Ibrani 12 - Porjanjian Boharu Torjomahan Baso Dilakng Soari-ari

Nosihat oca' kuat pocayo agatn botahatn mohadapi pondorita'an

¹ Urakng banya' nantai ia'an boko sasi pakai' kito, soumpamonyo awatn inyo mongoliliki kito. Obai nantai, mara kito hidup agatn caro inyo samo sama'an kito bonggidi'an dalapm polomba'an inyo ado dipohadapan kito. Mara cam kito mombuakan somuo bobatn ongko dosa inyo opat mohalaki kito. Mara cam kito hala bonggidi'an sama'an nantai

² agatn mato totuju ko Yesus. Obai Sio ia'an sumber kopocaya'an kito. Doi' awal Sio momimpitn kito sampai ahirnyo kopocaya'an kito monjadi sompurna. Sio botahatn mondorita' di kayu salib ongko Sio kinyo tonturian caro komatian nantai momaluan obai Sio ongkah bopikir mongona'i sonang-nyaman inyo tajahan di torima' Sio nononyo. Watu ni'in Sio dudu' di tompat inyo tohormat di sopia' kanan tahta Allah.

³ Timpu boko urakng bodosa kotakng molawatn-Nyo, Sio botahatn mohadapi pondorita'an nantai. Jadi, ingantcamtoladatn Sio nantai oca' kaitn kinyo monjadi lomah ongko putus asa.

⁴ Memang kaitn bojuakng molawatn dosa, apo bolupm kalo gola' sampai mati sama'an Yesus.

⁵ Jangan kolupatn nosihat ni'in doi' Buku Suci inyo disampaian ko kaitn sobagai poana'an: “Ana'ku! Aman Tuhatn mondidik kolai, jangan disopelean nantai. Aman Sio monogur kolai, jangan putus asa.

⁶ Obai, Tuhatn momantu sotiap urakng inyo dikasihi-Nyo. Sio mohombat sotiap urakng inyo Sio anggap ana'-Nyo.”

⁷ Jadi, kaitn gola' botahatn mohadapi pondorita'an. Nantai boroti Allah moanggap kaitn poana'an-Nyo. Kinyo kalo ado ana' inyo kinyo dipantu' bopainyo!

⁸ Allah momantu somuo ana'-Nyo. Jadi, aman kaitn kinyo tuyut dipantu' sama'an sia', boroti kaitn bukainyo boko ana'-Nyo inyo sah.

⁹ Porotian jam, bopai kito di dunia ni'in momantu kito ongko kito morogo'i sia'. Aman sama'an nian, kito gola' lobih agi' ‘tundu'’ ko Bopai kito di sorugo oca' kito ulih bondar-bondar hidup.

¹⁰ Bopai kito di dunia ni'in momantu kito bayo sobontar watunyo. Sia' momantu sosuai agatn la'apo inyo sia' anggap boi'. Apo Allah momantu kito pakai' koboi'an kito oca' kito monjadi somongkitn borosih doi' dosa sama'an Sio.

¹¹ Memang, timpu kito dipantu', kito mooso salu', bukainyo sonang. Apo, lopas nantai aman kito dilatih doi' pongalapan nantai, jadi hasilnyo kito monjadi bondar di hadapan Allah ongko mondapat sonang-asau.

¹² Obai nantai, boko somadikan, pulah cam longan kaitn inyo lomah monjadi kuat. Pokutut kaitn inyo bogogora' gola' monjadi kuat jam.

¹³ Totap bojalatn cam di jalatn inyo rato oca' kaki kaitn inyo timpakng jangan tokosilap, apo malah monjadi nyaman-boi'.

Jangan monula' Allah inyo mohakipi somuo urakng

¹⁴ Bousahacam hidup damai agatn somuo urakng. Bousaha jam hidup borosih doi' dosa. Obai, urakng inyo kinyo borosih doi' dosa, kinyo tajahan ulih moniant Tuhatn.

¹⁵ Bojojagocam oca' jangan ado siku' urakng pan di antaro kaitn inyo moninggalan kasih karunia Allah. Aman ado urakng inyo molabuhan nantai, io monjadi samo sama'an tontanaman agatn buah inyo pohit huatan boracutn. Io morusa' kosatuan kaitn ongko mombulah urakng banya' mombulah dosa.

