Ibrani 5 - Porjanjian Boharu Torjomahan Baso Dilakng Soari-ari

¹ Sotiap imam agukng dipilih doi' monsio. Io diangkat monjadi porontaro pakai' monsio dalapm hubukan sia' agatn Allah. Imam agukng monguti' posombahan boko urakng lalu moonju'nyo ko Allah, tomansu' boko kurbatn bonatakng inyo diposombahan oca' boko dosa sia' diamputi.

² Imam agukng kinyo togas agatn boko urakng inyo sosat huatan bolupm mongoroti jalatn inyo bondar. Obai, io siku' kurakng kuat huatan bulah dosa samo sama'an sia'.

³ Obai nantai, io gola' momposombahan kurbatn bonatakng, bukainyo ongkah oca' boko dosa urakng bukai diamputi apo oca' boko dosa io siku' pan diamputi jam.

⁴ Conyiant urakng inyo ulih moangkat dirinyo siku' monjadi imam agukng. Apo, Allah inyo moningkau io, samo sama'an Allah moningkau Harun ija' joman komai.

⁵ Sama'an nian jam, Kristus kinyo moangkat diri-Nyo siku' monjadi Imam Agukng. Apo Allah inyo moangkat Sio. Kato Allah ko Sio, “Kolainam Ana'-Ku. Sari ni'in Aku udah monunju'an obai Akunam Bopai Kolai.”

⁶ Di ayat bukai, Allah bopandir jam, “Kolai nam Imam pakai' somanah-manahnyo, samo sama'an Melkisedek monjadi imam ija' joman komai.”

⁷ Watu Yesus hidup di dunia ni'in sobagai monsio, Sio bodoa kapikng mondorah huatan monangis. Sio momuhun ko Allah inyo sanggup monyolamant'an-Nyo doi' komatian. Allah monimbasi doa-Nyo obai Sio hala monuruti kohonda' Allah.

⁸ Biar pan Yesus nantai Ana' Allah, Sio bolajar monaati Allah watu Sio mondorita'.

⁹ Agatn caro nantai, Sio monjadi Ponyolamant inyo sompurna. Jadi, Sio ulih moonji'i kohidupan kokal ko somuo urakng inyo taat ko Sio.

¹⁰ Allah moningkau Sio monjadi Imam Agukng, samo sama'an Melkisedek monjadi imam ija' joman komai.

Kito gola' monjadi dewasa dalapm Kristus

¹¹ Ija' banya' hal inyo honda' koi pandiran ko kaitn mongona'i Yesus sobagai Imam Agukng. Apo boko hal nantai uyuh di jolasan obai kaitn co honda' mongoroti.

¹² Sobondarnyo, udah watunyo pakai' kaitn pakai' monjadi guru inyo mongajar urakng bukai mongona'i pomandiran Allah. Apo kaitn ija' pontikng urakng bukai mongajar kaitn mongona'i boko ajaran dasar doi' nantai. Umpamonyo kaitn monjadi bobia' agi' inyo ija' monyusu, bolupm ulih bopua' pomakatn inyo korikng.

¹³ Sotiap urakng inyo ija' monyusu, boroti io ija' bobia'. Io bolupm momahami ajaran mongona'i caro hidup inyo bondar di hadapan Allah.

¹⁴ Apo pomakatn korikng nantai pakai' boko urakng dewasa, ia'an boko urakng inyo udah molatih diri sia' pakai' mombedaan inyo boi' doi' inyo jahat.