Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Ibrani 9 - Porjanjian Boharu Torjomahan Baso Dilakng Soari-ari


Pojanjian Manah ongko Potungguan Suci Allah di dunia
( 9:1-10 )

1 Mulonyo ado boko poraturan pakai' monyombah Allah. Ado jam tompat sombayakng inyo dipulah monsio.

2 Tompat sombayakng nantai dipulah ubo potungguan. Di dalapm potungguan nantai, kotakng buai pohadapan ado kaki pompolitoan ongko meja. Di pucu' meja nantai ado roti inyo diposombahan ko Allah. Di kotakng buai pohadapan nantai disobut Ruakng Suci.

3 Di buai bolikat tidikng koduo ado ruakan inyo disobut Ruakan Maho Suci.

4 Dalapm ruakan nantai ado mesbah inyo dipulah doi' omas. Mesbah nantai dipakai pakai' moncucul dupo. Ado jam Poti Pojanjian, somuonyo disolut agatn omas. Dalapm Poti nantai ado botul omas inyo boisi manna, ado tungkah Harun inyo kalo botunas, ado jam boko loh batu. Sopuluh porintah Allah ditulis di boko loh batu nantai.

5 Ponutup Poti nantai disobut Tompat Dosa Diamputi. Di pucu' ponutup Poti nantai, ado duo kerub, ia'an mahluk bosayap inyo molambakan komulia'anAllah ongko sayap sia' tobuka' monungkau'i Tompat Dosa Diamputi nantai. Apo somuonyo nantai kinyo dijolasan sobuti' nyombuti' watu ni'in.

6 Kemah Suci Allah diatur sama'an nantai. Sotiap ari, boko imam mansu' ko dalapm di buai pohadapan kemah nantai pakai' molabuhan tugas sia'.

7 Apo ongkah imam agukng am ulih mansu' ko dalapm Ruakng Maho Suci. Malahan, io bayo ulih molabuhan nantai sokali sotohutn mo. Ongko io gola' mombaba' darah pakai' diposombahan ko Allah oca' dosa io siku' ulih diamputi, huatan oca' dosa inyo kinyo sajo dipulah ulih umant Israel dapat diamputi jam.

8 Agatn poraturan nantai, Roh Allah monunju'an ni'in: Somanah kemah inyo potamo nantai ija' ada'an, jadi jalatn mansu' ko Tompat inyo Suci nantai bolupm tobuka'.

9 Somuo nantai ia'an gambaran pakai' joman ni'in. Rotinyo, hati urakng kinyo monjadi sompurna di hadapan Allah agatn caro momposombahan kurbatn bonatakng damo posombahan bukainyo.

10 Boko poraturan nantai mongona'i makatan, minuman, huatan bomacapm upacara agama pakai' mombulah urakng borosih. Boko poraturan nantai ongkah poraturan pakai' bukakng-tubuh bukatn hati, huatan boko poraturan nantai ongkah boguno sampai Allah mombulah somuonyo boharu.


Pojanjian Boharu ongko Potungguan Suci Allah di sorugo
( 9:11-28 )

11 Apo Kristus udah datakng sobagai Imam Agukng. Molalu'i Sio, boko hal inyo boi' udah datakng. Sio udah mansu' potungguan inyo lobih bosar huatan lobih sompurnadoi' kemah inyo manah nantai. Kemah nantai kinyo di pulah monsio. Rotinyo, potungguan nantai kinyo boasal doi' dunia inyo dipulah ni'in.

12 Kristus udah mansu' ko dalapm Ruakan Maho Suci di dalapm potungguan nantai sokali pakai' somanah-manahnyo. Sio kinyo mombaba' darah kambikng sabukan damo darah ana' sapi, apo Sio mansu' agatn mombaba' darah-Nyo siku'. Agatn sama'an nantai, Sio udah mombebasan kito doi' hukupan dosa kito pakai' somanah-manahnyo.

