Kisah Boko Rasul 13 - Porjanjian Boharu Torjomahan Baso Dilakng Soari-ari

¹ Di antaro boko urakng inyo pocayo Yesus di Antiokhia, ado boko nabi inyo monyampaian posatn Allah huatan boko pongajar inyo mongajar mongona'i Yesus. Sia' nantai Barnabas, Simeon (inyo jam disobut ‘Urakng Hitapm’), Lukius (inyo boasal doi' kota Kirene), Manahem (inyo dibosaran bososamo agatn Gubernur Herodes), ongko Saulus.

² Timpu, sia' bokumpul pakai' bopuaso huatan bodoa. Watu nantai, Roh Allah bopandir ko sia', “Aku momilih Barnabas ongko Saulus molabuhan polayatan husus pakai' molayati boko urakng di doerah bukai. Jadi, tugasan sia' duo pakai' molabuhan polayatan nantai.”

³ Sia' somuo bopuaso huatan bodoa agi'. Sia' molota'an jari ko Barnabas ongko Saulus kapikng bodoa mominto potulukan Allah, ongko monyiuh sia' duo botula' molabuhan polayatan nantai.

Barnabas ongko Saulus momboritoan Kabar Boi' di Pulau Siprus

⁴ Roh Allah mombimbikng Barnabas ongko Saulus doi' sobuah tompat ko tompat inyo bukai. Jadi, sia' botula' doi' kota Antiokhia ko polabuhan Seleukia. Doi' santai sia' bolayar ko polabuhan Salamis di pulau Siprus.

⁵ Yohanes (inyo jam disobut Markus) tuyut jam monulukng sia' dalapm polayatan. Watu sia' sampai di kota Salamis, sia' botula' ko boko rumah sombayakng agama Yahudi. Di sotiap rumah sombayakng nantai, sia' monyampaian Kabar Boi' doi' Allah mongona'i Yesus.

⁶ Ongko sia' monyomboraki pulau Siprus. Sia' mondataki somuo tompat di pulau nantai, sampai sia' datakng di Pafos, ibu kota Siprus. Di kota nantai sia' botomu siku' urakng boponohu. Io nantai pan nabi palsu. Io nantai urakng Yahudi. Damonyo Baryesus.

^7-8 Dalapm baso Yunani, urakng moningkaunyo Elimas. Elimas ni'in kawal gubernur pulau Siprus nantai inyo bodamo Serigius Paulus. Gubernur nantai urakng kotakan pintar-corodi'. Io honda' mondinga' Kabar Boi' doi' Allah mongona'i Yesus. Jadi, io moningkau Barnabas ongko Saulus. Apo Elimas monantakng sia' duo. Io bousaha oca' gubernur nantai kinyo pocayo agatn Yesus.

⁹ Apo Roh Allah ado monguaso'i Saulus inyo jam disobut Paulus. Io moncorona'i Elimas.

¹⁰ Katonyo, “Kolai ni'in ana' Rajo Sitatn! Kolai molawatn somuo inyo bondar! Kolai hala mongontumbuki ongko monipu urakng. Ajaran Tuhatn inyo bujur bondar. Apo kolai hala morubah ajaran Tuhatn monjadi ajaran salah! Jangan hala bulah lou' sama'an nian.

¹¹ Watu ni'in jam Tuhatn paca'an mohukupm kolai. Somanah boboropo watu inyo ditontuan Tuhatn, kolai paca'an monjadi buto. Torakng matoari pan, kolai co paca'an ulih moniantnyo.” Watu nantai jam Elimas monjadi buto. Io mooso dirinyo ado di dalapm potakng-hiru'. Io bojalatn bogahap. Io monggoyapi longan urakng bukai pakai' moirikannyo bojalatn.

¹² Gubernur moniant la'apo inyo tojadi nantai. Ongko, io monjadi pocayo agatn Yesus. Io topocongo agatn ajaran Paulus ongko Barnabas mongona'i Tuhatn Yesus.

Paulus momboritoan Kabar Boi' di kota Antiokhia

¹³ Doi' kota Pafos nantai, Paulus huatan boko pokawalannyo bolayar ko polabuhan Perga, ibu kota doerah Pamfilia. Di santai, Yohanes Markus moninggalan sia'. Io bobali' agi' ko Yerusalem.

