Ibrani 4 - Porjanjian Boharu Torjomahan Baso Dilakng Soari-ariKito gola' pocayo ko Allah oca' kito ulih mansu' ko dalapm tompat torahat inyo dijanjian Sio ( 4:1-13 ) 1 Obai nantai, boko somadikan, kito gola' boboi'. Allah udah bojanji obai somuo urakng inyo pocayo ulih mansu' ko dalapmtompat torahat inyo Sio siap'an. Janji Allah nantai ija' bolaku pakai' kito watu joman ni'in. Apo, kaitn gola' boboi' oca' conyiant di antaro kaitn inyo culih mansu'. 2 Obai, Kabar Boi' nantai udah dipadahan ko kito samo sama'an ko angki-bayatn kito komai. Apo, borito nantai kinyo boguno pakai' sia' obai sia' kinyo pocayo watu mondinga'nyo. 3 Kito inyo pocayo ulih mansu' ko tompat torahat nantai. Apo, sia' inyo kinyo pocayo culih mansu'. Sama'an inyo dipandiran Allah, “Aku godi, lalu bosumpah: Sia' tajahan cokalo mansu' ko dalapm tompat torahat-Ku.” Allah bopandir sama'an nantai, biar pan Sio udah jadiam mombulah la'apo pan doi' mulo dunia ni'in dipulah. 4 Kito mongotohu'i nantai obai ado pomandiran ni'in mongona'i ari kotujuh di sobuah ayat dalapm Buku Suci, “Timpu ari kotujuh Allah monongga'an somuo pogota'an-Nyo.” 5 Ado jam pomandiran ni'in inyo di tulis mongona'i nantai, “Sia' tajahan cokalo mansu' ko dalapm tompat torahat-Ku.” 6 Jadi, boko urakng inyo lobih doholu mondinga' Kabar Boi' nantai, sia' culih mansu' obai sia' kinyo taat ko Allah. Aman sama'an nian, udah jolas ado jumlah urakng bukai, inyo ulih mansu' tompat torahat nantai. 7 Obai nantai am, Allah monontuan soari inyo bukai agi' oca' boko urakng nantai ulih mansu' tompat torahat nantai. Ari inyo dimasud nantai disobut ‘Sari ni'in’ dalapm pomandiran tontai nantai. Cukup manah lopas jadi angki-bayatn kito monula' Allah di padakng pasir, pomandiran ni'in disampaian molalu'i Daud, “Sari ni'in, watu kaitn mondinga' saro Tuhatn, jangan korikng hati.” 8 Soandainyo, Yosua udah momimpitn boko urakng mansu' ko dalapm tompat torahat nantai timpu joman komai, jadi Allah kinyo paca'an bopandir mongona'i soari inyo bukainyo agi' inyo ditontuan-Nyo. 9 Apo, obai Allah bopandir mongona'i ari nantai, jadi ija' ado ari torahat ari inyo kotujuh inyo paca'an datakng nononyo pakai' umant Allah. 10 Somuo urakng inyo mansu' ko dalapm tompat torahat Allah nantai, sia' botongga' monongga'an somuo pogota'an sia', samo sama'an Allah botongga' monongga'an somuo pogota'an-Nyo. 11 Obai nantai, mara kito bousaha oca' kito ulih mansu' ko dalapm tompat torahat nantai. Jangan sampai ado urakng di antaro kito inyo culih mansu' obai io tuyut toladatn sia' doi' joman komai inyo kinyo taat ko Allah. 12 Obai, Pomandiran Allah ia'an pomandiran inyo hidup huatan bokuaso, lobih tajapm doi' podakng bomato duo. Samo sama'an podakng inyo ulih monuhu' monyongkayoan boko posigalan huatan sunsutn, sama'an nian jam pomandiran Allah ulih monuhu' kotakng dalapm huatan monyongkayoan jiwa ongko roh. Pomandiran Allah ulih momoriso pikiran ongko hajat hati kito. 13 Conyiant la'apo pan inyo toombakan doi' mato-Nyo. Somuo hal jolas huatan tobuka' di hadapan Sio. Somuo kito gola' moaku'i somuo porbuatan kito ko Sio. Yesus ia'an Imam Agukng kito ( 4:14–5:10 ) 14 Obai nantai, kito gola' kuat agatn kopocaya'an kito. Obai, kito ado Imam Agukng inyo kotakng bokuaso, ia'an Yesus, Ana' Allah. Sio udah mansu' sorugo, monjadi porontaro pakai' kito di hadapan Allah. 15 Imam Agukng kito jumpat jam moosoan boko kolomahan kito. Obai, timpu Sio ado di dunia ni'in, Sio mohadapi poncoba'an samo sama'an kito. Apo Sio kinyo bulah dosa sama'an kito. 16 Obai sama'an nian am Imam Agukng kito, mara cam kito borani bodoa ko Allah inyo monunju'an kasih karunia-Nyo. Agatn sama'an nantai, Allah paca'an monunju'an bolas kasih ongko kasih karunia-Nyo ko kito. Sio paca'an monulukng kito topat watunyo. |
LAI 2021
Indonesian Bible Society