13 Monurut poraturan agama, boko urakng inyo kinyo borosih gola' dikopociri agatn darah doi' kambikng sabukan, darah doi' sapi sabukan, ongko habu doi' kurbatn ana' sapi inyo ditunu'i pakai' diposombahan ko Allah. Aman darah ongko habu nantai ulih mombulah sia' monjadi borosih agi',

14 boroti darah Kristus lobih boi' agi'. Molalu'i Roh Allah inyo hala ada'an, Kristus udah momposombahan diri-Nyo siku' ko Allah. Sio nam kurbatn posombahan inyo sompurna. Darah-Nyo mombulah hati kito monjadi borosih doi' boko porbuatan inyo kinyo bondar oca' kito ulih monyombah Allah inyo hidup.

15 Obai nantai, Kristus nam Porontaro inyo moadoan pojanjian boharu, ia'an oca' urakng inyo ditingkau Allah ulih monorima' somuo borokat pakai' somanah-manahnyo inyo udah dijanjian-Nyo. Somuonyo nantai ulih tojadi obai udah ado inyo mati, ia'an Kristus. Komatian-Nyo mombebasan urakng doi' boko kosalahan inyo dilabuhan sia' timpu pojanjian inyo potamo ija' bolaku.

16 Samo sama'an surat warisan gola' ado buti obai urakng inyo mombulah surat nantai matiam. Hoyu' surat nantai monjadi sah.

17 Obai, surat nantai kinyo sah somanah urakng inyo mombulah surat nantai ija' hidup. Surat nantai sah ongkah lopas urakng nantai mati.

18 Nantaiam sobabnyo pojanjian potamo pan gola' disahan agatn darah.

19 Timpu nantai, Musa monyampaian ko banso Israel somuo porintah Allah dalapm Hukupm Torat. Lopas nantai, Musa monguti' darah ana' sapi ongko darah kambikng sabukan, lalu moncampurnyo agatn ara'i. Ado bulu domba inyo bowarna mirah inyo di kobat di hujukng batakng rumput hisop. Musa moncolupannyo ko dalapm darah nantai lalu di kopociran ko Buku Hukupm Torat nantai ongko ko somuo banso Israel.

20 Kato Musa ko sia', “Ninam darah inyo monsahan pojanjian doi' Allah inyo gola' kaitn taat'i.”

21 Musa momakai caro inyo samo pakai' momociran darah nantai ko potungguan Allah jam ongko somuo pokakas inyo dipakai pakai' monyombah Allah.

22 Memang monurut Hukupm Torat, hampir somuo hal monjadi borosih agatn darah. Dosa monsio bayo ulih diamputi aman darah doi' kurbatn posombahan ditumpahan.

23 Jadi, la'apo pan inyo molambakan boko hal inyo ado di sorugo gola' diborosihi agatn caro sama'an nantai. Apo, boko hal inyo di sorugo gola' diborosihi agatn kurbatn posombahan inyo lobih boi' doi' nantai.

24 Kristus kinyo mansu' ko dalapm Ruakan Suci inyo dipulah monsio inyo bayo gambaran Ruakng Suci inyo sombondarannyo. Apo Kristus mansu' ko dalapm sorugo nantai. Watu ni'in Sio mohadap Allah momuhun ko Sio pakai' kito.

25 Boko imam agukng di dunia ni'in mansu' ko dalapm Ruakan Maho Suci agatn mombaba' darah doi' kurbatn bonatakng, bukainyo darah sia' siku'. Sia' molabuhan nantai sotiap tohutn. Apo Kristus mansu' agatn momposombahan diri-Nyo siku'. Sio molabuhan nantai kinyo opat.

26 Soandainyo sama'an nian, boroti Sio gola' opat ajab sonsaro doi' mulo dunia ni'in dipulah. Apo inyo nyata, watu ni'in diari-ari toahir ni'in, Sio datakng sokali mo pakai' mohapus dosa agatn caro momposombahan diri-Nyo.

27 Allah udah monontuan monsio mati sokali mo. Lopas nantai, sia' dihakipi.

28 Sama'an nian jam, Kristus momposombahan diri-Nyo sokali mo pakai' monanggukng hukupan dosa urakng banya'. Sio paca'an datakng agi' inyo koduo kalinyo, bukainyo pakai' monanggukng dosa agi', apo pakai' monyolamant'an boko urakng inyo monantian kodatakan Sio.

ကြှနျုပျတို့နောကျလိုကျပါ:



ကြော်ငြာတွေ