Kisah Boko Rasul 1 - Porjanjian Boharu Torjomahan Baso Dilakng Soari-ari

Kato pongantar doi' Lukas

¹ Kopado inyo tohormat Teofilus: Aku udah monulis buku ko kolai. Di dalapm bukuku inyo potamo nantai, aku mongisahan somuonyo mongona'i Yesus, somuo hal inyo udah Sio labuhan huatan ajaran. Aku mongisahan somuonyo doi' potamo polayatan-Nyo

^2-3 sampai watu Yesus noi' ko sorugo. Di masa polayatan-Nyo, Sio momilih duo bolas urakng doi' boko murid-Nyo, inyo disobut boko rasul. Watu ari toahir Yesus hidup, Sio ajab sonsaro sampai mati di kayu salib. Apo, lopas nantai, Sio monunju'an boko tando inyo nyata oca' boko rasul nantai pocayo obai Sio bondar-bondar hidup. Somanah ompat puluh ari, Sio moniant'an diri-Nyo boboropo kali ko boko rasul-Nyo. Sio moonji'i boko porintah ko boko rasul-Nyo agatn kuaso Roh Allah inyo ado dalapm diri-Nyo. Sio pan mongajar sia' mongona'i Koraja'an Allah, ia'an sama'an apo caro Tuhatn momimpitn umant-Nyo sobagai Rajo.

Yesus bojanji mongiripm Roh Allah ko boko rasul-Nyo

⁴ Timpu dalapm watu ompat puluh ari nantai, Yesus tongahan makatn bosamo agatn sia'. Sio bopandir, “Jangan botula' doi' kota Yerusalem ni'in. Bodiapm ja'am di si'itn monantian la'apo inyo udah dijanjian Bopai-Ku. Aku udah kalo momadahan ko kaitn mongona'i nantai.

⁵ Yohanes mombaptis urakng agatn ara'i. Apo co manah agi' Aku paca'an mombaptis kaitn agatn Roh Allah.”

Yesus toangkat ko sorugo

⁶ Jadi, watu ari bukainyo agi', timpu boko rasul bokumpul bosamo agatn Yesus, sia' botakutn ko Sio, “Tuhatn, ni'innam bai watunyo Duatn paca'an mondirian agi' Koraja'an Israel?”

⁷ Sio bopandir, “Allah Bopai udah monotap'an watunyo. Nantai hak Sio siku'. Kaitn co pontikng mongotohu'i watunyo.

⁸ Apo Roh Allah paca'an tinggal di dalapm kaitn. Watu nantai, kaitn paca'an monorima' kuaso. Kaitn paca'an momboritoan mongona'i Aku ko boko urakng bukai di kota Yerusalem huatan di sotiap doerah Yudea. Kaitn paca'an momboritoan mongona'i Aku jam di sotiap doerah Samaria. Kaitn paca'an momboritoan mongona'i Aku sampai ko boko tompat inyo palikng jouh di soluruh dunia.”

⁹ Lopas jadi Sio bopandir ubo nantai, Sio toangkat ko sorugo. Sia' moniant Sio sampai awatn monutupi-Nyo. Ongko sia' co dapat moniant Sio agi'.

¹⁰ Apo, watu sia' ija' moniant ko langit tongahan Sio noi', colanant ado duo urakng bojubah putih. Koduo urakng nantai bodiritn di totai sia'.

¹¹ Koduo urakng nantai bopandir, “Oi boko urakng doi' doerah Galilea. Jangan kaitn ija' bodiritn di si'itn, monongadah ko langit. Kaitn udah moniant Yesus noi' ko sorugo doi' antaro kaitn. Nononyo, Sio paca'an datakng agi' agatn caro inyo samo ubo nantaiam.”

Boko rasul bodoa kapikng moingu'i Roh Allah datakng

¹² Lopas nian boko rasul nantai bobali' pulakng ko Yerusalem doi' bukit Jaitun, kiro-kiro sopal jouhnyo.