¹⁴ Doi' Perga, Paulus ongko Barnabas botula' ko kota Antiokhia, di doerah Pisidia. Watu ari Sabat, sia' mansu' ko rumah sombayakng agama Yahudi ongko dudu' di santai.

¹⁵ Sama'an biaso ado urakng inyo mombaco doi' boko poraturan Allah inyo ditulis Musa dalapm Hukupm Torat. Ado jam inyo mombaco doi' boko buku inyo ditulis boko nabi. Lopas nantai, boko pomimpitn rumah sombayakng nantai monyiuh urakng monyampaian posatn ko Paulus ongko Barnabas. Kato sia', “Mungkitn boko somadikan ado posatn pakai' monguat'an hati somuo koi di si'itn. Aman ado, pandiran ja'am.”

¹⁶ Jadi, Paulus bodiritn ongko moonji'i kode agatn jarinyo obai io honda' bopandir. Katonyo, “Boko urakng Yahudi huatan boko urakng bukainyo urakng Yahudi udah pocayo ko Allah. Dinga'anbo!

¹⁷ Pado joman komai, Allah banso Israel udah momilih angki-bayatn kito pakai' monjadi umant-Nyo. Sia' nantai urakng pondatakng somanah sia' bodiapm di Mesir. Apo, Allah bulah sia' monjadi banso inyo bosar jumlahnyo. Ongko, agatn kuaso-Nyo inyo bosar, Sio mombaba' sia' koluar doi' hulutn-pacal di Mesir nantai.

¹⁸ Lopas nantai, somanah ompat puluh tohutn sia' bodiapm di padakng pasir. Somanah nantai, sia' opat molawatn Allah. Apo Allah totap sabar agatn koulahan sia' nantai.

¹⁹ Lopas nian di doerah Kanaan, Allah monulukng banso Israel mongalahan tujuh banso. Tanah nantai monjadi umputn banso kito Israel obai Allah inyo moonji'inyo ko sia'.

²⁰ Somuo nantai bolansukng somanah ompat ratus lima' puluh tohutn. Lopas nantai, Allah moangkat boko hakipm pakai' momimpitn sia'. Ubo niannam caronyo sampai hakipm toahir, ia'an Nabi Samuel.

²¹ Pado watu nantai, banso Israel mominto oca' sia' dipimpitn ulih siku' urakng rajo. Jadi, Allah moonji'i ko sia' Saul ana' Kish doi' suku Benyamin. Rajo Saul momimpitn sia' somanah ompat puluh tohutn.

²² Apo lopas nian Allah monurutan Saul doi' kodudu'annyo sobagai rajo. Allah moangkat Daud monjadi rajo boharu pakai' sia'. Allah bopandir mongona'i hati Daud. Kato-Nyo, ‘Aku udah moniant Daud, ana' Isai nantai. Io monyonangan hati-Ku. Io paca'an molabuhan somuo inyo Aku kohonda'i.’

²³ Lopas nantai, Allah bojanji pakai' mongiripm siku' urakng Ponyolamant pakai' urakng Israel. Ponyolamant nantai ia'an doi' koturutan Rajo Daud. Watu ni'in, Allah udah momonuhi janji-Nyo nantai. Ponyolamant nantai ia'an Yesus.

²⁴ Sobolupm Yesus mula'i polayatan-Nyo, ado Yohanes Pombaptis. Io monyiuh somuo urakng Israel pakai' botongga' bulah dosa ongko dibaptis.

²⁵ Timpu Yohanes hampir monyolosaian polayatannyo, banya' urakng botakutn, ‘Duatn ninam Ponyolamant inyo dijanjian Allah nantai?’ Yohanes monimbasi, ‘Aku bukainyo Urakng inyo kaitn tanti nantai. Apo co manah agi' Sio paca'an datakng. Ongko monjadi hulutn-Nyo inyo kotakan babah pan, aku kinyo cucu', obai Sio jouh lobih bokuaso daripado aku.’

²⁶ Boko somadikan koturutan Abrahapm, huatan boko urakng bukainyo urakng Yahudi udah pocayo agatn Allah: Yesus mombuka' jalatn oca' urakng ulih disolamant'an doi' hukupan dosa. Borito nantai udah disampaian ko kito somuo!