¹⁶ Bojojago jam oca' jangan ado urakng di antaro kaitn inyo bodosa bomporajoan. Jangan ado inyo kinyo morogo'i borokat rohani doi' Allah sama'an inyo dilabuhan Esau ija' joman komai. Obai io ana' kojula'an io bohak mondapat borokat husus doi' bopainyo. Apo io monjual hak nantai bayo pakai' sopirikng pomakatn mo.

¹⁷ Kaitn tohu kisahnyo, watu Esau honda' monorima' borokat nantai, io ditula'. Biar pan io monangis bogoyap caro pakai' mombulah'i kosalahannyo io kinyo bodapat kosompatan.

¹⁸ Boko somadikan, kaitn kinyo datakng mohadapi lou' sama'an inyo di hadapi ulih banso Israel pado watu sia' monorima' pojanjian manah. Sia' datakng ko Gunung Sinai. Gunung nantai biaso mo, ulih ditiat ongko dicama'. Timpu sia' di su'utan, ado api inyo bonyalo-nyalo, ado sanjo-mondakng, arinyo monjadi potakng, ongko ado angin bonakau.

¹⁹ Sia' mondinga' bunyi trompet ongko ado bunyi saro inyo kotakng borakng. Watu boko urakng Israel mondinga' saro nantai, sia' gola' ongko minto oca' co bopandir agi' agatn sia'.

²⁰ Sia' kinyo ulih botahatn mondinga' porintah inyo disampaian saro nantai. Ia'an, “Somuo inyo moncama' bukit ni'in, urakng damo bonatakng pan gola' ditikapi agatn batu sampai mati.”

²¹ Kojadian inyo sia' tiat nantai kotakng bogola'i sampai Musa pan bopandir, “Aku gola' huatan bogogora'!”

²² Apo kaitn udah datakng ko Bukit Sion, ko kota Allah inyo hidup, ia'an kota Yerusalem inyo ado di sorugo. Kaitn datakng mohadapi boribu-ribu molekat.

²³ Kaitn tuyut bokumpul agatn boko urakng inyo kotakng sonang-nyaman, ia'an poana'an Allah. Somuo sia' ia'an boko ana' kojula'an, inyo boko damo sia' udah tocatat dalapm daptar urakng inyo ulih mansu' sorugo. Kaitn datakng mohadapi Allah inyo mohakipi somuo urakng. Kaitn datakng ko tompat roh-roh boko urakng inyo bondar inyo udah mati. Sia' udah dijadian sompurna di hadapan Allah.

²⁴ Kaitn datakng mohadap Yesus inyo monjadi Porontaro inyo moadoan pojanjian boharu inyo Allah pulah agatn monsio, ongko ko darah-Nyo inyo momborosihi kaitn doi' dosa. Darah nantai bopandir mongona'i lou' inyo lobih boi' daripado darah Habel.

²⁵ Porotian cam oca' kaitn jangan monula' Allah inyo bopandir. Timpu joman komai Sio momporingant'i sia' di bumi ni'in. Ongko sia' inyo monula' Sio nantai, sia' dihukupm. Tolobih agi' kito! Aman kito monula' Sio inyo bopandir doi' sorugo, pasti kito tajahan dihukupm!

²⁶ Timpu komai, saro-Nyo mongguncakan bumi. Apo watu ni'in Sio moonju' janji ni'in, “Sokali agi' Aku tajahan mongguncakan bukainyo bayo bumi aja' apo jam langit!”

²⁷ Pomandiran ‘sokali agi'’ monunju'an obai soluruh dunia inyo udah dipulah tajahan diguncakng sampai lolo. Agatn sama'an nian, tajahan tinggal bayo boko hal inyo kinyo ulih toguncakng.

²⁸ Jadi, mara am kito bosukur ko Allah, obai kito monjadi warga Korajaan-Nyo inyo kinyo toguncakng. Mara am kito monyombah Allah agatn caro inyo monyonangan Sio, ia'an agatn hormat ongko gola' agatn Sio.

²⁹ Obai, Allah kito ia'an api inyo moloburan.