¹³ Kali sampai di kota, sia' botula' ko rumah tompat sia' monoluntukng. Di rumah nantai sia' noi' ko kamar sia' di loteng. Boko rasul nantai: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (ana' Alfeus), Simon (urakng Zelot), ongko Yudas (ana' Yakobus).

¹⁴ Bosamo agatn sia' ado jam boboropo botina' tomansu' Maria (indai Yesus), ongko boko somadikan Yesus. Sia' somuo opat bokumpul pakai' bodoa. Sia' hala bodoa ongko sohati sopikiran.

Matius dipilih pakai' ponggonti Yudas

¹⁵ Lopas nantai boboropo ari, ado kiro-kiro soratus duo puluh urakng inyo pocayo ko Yesus bokumpul watu nantai. Petrus bodiritn di antaro sia' somuo. Katonyo,

^16-20 “Boko somadikanku, sobolupmnyo Yudas tomansu' dalapm kolompok koi boko rasul. Io molayati bonsamoan agatn koi. Apo io jam mombori'tohu caro oca' Yesus ulih ditangkap.” (Yudas mondapat'an duit pakai' molabuhan kojahatan nantai. Agatn duit nantai io momboli sobidakng tanah. Di pucu' tanah nantai io jatu' tokosungkapm, porutnyo tobolah sampai somuo isinyo koluar, ongko io mati. Somuo urakng di kota Yerusalem udah mondinga' mongona'i nantai. Jadi dalapm baso sia' tanah nantai disobut ‘Hakal-Dama’, rotinyo “Tanah Darah”.) Kato Petrus, “Apo, joman komai kojadian nantai udah totulis dalapm Buku Suci. Kojadian nantai tojadi sosuai agatn tulisan nantai. Joman komai Roh Allah momimpitn Rajo Daud monulis mongona'i hukupan inyo cucu' pakai' Yudas di Buku Mazmur. Bunyi ni'in tulisannyo: ‘Biaram rumah io monjadi puakng; Biaram co nyiant urakng inyo bodiapm di su'utn.’ Kato ni'in pan ditulis: ‘Biaram kodudu'an urakng nantai dikuti' ulih urakng bukai.’

^21-22 Obai nantai am, kito pontikng momilih siku' urakng agi' pakai' ponggonti Yudas. Io paca'an bosamo koi boko rasul pakai' momboritoan obai Tuhatn Yesus udah bobali' hidup doi' komatian. Lobih boi' kito momilih urakng nantai doi' antaro kito inyo ado di si'itn. Apo, io pan gola' hala bosamo agatn koi watu Yesus ado di antaro koi. Io gola' bosamo agatn koi mula'i doi' watu Yohanes mombaptis Yesus sampai Yesus noi' ko sorugo doi' antaro koi.”

²³ Jadi, boko urakng pocayo inyo bokumpul di santai mousulan duo iku' urakng pakai' ponggonti Yudas. Duo iku' urakng nantai bodamo Matias ongko Yusuf. (Yusuf pan dikonal agatn duo damo bukai, ia'an Barsabas ongko Yustus).

^24-25 Lopas nian sia' somuo bodoa. Kato sia', “Tuhatn, Duatn mongotohu'i isi hati sotiap urakng. Yudas udah moninggalan tugasnyo sobagai rasul. Io udah mati, huatan monorima' hukupan inyo cucu'. Jadi, tunju'ancam ko koi sopo paca'an monggonti'i io. Ado duo iku' urakng ni'in. Inyo mono dipilih Duatn pakai' molayati sobagai rasul monggonti'i Yudas.”

²⁶ Lopas nian sia' botonung. Sokalinyo damo Matias am inyo topilih dalapm potonungan nantai. Jadi, io diangkat monjadi rasul bonsamo kosobolas rasul inyo bukai.