Ibrani 6 - Porjanjian Boharu Torjomahan Baso Dilakng Soari-ari

¹ Obai nantai, mara am kito maju agatn boko ajaran mongona'i Sio inyo mombulah kito lobih botumbuh monjadi dewasa dalapm Kristus. Jangannam kito moulaki agi' boko ajaran dasar, ia'an ajaran obai urakng gola' botongga' molabuhan boko hal inyo pocumo huatan pocayo cam ko Allah,

² ajaran mongona'i bomacapm baptisan, ajaran mongona'i molota'an jari ko urakng, ajaran obai boko urakng paca'an bobali' hidup agi' doi' komatian, huatan ajaran mongona'i hukupan inyo somanah-manahnyo.

³ Mara aman Allah moijitan kito maju ko boko polajaran inyo bukainyo.

⁴ Obai, boko urakng inyo kalo hidup dalapm torakng, kalo monorima' borokat doi' Allah, kalo monorima' Roh Allah,

⁵ kalo monorima' Pomandiran Allah inyo boi', kalo moalapi kuaso Allah doi' joman inyo tajahan datakng,

⁶ lopas somuonyo nantai, aman sia' moninggalan Kristus, jadi co mungkitn sia' ulih dibimbikng oca' sia' moninggalan dosa sia' lalu bobali' agi' ko Sio. Obai, umpamonyo sia' siku' mohukupm mati Ana' Allah di kayu salib agi'. Sia' mombulah Sio dihanyam di hadapan urakng banya'.

⁷ Porotian gambaran ni'in: Ado lakau inyo moinsap ara'i hujatn inyo opat turutn ko pucu'nyo. Aman lakau nantai ado hasil boko tontanaman inyo boguno pakai' urakng inyo mongorojoan lakau nantai, jadi lakau nantai monorima' borokat doi' Allah.

⁸ Apo aman lakau nantai bayo mohasilan rado duri huatan boko solalakng, jadi lakau nantai co boguno. Kinyo manah am lakau nantai tajahan dihukupm Allah. Koponsuahannyo, lakau nantai tajahan dicucul habis.

⁹ Apo, boko somadikan inyo tokasih, biar pan koi bopandir mongona'i hukupan sama'an nantai, koi yakitn obai kaitn udah monorima' boko hal inyo lobih boi' sampai kaitn paca'an disolamant'an.

¹⁰ Obai, Allah adil. Sio kinyo kolupatn agatn polayatan kaitn. Sio kinyo tongkolupatn aman kaitn mongasihi urakng bukai oca' damo Sio dipuji. Ia'an nantai, kaitn udah monulukng boko urakng inyo pocayo. Sampai watu ni'in, kaitn totap monulukng sia'.

¹¹ Apo koi honda' kaitn siku'-monyiku' totap torus bosomangant mombulah sama'an nantai sampai ahir, oca' kaitn yakitn mongona'i harapan kaitn.

¹² Agatn sama'an nantai, kaitn kinyo tajahan monjadi pocalan, apo kaitn tajahan moikuti toladatn boko urakng inyo pocayo komainyo. Obai sia' pocayo huatan obai sia' sabar, jadi sia' monorima' borokat inyo dijanjian Allah.

Janji Allah kuat ongko kinyo borubah

^13-15 Porotian toladatn Abrahapm. Obai io sabar, jadi io monorima' borokat inyo dijanjian Allah ko io. Allah bopandir, “Aku bojanji Aku tajahan momborokati kolai. Aku tajahan moonji'i banya' koturutan ko kolai.” Watu Allah monjanjian hal nantai ko Abrahapm, Allah monguat'an janji-Nyo agatn bosumpah demi diri-Nyo siku'. Allah bosumpah demi diri-Nyo siku' obai conyiant urakng inyo lobih bokuaso doi' Sio.

¹⁶ Aman monsio, sia' bosumpah demi urakng inyo lobih bokuaso doi' sia'. Sumpah nantai mombulah janji sia' kuat sampai sia' kinyo ija' botikakng agi'.

¹⁷ Sama'an nian jam, Allah honda' monunju'an ko boko urakng inyo tajahan monorima' borokat inyo dijanjian-Nyo. Sio honda' oca' sia' lobih yakitn agatn hajat Sio kinyo tajahan borubah. Obai nantai am Allah monguat'an janji-Nyo agatn sumpah.

¹⁸ Watu Allah moucap'an janji-Nyo ongko sumpah-Nyo, co mungkitn Sio tumbukan. Koduo hal nantai kinyo ulih borubah. Obai nantai, kito inyo datakng ko Sio oca' dilinduki, hati kito monjadi kotakng kuat pakai' boharap obai nononyo kito paca'an monorima' borokat inyo dijanjian Allah ko kito.

^19-20 Harapan nantai samo sama'an jangkar inyo mombulah jiwa kito aman ongko totap kuat pocayo. Harapan nantai monombus tidikng ruakan maho suci di rumah Allah di sorugo. Yesus udah mombuka' jalatn pakai' kito ko tompat nantai, ongko mansu' ko santai monjadi Imam Agukng pakai' somanah-manahnyo samo sama'an, Melkisedek monjadi imam ija' joman komai.