Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Ibrani 13 - Porjanjian Boharu Torjomahan Baso Dilakng Soari-ari


Caro hidup inyo monyonangan Allah
( 13:1-19 )

1 Kaitn gola' totap hala mongasihi sobagai boko urakng inyo bosomadikan dalapm Tuhatn.

2 Jangan hohatian moonji'i koluntukan ko urakng bukai. Obai, boboropo urakng udah molabuhan nantai, ongko sobondarnyo sia' moonji'i koluntukan ko boko molekat biar pan sia' kinyo tohu nantai.

3 Ingantcam boko urakng inyo di dalapm ponjara sama'an kaitn pan ado di dalapm ponjara bosamo agatn sia'. Ingantcam boko urakng inyo disiksa sama'an kaitn disiksa sama'an nantai jam.

4 Somuo urakng gola' mohormati pokawitan. Sotiap laki-bini gola' sotia ko pasakannyo. Obai, Allah tajahan mohukupm urakng inyo bodosa bomporajoan huatan urakng inyo bomporajoan.

5 Jangan cinta duit. Puasan aja'am diri kaitn agatn kodampuan inyo udah jadi umputn kaitn. Obai, Allah udah bopandir, “Aku kinyo kalo tajahan moninggalan kolai. Aku kinyo kalo tajahan mombiaran kolai sonsiku'an.”

6 Obai nantai, kito borani bopandir, “Tuhatn nam inyo monulukngku! Aku co paca'an gola'. La'apo inyo ulih dilabuhan monsio ko aku?!”

7 Ingant cam boko pomimpitn kaitn inyo udah monyampaian Pomandiran Allah ko kaitn. Porotian cam caro hidup sia'. Sia' pocayo sampai mati. Tuyut cam toladatn sia' nantai.

8 Yesus Kristus kinyo borubah. Sio totap samo sokomai, ni'inan sampai somanah-manahnyo.

9 Jangan tontuyutan boko bomacapm ajaran molikahan inyo mombulah kaitn sosat. Obai, inyo boi' ia'an hati kaitn monjadi kuat doi' kasih karunia Allah, bukainyo doi' boko poraturan mongona'i pomakatn. Boko poraturan nantai kinyo ado gunonyo pakai' boko urakng inyo moikutinyo.

10 Kito momuku'i sobuah ‘mesbah’ ongko boko urakng inyo molayati di potungguan Tuhatn kinyo bohak makatn isi doi' kurbatn posombahan inyo ado di pucu' mesbah nantai.

11 Monurut poraturan agama Yahudi, ado boko kurbatn bonatakng inyo diposombahan pakai' mohapus dosa monsio. Imam Agukng mombaba' darah doi' boko bonatakng nantai ko dalapm Ruakng Maho Suci. Apo bangkai boko bonatakng nantai dicucul di luar tompat junjukng-potungguan.

12 Nantaiam sobabnyo Yesus mati di luar pintu gerbakng kota jam, oca' umat-Nyo ulih diborosihi doi' dosa sia' agatn momakai darah-Nyo siku'.

13 Obai nantai, mara am kito botula' ko Yesus di luar junjukng-potungguan ongko jumpat dihanyam jam samo sama'an Sio komai.

14 Obai di dunia ni'in kito conyiant kota tompat tinggal inyo somanah-manahnyo. Kito monanti-nantian kodiapan inyo tajahan datakng.

15 Obai nantai, mara am kito hala momuji Allah ongko bosukur ko Sio molalu'i Yesus. Nantai monjadi kurbatn inyo kito posombahan ko Sio nam, kokato doi' mulut kito inyo momuji damo-Nyo.

16 Jangan kolupatn bulah koboi'an ongko monulukng urakng bukai, obai boko hal nantai samo sama'an kurbatn posombahan jam inyo monyonangan hati Allah.

17 Kaitn gola' monaati boko pomimpitn kaitn. Tundu'cam ko sia'. Obai, sia' inyo bojago-jago agatn jiwa kaitn. Sia' gola' botanggukng jawab ko Allah pakai' polayatan sia' nantai. Taat'icam sia' oca' sia' ulih molayati agatn sonang hati. Aman kaitn kinyo monaati sia', sia' paca'an salu' ongko nantai kinyo boguno pakai' kaitn.

18 Hala bodoa cam pakai' koi. Koi hala honda' hidup bondar. Jadi, koi yakitn obai hati koi borosih dihadapan Allah.

19 Hususnyo, aku muhun ko kaitn pakai' mondoa'an ku oca' aku suba' hagar bobali' ko kaitn.


Doa pakai' moahiri surat ni'in
( 13:20-21 )

20 Aku bodoa ko Allah inyo moonji'i sonang-asau. Sio mombulah Tuhatn kito, Yesus, bobali' hidup doi' komatian. Agatn sama'an nantai, darah Yesus monsahan pojanjianinyo Allah pulah agatn monsio pakai' somanah-manahnyo. Yesus monjadi Gombala Agukng inyo mombimbikng kito, boko domba-Nyo.

21 Aku bodoa oca' Allah moonju' ko kaitn somuo hal boi' inyo dipontikan kaitn pakai' molabuhan kohonda'-Nyo. Aku bodoa oca' Allah molalu'i Yesus Kristus, mongorojoan dalapm hati kito somuo hal inyo dikohonda'i-Nyo. Mara kito momuji Sio pakai' somanah-manahnyo. Amin!


Posatn huatan salapm toahir dalapm surat ni'in
( 13:22-25 )

22 Boko somadikan, aku muhun oca' kaitn sabar monorima' somuo nosihatku dalapm surat. Obai, suratku ko kaitn ni'in kinyo panjakng.

23 Aku honda' oca' kaitn mongotohu'i obai somadikan kito, Timotius, udah dilopasan doi' ponjara. Aman io hagar datakng ko si'itn, koi duo tajahan monjongu' kaitn.

24 Sampaian cam salapm ko somuo pomimpitn kaitn ongko somuo urakng umant husus umputn Allah. Boko somadikan doi' propinsi Italia monyampaian salapm ko kaitn.

25 Aku bodoa oca' Tuhatn monunju'an kasih karunia ko kaitn somuo.

ကြှနျုပျတို့နောကျလိုကျပါ:



ကြော်ငြာတွေ