boko urakng Yahudi inyo kinyo pocayo, huatan ado inyo bopihak ko Rasul Paulus ongko Barnabas.

⁵ Boko urakng inyo molawatn Paulus ongko Barnabas, bohoupm agatn boko urakng Yahudi huatan boko pomimpitn sia' pakai' mondorako'i huatan monikapi Paulus ongko Barnabas agatn batu.

⁶ Apo sia' duo mondinga' mongona'i hajat nantai. Jadi, sia' morarian diri ko doerah inyo bukai. Sia' botula' ko doerah sokitar kota Listra huatan Derbe di doerah Likaonia.

⁷ Di doerah nantai sia' hala momboritoan Kabar Boi' mongona'i Yesus.

Paulus ongko Barnabas momboritoan Kabar Boi' di kota Listra

⁸ Di Listra nantai ado urakng lumpuh. Kakinyo lumpuh tangga'i lahir. Io kinyo kalo bojalatn.

⁹ Urakng lumpuh nantai dudu' bondinga'an pomandiran Paulus. Io pocayo ulih nyamanamobai kuaso Yesus. Jadi, watu Paulus moniant io, Paulus tohu io pocayo.

¹⁰ Agatn saro borakng Paulus bopandir, “Bodiritn totontakngcam!” Lansukng urakng lumpuh nantai moloncat bodiritn. Io uliham bojalatn.

¹¹ Banya' urakng moniant mujisat inyo dipulah Paulus nantai. Sia' mondorah pakai baso Likaonia. Kato sia', “Duo duato kito udah turutn doi' langit. Sia' datakng ko kito dalapm rupo duo urakng monsio.”

¹² Barnabas sia' sobut duato Zeus. Paulus sia' sobut duato Hermes obai io inyo biasonyo bopandir.

¹³ Kinyo jouh di luar kota nantai ado rumah tompat monyombah duato Zeus. Imam inyo molayati duato Zeus nantai datakng ko pintu gerbakng kota nantai. Io mombaba' posombahan boko sapi sabukan huatan boko karakan bunga. Io bosamo urakng banya' honda' momakai boko posombahan nantai pakai' monyombah koduo rasul nantai.

¹⁴ Apo Barnabas ongko Paulus mondinga' hal nantai. Jadi, watu nantai jam sia' duo mombirat-birat pakai'an sia'. Niannam tando obai sia' duo sangant kinyo honda' urakng bopikir sia' nantai boko duato. Ongko sia' bonggidi'an ko tongah-tongah urakng banya'. Sia' mondorah,

¹⁵ “Boko pokawalan, jangan kaitn molabuhan nantai. Koi bayo urakng biaso, samo ubo kaitn. Koi datakng ko si'itn pakai' momboritoan Kabar Boi' mongona'i Yesus ko kaitn. Koi honda' oca' kaitn ongkah monyombah Allah inyo hidup ja'am, bukainyo boko duato inyo kinyo boguno. Allah inyo bulah langit, bumi, lout ongko agatn somuo isinyo.

¹⁶ Di joman komai, Allah mombiaran somuo banso monuruti kohonda' hati siku'.

¹⁷ Apo sobondarnyo, Allah inyo moonji'i kaitn hujatn doi' langit. Allah inyo moonji'i pongulihan doi' boko tontanaman oca' kaitn ado pomakatn inyo cukup. Allah inyo bulah hati kaitn sonang. Allah moonji'i somuo koboi'an nantai ko kaitn oca' kaitn mongotohu'i obai Sio memang ado.”

¹⁸ Biar pan Paulus ongko Barnabas monjolasan nantai, urakng banya' nantai ija' honda' monyombolih boko sapi pakai' monyombah sia' duo. Paulus ongko Barnabas agatn uyuh jorih koponsuahannyo bohasil morarakng urakng banya' momposombahan posombahan nantai ko sia'.

¹⁹ Lopas nian boboropo urakng Yahudi doi' Antiokhia huatan Ikonium datakng ko santai. Sia' moyakit'an banya' urakng di kota Listra nantai oca' kinyo pocayo agatn pomandiran Paulus. Ongko sia' monikapm Paulus agatn batu pakai' mombunuh io. Watu sia' bopikir Paulus udah mati, sia' mombuakan bukakngnyo ko luar kota nantai.

²⁰ Apo ado boko urakng di kota Listra inyo udah mula'i pocayo ko Yesus. Sia' datakng huatan bodiritn mongoliliki Paulus. Watu nantai, Paulus bodiritn ongko mansu' agi' ko kota. Kohobu'annyo, io botula' ko kota Derbe bosamo Barnabas.

Paulus ongko Barnabas bobali' ko kota Antiokhia di doerah Siria

²¹ Di kota Derbe, Paulus ongko Barnabas momboritoan Kabar Boi'. Banya' urakng monjadi pocayo ko Yesus. Lopas nantai, sia' duo bobali' agi' ko boko kota inyo sia' dataki di doerah Galatia. Sia' bobali' ko Listra, Ikonium ongko Antiokhia di doerah Pisidia.

²² Di boko kota nantai, Paulus ongko Barnabas monguat'an hati boko urakng pocayo. Sia' duo moanjuran boko urakng nantai oca' totap pocayo agatn yakitn ko Yesus. Sia' bopandir, “Kito gola' moalapi kotakan banya' ajab sonsaro, oca' kito ulih hidup sonang dalapm Koraja'an Allah.”

²³ Paulus ongko Barnabas pan momilih boko pomimpitn pakai' sotiap kolompok urakng pocayo. Boko pomimpitn nantai dipilih doi' boko urakng inyo udah pocayo agatn Yesus, Tuhatninyo bokuaso dipucu' somuonyo. Paulus ongko Barnabas bodoa kapikng bopuaso oca' Tuhatn totap monjago somuo pomimpitn nantai.

²⁴ Jadi, Paulus ongko Barnabas bojalatn bobali' molalu'i doerah Pisidia. Lopas nantai, sia' sampai di doerah Pamfilia.

²⁵ Di doerah Pamfilia, ado kota Perga. Di kota nantai jam, sia' momboritoan Kabar Boi'. Ongko, sia' turutn ko polabuhan Atalia.

²⁶ Doi' santai, sia' noi' kapal bobali' ko kota Antiokhia inyo di doerah Siria. Komai, boko urakng pocayo di Antiokhia nantai inyo moutus Paulus ongko Barnabas ko boko tompat bukai pakai' momboritoan Kabar Boi'. Sia' pan bodoa oca' Allah momborokati Paulus ongko Barnabas dalapm pojalatan. Paulus ongko Barnabas udah monjadi'i polayatan nantai.

²⁷ Jadi, watu sia' tuntukng di Antiokhia, sia' mongumpulan boko urakng pocayo ko Yesus. Sia' duo mongisahan somuo inyo udah Allah labuhan dalapm polayatan sia'. Hususnyo, sia' mongisahan mongona'i Allah inyo moonji'i caro oca' banya' urakng inyo bukainyo urakng Yahudi monjadi pocayo ko Yesus.

²⁸ Paulus ongko Barnabas monotap manah bosamo agatn boko urakng pocayo di kota nantai.