Ibrani 7 - Porjanjian Boharu Torjomahan Baso Dilakng Soari-ari

Ponjolasan mongona'i Melkisedek

¹ Watu joman komai, Melkisedek nantai ia'an rajo di kota Salem. Io nam imam inyo molayati Allah inyo kotakng bokuaso. Watu nantai, Abrahapm botula' boparakng mongalahan boboropo rajo bukainyo. Watu Abrahapm bobali' doi' boparakng nantai Melkisedek mohimpa'i io lalu momborokatinyo.

² Lopas nantai, Abrahapm moonju' ko Melkisedek populuhan doi' somuo bando barakng inyo dirampas io watu boparakng nantai. Damo Melkisedek potamo-tamo boroti ‘rajo inyo bulah inyo bondar’. Ongko damo bukainyo ia'an ‘rajo inyo mombaba' sonang-asau’ obai io ia'an rajo Salem huatan Salem rotinyo ‘sonang-asau’.

³ Solaitn nantai, conyiant kisah dalapm Buku Suci mongona'i indai, bopai, angki-bayatnnyo. Kolahirannyo huatan komatiannyo kinyo disobutan. Jadi, imam Melkisedek ado kosama'annyo agatn Ana' Allah. Io monjadi imam pakai' somanahnyo.

⁴ Porotiancam! Melkisedeknam urakng inyo kotakng pontikng. Sampai, angki-bayatn kito, Abrahapm, moonju' ko io populuhan doi' somuo bando barakng inyo dirampas io watu boparakng nantai.

⁵ Dalapm Hukupm Torat ado porintah mongona'i somuo urakng Israel gola' moonju' populuhan ko koturutan Lewi, ia'an nantai boko urakng inyo monjadi imam. Boko imam nantai monorima' populuhan nantai doi' boko somadikan sia' biar pan sia' samo-samo koturutan Abrahapm.

⁶ Melkisedek nantai bukainyo koturutan Lewi apo io totap monorima' populuhan doi' Abrahapm. Solaitn nantai, biar pan Abrahapm inyo dionji'i janji doi' Allah, Melkisedek inyo momborokati Abrahapm.

⁷ Conyiant ado urakng inyo monikaki, obai urakng inyo momborokati hala lobih pontikng doi' urakng inyo io borokati.

⁸ Porotian jam, somuo koturutan Lewi inyo monorima' populuhan, sia' ia'an monsio inyo ulih mati. Apo Buku Suci bosasi obai Melkisedek totap hidup.

⁹ Koturutan Lewi bohak monorima' populuhan, apo kito ulih momandiran obai sia' pan udah moonju' populuhan ko Melkisedek molalu'i Abrahapm.

¹⁰ Obai, timpu Melkisedek mohimpa'i ongko monorima' populuhan doi' Abrahapm, somuo koturutan Lewi nantai ija' ada'an dalapm bukakng-tubuh Abrahapm, angki-bayatn sia'.

Poraturan Allah borubah obai Yesus ia'an Imam Agukng inyo lobih pontikng doi' somuo imam bukai

¹¹ Timpu joman komai, koturutan Lewi dipilih monjadi boko imam inyo momimpitn urakng Israel pakai' monuruti Allah. Jadi, urakng Israel dionji'iporintah huatan poraturan Allah dalapm Hukupm Torat. Apo, polayatan boko imam nantai culih mombulah monsio sompurna di hadapan Allah. Obai nantai am gola' ado Imam inyo bukai, bukainyo agi' imam inyo dipilih doi' koturutan Harun, apo imam inyo samo sama'an Melkisedek.

¹² Aman kodudu'an boko imam borubah, jadi Hukupm Torat nantai gola' borubah jam.

^13-14 Imam inyo bukai dimasud di si'itn ia'an Tuhatn kito, Yesus Kristus. Obai, kito tohu Tuhatn kito boasal doi' suku Yehuda, bukainyo doi' suku Lewi. Conyiant urakng doi' suku Yehuda inyo kalo monjadi imam. Musa cokalo monyobut suku nantai watu io bopandir mongona'i boko imam.

¹⁵ Hal inyo dipandiran ni'in monjadi lobih jolas agi' obai Imam bukai inyo dipilih nantai samo sama'an Imam Melkisedek.

¹⁶ Sio monjadi Imam bukainyo obai poraturan monsio, apo Sio monjadi Imam obai hidup-Nyo inyo bokuaso ongko kinyo ulih dibonasoan.

¹⁷ Obai, di dalapm Buku Suci ado pomandiran ni'in mongona'i Sio, “Kolai ia'an Imam pakai' somanah-manahnyo, samo sama'an Melkisedek.”

¹⁸ Jadi, watu ni'in, Hukupm Torat nantai inyo dionju' komai udah dibalakan obai hukupm nantai kinyo kuat huatan kinyo boguno.

¹⁹ Hukupm Torat nantai kinyo ulih mombulah siku' monsio pan monjadi sompurna di hadapan Allah. Apo watu ni'in, molalu'i Yesus, kito dionji'i harapan inyo lobih boi'. Agatn sama'an nantai, kito ulih datakng dampikng ko Allah.

²⁰ Hal nantai tojadi agatn sumpah doi' Allah. Watu boko urakng bukai monjadi boko imam, conyiant ado sumpah.

²¹ Apo, watu Allah moangkat Yesus monjadi Imam Agukng, ado sumpah doi' Allah. Sama'an ni'in pomandirannyo: “Tuhatn udah bosumpah. Sio kinyo paca'an morubah koputusan-Nyo. ‘Kolai nam Imam pakai' somanah-manahnyo.’ ”

²² Jadi, doi' sumpah nantai, kito tohu Yesus monjadi jaminan obai Allah udah mombulah Pojanjian Boharu agatn monsio. Pojanjian nantai lobih boi' daripado pojanjian manah.

²³ Watu joman komai, ado banya' imam obai sia' mati ongko gola' digonti agatn imam boharu.

²⁴ Apo obai Yesus hidup pakai' somanah-manahnyo, jadi conyiant ado urakng bukai inyo monggonti Sio sobagai Imam.

²⁵ Obai nantai, Sio sanggup monyolamant'an somuo urakng agatn sompurna inyo datakng ko Allah molalu'i Sio. Sio hala hidup pakai' monjadi Porontaro inyo momuhun ko Allah pakai' sia'.

²⁶ Nantai am Imam Agukng inyo kito pontikan. Sio suci, kinyo kalo bulah dosa damo kosalahan. Sio disongkayoan doi' boko urakng bodosa huatan diangkat ko tompat inyo kotakng tinggi di sorugo.

²⁷ Yesus kinyo sama'an boko imam agukng inyo bukai nantai. Sia' gola' momposombahan kurbatn bonatakng sotiap ari oca' dosa sia' siku' diamputi. Lopas nantai, hoyu' sia' momposombahan kurbatn oca' dosa boko urakng bukai diamputi. Apo timpu Yesus momposombahan diri-Nyo siku', Sio momposombahan kurbatn sokali pakai' somanah-manahnyo oca' dosa boko urakng ulih diamputi.

²⁸ Poraturan dalapm Hukupm Torat mombulah boko urakng inyo kinyo sompurna diangkat monjadi imam agukng. Apo lopas Hukupm Torat, ado sumpah inyo dipandiran Allah. Agatn sumpah nantai, Allah moangkat Ana'-Nyo monjadi Imam Agukng inyo sompurna pakai' somanah-manahnyo.