Ibrani 2 - Porjanjian Boharu Torjomahan Baso Dilakng Soari-ari

Jangan moninggalan ajaran inyo bondar

¹ Obai nantai, kito gola' lobih toliti borotian ajaran inyo udah kito dinga'. Kito gola' molabuhan nantai oca' kito co moninggalanajaran nantai.

² Obai soandainyo, Pomandiran Allah inyo disampaian boko molekat ko boko angki-bayatn kito ija' joman komai tonyato bondar sampai boko urakng inyo kinyo monurutinyo dihukupm sosuai agatn porbuatan sia',

³ pasti kito tajahan dihukupm aman kito kinyo monaati pomandiran Allah mongona'i kosolamant'an. Tuhatn Yesus siku' inyo potamo monyampaian Pomandiran Allah nantai. Lalu, boko urakng inyo mondinga'an lansukng doi' Sio, sia' monyampaiannyo sampai kito monjadi yakitn mongona'i nantai.

⁴ Malahan Allah mombutian Pomandiran nantai bondar obai Sio moonju' kuaso ko sia' pakai' molabuhan somuo macapm mujisat ongko obai sia' bodapat bomacapm komampuan husus inyo dionju' ulih Roh Allah sosuai agatn kohonda'-Nyo.

Yesus monjadi monsio pakai' monyolamant'an kito

⁵ Allah kinyo moonju' kuaso ko boko molekat pakai' momorintah dunia inyo tajahan datakng, ia'an dunia inyo kito kisahan ni'in.

⁶ Apo, Allah moonju' kuaso nantai ko monsio. Kito mongotohu'i nantai obai di dalapm ayat Buku Suci ado totulis: “Monsio nantai sopo sampai Duatn honda' monggonang sia'? Boko ana' monsio nantai sopo sampai Duatn poduli mongona'i sia'?

⁷ Kinyo manah Duatn mombulah kodudu'an sia' lobih babah doi' boko molekat. Duatn udah mombulah sia' monjadi mulia ongko tohormat.

⁸ Duatn mombulah somuo hal tundu' di babah kuaso sia'.” Pomandiran ‘somuo hal tundu'’ di babah kuaso sia' boroti conyiant ado la'apo pan inyo co di babah kuaso monsio. Apo, watu ni'in, kito bolupm moniant somuo hal tundu' di babah kuaso sia'.

⁹ Apo kito tiat Yesus bokuaso. Kinyo manah Allah mombulah Sio monjadi monsio inyo ‘lobih babah doi' boko molekat’. Ongko watu ni'in Sio udah ‘monjadi mulia ongko tohormat’ obai Sio mondorita' sampai mati pakai' somuo monsio. Nantai tojadi obai kasih karunia Allah.

¹⁰ Allah mombulah somuo hal, huatan somuo hal di pulah pakai' Sio. Sio honda' mombulah banya' urakng monjadi boko poana'an-Nyo ongko moonji'i sia' kohidupan inyo mulia. Jadi, Allah pantas mombulah Yesus monjadi Ponyolamant inyo sompurna molalu'i pondorita'an. Agatn ubo nantai, Yesus ulih mombuka' jalatn ongko momimpitn sia' sampai sia' disolamant'an.

¹¹ Yesus momborosihi monsio doi' dosa. Sio inyo momborosihi ongko sia' inyo diborosihi, Bopai sia' siku'. Nantai am alasannyo Yesus kinyo malu monyobut sia' boko somadikan-Nyo.

¹² Kato Yesus ko Allah, “Aku tajahan momboritoan mongona'i Duatn ko boko somadikan-Ku. Aku tajahan momuji Duatn di dalapm jomaat.”

¹³ Yesus pan bopandir dinga' ni'in jam, “Aku tajahan yakitn boharap ko Allah.” Sio bopandiran ni'in jam, “Ni'inan Aku agatn boko poana'an inyo udah dionju' Allah ko aku.”

¹⁴ Yesus monyobut'an boko urakng inyo pocayo ko Sio sobagai poana'an. Sia' ado bukakng-tubuh monsio inyo ulih mati, jadi Yesus monjadi monsio huatan moalapi koadaan samo sama'an sia'. Sio molabuhan nantai oca' watu Sio mati, Sio ulih mohancuran Rajo Sitatn. Rajo Sitatn bokuaso mombulah monsio mati.

¹⁵ Jadi, somanah sia' hidup, sia' monjadi sama'an pacal obai gola' agatn komatian nantai. Apo molalu'i porbuatan-Nyo, Yesus mombebasan sia'.

¹⁶ Jadi, udah jolas bukainyo boko molekat inyo ditulukng Yesus. Apo, Sio monulukng kito koturutan Abrahapm.

¹⁷ Nantaiam alasannyo, Yesus gola' monjadi monsio dalapm somuo hal, samo sama'an kito boko somadikan-Nyo. Agatn sama'an nantai, Sio monjadi Imam Agukng inyo monunju'an bolas kasihan ongko hala sotia ko Allah oca' dosa monsio ulih diamputi.

¹⁸ Obai Yesus mondorita' pas Sio mohadapi poncoba'an, jadi Sio ulih monulukng boko urakng inyo mohadapi poncoba'an.