^27-28 Joman komai, boko nabi udah monulis mongona'i Rajo Inyo Dijanjian Allah. Watu ni'in, sotiap Ari Sabat, boko buku nabi nantai dibacoan di boko rumah sombayakng. Apo boko urakng Yerusalem kinyo mongoroti pomandiran boko nabi nantai. Sia' kinyo mongotohu'i Yesus nantai Rajo Inyo Dijanjian Allah. Boko pomimpitn agama sia' pan kinyo tohu. Sia' molawatn Yesus. Sia' samo sokali conyiant alasan pakai' mohukupm Yesus. Apo sia' totap monyosahan Gubernur Pilatus oca' Yesus dihukupm mati. Somuo porbuatan sia' nantai bulah pomandiran boko nabi doi' joman komai monjadi bondar-bondar tojadi.

²⁹ Apo sia' co tohu hal nantai. Lopas somuo posatn mongona'i Yesus udah digonapi, sia' monurutan Sio doi' kayu salib. Ongko sia' momasar bangkai-Nyo di dalapm gua batu.

³⁰ Apo Allah bulah Sio hidup agi' doi' komatian.

³¹ Somanah boboropo ari, Yesus moniant'an diri boulakng-ulakng kali. Sio moniant'an diri ko boko murid inyo udah mongikuti Sio doi' doerah Galilea ko kota Yerusalem. Boko urakng nantaiam watu ni'in momboritoan mongona'i Sio ko banso kito Israel.

³² Jadi ni'inan koi monyampaian Kabar Boi' nantai ko kaitn. Timpu joman komai, Allah bojanji ko angki-bayatn kito. Allah bojanji pakai' mongiripm siku' urakng Rajo inyo paca'an momorintah umant-Nyo somanah-manahnyo.

³³ Watu ni'in, Allah udah monopat'i janji-Nyo ko kito, koturutan Israel. Sama'an ni'in caronyo Allah monopat'i janji-Nyo, Allah bulah Yesus hidup agi'. Allah udah momandiran hal ni'in inyo totulis dalapm buku Mazmur pasal duo. Dinga' ni'in bunyinyo, ‘Kolai ni'in Ana'-Ku. Ari ni'in Aku moumuman obai Aku ni'innam Bopai Kolai.’

³⁴ Allah bulah Yesus hidup agi'. Jadi, Yesus kinyo paca'an kalo mati agi'. Mongona'i hal ni'in, timpu joman komai, Allah udah bojanji ko umant-Nyo. Kato-Nyo, ‘Aku udah bojanji ko Daud pakai' moonji'i borokat ko kaitn, umant-Ku. Janji-Ku nantai bondar huatan pasti.’

³⁵ Di buku Mazmur bukai, Daud monulis, ‘Duatn co paca'an mombiaran utusan Duatn inyo Suci sampai momburu' di pasaran obai Aku hala taat huatan sotia agatn Duatn.’

³⁶ Daud molabuhan kohonda' Allah pado watu io hidup mo. Io mati ongko dipasaran di tompat inyo samo agatn angki-bayatnnyo. Bangkai Daud memang monjadi buru' di pasaran nantai.

³⁷ Apo bangkai Yesus kinyo monjadi buru' di pasaran. Allah bulah Sio hidup agi'. Sama'an inyo totulis nantai.

³⁸ Boko somadikan, aku monyimpulan pomandiranku. Aman kito monaati somuo Porintah Allah inyo ditulis Musa, hal nantai kinyo bulah boko dosa kito diamputi. Boko dosa kito diamputi ongkah aman kito pocayo agatn Yesus.

³⁹ Jadi, somuo urakng inyo pocayo agatn Yesus, dipohitukan bondar di hadapan Allah.

