Ibrani 3 - Porjanjian Boharu Torjomahan Baso Dilakng Soari-ari

Yesus lobih pontikng doi' Musa

¹ Obai nantai boko somadikan, inyo ditingkau jam monjadi boko urakng inyo husus umputn Allah, kaitn gola' bondar-bondar momporhatian Yesus inyo kito tuyut'i. Sio diutus Allah. Sio monjadi Imam Agukng kito.

² Sio sotia ko Allah inyo moutus Sio, samo sama'an Musa sotia momimpitn banso Israel.

³ Apo Yesus cucu' bodapat hormat inyo lobih bosar doi' Musa, samo sama'an urakng inyo mombulah rumah lobih dihormati daripado rumah inyo dipulahnyo.

⁴ Memang sotiap rumah ado urakng inyo mombulahnyo. Apo inyo mombulah somuo hal ia'an Allah siku'.

⁵ Musa sotia sobagai polayatn dalapm rumah Allah, ia'an nantai banso Israel. Polayatan Musa monunju'an mongona'i kojadian inyo paca'an diboritoan nononyo.

⁶ Apo Kristus sotia sobagai Ana' inyo bokuaso agatn rumah Allah, ia'an kito. Kito ia'an rumah-Nyo aman kito totap kuat pocayo ko Yesus huatan yakitn moharap'an agatn somuo hal inyo paca'an dionju' Sio ko kito nononyo. Somuo hal nantai mombulah hati kito rindakng.

Jangan monula' Allah sama'an urakng Israel timpu joman komai

⁷ Jadi, kaitn gola' monuruti pomandiran Roh Allah ni'in: “Sari ni'in, watu kaitn mondinga' saro Tuhatn,

⁸ jangan korikng hati sama'an angki-bayatn kaitn komai. Sia' momborontak molawatn Sio. Timpu sia' tongahan di padakng pasir, sia' moncubo'i kosabaran Sio.

⁹ Kato Sio, ‘Somanahan ompat puluh tohutn, angki-bayatn kaitn moniant boko porbuatan-Ku.’ Apo sia' totap moncubo'i Aku huatan mouji Ku.

¹⁰ Nantai am sobabnyo Aku kotakng godi agatn boko urakng joman nantai. Aku bopandir: ‘Hati sia' hala monjumpati jalatn inyo salah. Sia' kinyo honda' mongonal jalatn-Ku.’

¹¹ Aku godi, lalu bosumpah, ‘Sia' kinyo kalo paca'an mansu' ko dalapm tompat torahat-Ku.’ ”

¹² Jadi, boko somadikan, boboi'cam oca' kinyo ado di antaro kaitn inyo bohati jahat inyo kinyo honda' pocayo ko Allah. Jangan sampai kaitn botongga' taat ko Allah inyo hidup.

¹³ Apo kaitn gola' hala monguat'an inyo bukainyo sotiap ari, somanah ija' ado kosompatan timpu joman ni'in inyo disobut ‘Sari ni'in’. Labuhan nantai oca' kinyo ado di antaro kaitn inyo ditipu ulih dosa lalu monjadi korikng hati monula' Allah.

¹⁴ Obai, kito bokorojosamo agatn Kristus aman kito hala kuat pocayo ko Sio. Samo sama'an mulonyo, kito gola' totap kuat pocayo sampai ahir hidup kito.

¹⁵ Sama'an pomandiran nantai am, “Pas ari ni'in, watu kaitn mondinga' saroTuhatn, jangan korikng hati sama'an angki-bayatn kaitn komai. Sia' molawatn Sio.”

¹⁶ Sopo nantai inyo mondinga' saro Tuhatn, apo totap molawatn Sio? Sia' ia'an somuo urakng inyo dipimpitn Musa koluar doi' tanah Mesir.

¹⁷ Ko sopo am Tuhatn godi somanah ompat puluh tohutn nantai? Sio godi ko sia' inyo bulah dosa lalu potukah mati di padakng pasir.

¹⁸ Sopo am inyo dimasud Tuhatn watu Sio bosumpah, “Sia' tajahan cokalo mansu' ko dalapm tompat torahat-Ku”? Nantai ia'an sia' inyo kinyo monaati Sio.

¹⁹ Jadi, udah jolas angki-bayatn kito nantai kinyo ulih mansu' obai sia' kinyo pocayo.