⁴⁰ Apo, bobo'i cam oca' Allah co mohukupm kaitn. Allah udah moingant'an kaitn molalu'i inyo ditulis boko nabi. Dinga' ni'in bunyinyo,

⁴¹ ‘Pontiatan boboi', kaitn inyo mohayam pomandiran-Ku! Kaitn paca'an mooso hiratn obai joman ni'in Aku paca'an molabuhan sosuatu inyo bulah kaitn kotakan ajab sonsaro. Biar pan ado urakng inyo momadahan ko kaitn mongona'i hukupan nantai, kaitn ija' bopikir hukupan nantai kinyo paca'an tojadi. Apo hukupan nantai paca'an tojadi. Kaitn paca'an bonaso.’ Jadi, boko somadikan, poniant'an boboi' oca' hukupan nantai kinyo tojadi ko kaitn jam.”

⁴² Lopas Paulus jadi bopandir, lalu io ongko Barnabas koluar doi' rumah sombayakng agama Yahudi nantai. Somontaro nantai, sia' diminto oca' bobali' watu ari Sabat dudinyo. Boko urakng honda' mondinga' agi' mongona'i somuo hal inyo disampaian sia' duo nantai tontai.

⁴³ Lopas jadi sombayakng, banya' urakng tuyut Paulus agatn Barnabas. Ado boko urakng Yahudi huatan boko urakng inyo bukainyo urakng Yahudi inyo udah pocayo ko Allah jam. Paulus ongko Barnabas mongajar somuo sia', obai Allah nantai boi'. Allah moamputi dosa somuo urakng inyo pocayo agatn Yesus. Koduo rasul nantai moanjuran oca' sia' totap pocayo ko koboi'an hati Allah nantai.

⁴⁴ Timpu ari Sabat dudinyo, hampir somuo urakng di kota Antiokhia nantai bokumpul di rumah sombayakng agama Yahudi. Kobanya'an doi' sia' nantai bukainyo urakng Yahudi. Sia' honda' mondinga' mongona'i Yesus, Tuhatn inyo bokuaso di pucu' somuonyo.

⁴⁵ Apo watu boko urakng Yahudi moniant urakng banya' nantai, sia' monjadi kotakan tungi. Sia' mohayam Paulus. Sia' jam monikaki la'apo inyo diajarannyo.

⁴⁶ Apo Paulus ongko Barnabas kinyo gola'. Sia' bopandir, “Yesus moutus koi pakai' monyampaian Kabar Boi' mongona'i Sio. Koi gola' monyampaian lobih doholu ko kaitn, boko urakng Yahudi. Apo kaitn co honda' monorima' nantai. Rotinyo, kaitn kinyo moanggap diri cucu' monorima' hidup somanah-manahnyo. Obai nantai, ni'inan koi moninggalan kaitn ongko botula' molayati boko banso inyo bukainyo urakng Yahudi.

⁴⁷ Obai Allah udah monyiuh koi. Kato-Nyo, ‘Aku udah moutus kaitn pakai' monjadi torakng inyo monyampaian Kabar Boi' ko boko banso inyo bukainyo banso Yahudi. Oca' somuo kaitn momboritoan kosolamant'an ko boko urakng di soluruh bumi.’ ”

⁴⁸ Mondinga' hal nantai, boko urakng inyo bukainyo urakng Yahudi kotakan rindakng. Sia' mongatoan obai borito mongona'i Tuhatn Yesus memang boi' bondar. Boko urakng inyo udah dipilih Allah pakai' mondapat hidup somanah-manahnyo, monjadi pocayo agatn Yesus.

⁴⁹ Sia' monyebaran Kabar Boi' mongona'i Yesus di soluruh doerah nantai.

⁵⁰ Apo boko urakng Yahudi mohadu boko urakng pontikng di kota nantai, tomansu' boko botina' inyo bopongaruh udah mansu' agama Yahudi. Boko urakng pontikng nantai bulah urakng bukai mondorako'i Paulus ongko Barnabas. Koponsuahannyo, Paulus ongko Barnabas ditundukng doi' doerah nantai.

⁵¹ Apo Paulus ongko Barnabas mongibasan dobu doi' kaki sia'. Niannam tando poringant'an ko pondudu' kota nantai obai Allah paca'an mohukupm sia'. Lopas nantai, Paulus ongko Barnabas botula' ko kota Ikonium.

⁵² Boko urakng inyo hoyu' pocayo agatn Yesus di Antiokhia totap hidup agatn rindakng-rigah. Roh Allah monguaso'i somuo sia'.