Ibrani 11 - Porjanjian Boharu Torjomahan Baso Dilakng Soari-ari

Boko urakng inyo pocayo monjadi toladatn pakai' kito

¹ Aman kito pocayo ko Allah, rotinyo kito bondar-bondar yakitn mongona'i somuo inyo kito harapan. Kito yakitn obai Sio tajahan momonuhi somuo janji-Nyo, biar pan kito bolupm ulih moniantnyo.

² Allah sonang agatn boko urakng doi' joman komai obai sia' pocayo ko Sio.

³ Obai kito pocayo, jadi kito mongoroti Allah mombulah sogolintaran alapm ni'in agatn momakai pomandiran-Nyo ja'am. Jadi, somuo inyo kito tiat, tojadi doi' somuo hal inyo kinyo ulih di tiat.

⁴ Obai Habel pocayo, jadi io momposombahan ko Allah kurbatn inyo lobih boi' tangga'i kurbatn inyo diposombahan Kain. Kopocaya'an Habel monunju'an io ia'an urakng inyo bondar di hadapan Allah. Obai, Allah monorima' posombahannyo. Biar pan Habel udah mati, io sama'annyo ija' bopandir ko kito obai io monjadi toladatn urakng inyo pocayo.

⁵ Obai Henokh pocayo, jadi io kinyo mati. Timpu io ija' hidup, io mohilakng obai Allah moangkat io ko sorugo Dalapm Buku Suci udah totulis obai sobolupm Henokh diangkat, io ia'an urakng inyo monyonangan hati Allah.

⁶ Aman urakng kinyo pocayo, co mungkitn io ulih monyonangan hati Allah. Obai, urakng inyo datakng ko Allah gola' pocayo obai Allah ado. Io pan gola' pocayo obai Allah moonji'i upah ko sotiap urakng inyo bondar-bondar moncari'i Sio.

⁷ Obai Nuh pocayo, jadi io monaati Allah. Timpu nantai, Allah monohu'i io mongona'i malopotako inyo tajahan tojadi nononyo inyo bolupm ulih ditiatnyo. Nuh monaati Allah sampai io mombulah porohu bosar inyo monyolamant'an io ongko koluarganyo. Agatn sama'an nantai, dunia dihukupm apo Nuh monjadi bondar di hadapan Allah obai io pocayo.

⁸ Obai Abrahapm pocayo, jadi io monaati Allah. Timpu nantai, Allah moningkau io botula' ko nogori inyo nononyo tajahan dionju' Allah ko io ongko koturutannyo. Abrahapm kinyo tohu tompat tujuannyo, apo io totap botula'.

⁹ Obai io pocayo jadi io tinggal sobagai urakng asikng di nogori inyo dijanjian Allah nantai. Io tinggal dalapm potungguan. Sama'an nian jam, ana'nyo Ishak ongko cucunyo Yakub tinggal di santai. Sia' tajahan monorima' nogori nantai jam sosuai agatn janji Allah.

¹⁰ Abrahapm hidup sama'an nantai obai io monanti-nantian sobuah kota agatn dasar inyo kuat, ia'an kota inyo dironcanaan ongko dipulah ulih Allah siku'.

¹¹ Obai Abrahapm pocayo, jadi io mampu mondapat koturutan biar pan io kotakng tuho am. Sama'an nian jam bininyo, Sara, manang. Apo, Abrahapm totap yakitn Allah tajahan monopat'i janji-Nyo.

¹² Obai nantai, io mondapat kotakng banya' koturutan biar pan io bayo siku' urakng ongko io kotakng tuho soumpamo bukakng-tubuhnyo udah mati. Kinyo tohitukng banya'nyo koturutannyo sama'an banya'nyo bintakng di langit damo banya'nyo pasir di pantai lout.

¹³ Somuo urakng inyo disobutan tontai totap pocayo ko Allah biar pan sia' mati sobolupm sia' mondapat boko hal inyo dijanjian-Nyo. Sia' totap yakitn obai moniant doi' jouh obai Allah tajahan monopat'i janji-Nyo. Sia' monorima' nantai agatn sonang hati sampai sia' moaku'i sia' ia'an urakng asikng ongko porantau di bumi.

¹⁴ Boko urakng inyo moaku'i nantai monunju'an sia' tongahan moncari'i nogori inyo tajahan monjadi umputn sia'.

¹⁵ Sia' kinyo togonangan nogori inyo sia' tinggalan. Soandainyo sama'an nantai sia' udah banya' kosompatan pulakng ko su'utn.

¹⁶ Apo sobondarnyo, sia' togonangan nogori inyo lobih boi', ia'an nantai sorugo. Obai nantai, Allah kinyo malu disobut Allah sia' obai Sio udah monyiap'an sobuah kota pakai' sia'.

¹⁷ Obai Abrahapm pocayo, jadi io taat watu Allah mouji io. Io rela momposombahan Ishak, ana'nyo inyo tunggal. Padohal, Allah udah bojanji ko Abrahapm.

¹⁸ Kato-Nyo, “Molalu'i Ishak nam, kulo tajahan mondapat'an banya' koturutan.”

¹⁹ Apo Abrahapm totap rela momposombahan ana'nyo obai io pocayo Allah bokuaso mombulah Ishak hidup agi' doi' komatian. Jadi, ulih dikatoan Abrahapm udah monorima' Ishak bobali' doi' komatian.

²⁰ Obai Ishak pocayo, jadi io mombrokati koduo ana'nyo, Yakub ongko Esau. Io momandiran mongona'i koboi'an inyo tajahan sia' dapatan nononyo.

²¹ Obai Yakub pocayo, jadi sobolupm io mati io momborokati poana'an Yusuf. Lalu monyombah Allah kapikng monyanggar di kopala' tungkahnyo.

²² Obai Yusuf pocayo, jadi sobolupm io mati io moingant'an obai boko urakng Israel tajahan koluar doi' tanah Mesir sosuai agatn janji Allah. Jadi, io boposatn oca' boko korangkahan tulakngnyo dibaba' koluar jam.

²³ Obai urakng tuho Musa pocayo, jadi sia' kinyo gola' molawatn porintah rajo Mesir. Sia' moombakan Musa somanah tigo bulatn obai sia' moniant io ia'an bobia' kocit inyo kotakng boi'.

²⁴ Obai Musa pocayo, jadi watu io udah angkat-bujakng io kinyo honda' di sobut ana' doi' putri rajo Mesir.

²⁵ Io momilih mondorita' bosamo umant Allah daripado hidup dalapm dosa di istana rajo inyo mombulah io sonang pakai' somontaro aja'.

²⁶ Io bopikir mongona'i upah inyo dionju' Allah nononyo. Obai nantai, io mooso aman io dihanyam demi Rajo Inyo Dijanjian Allah, hal nantai lobih borogo daripado somuo kodampuan di nogori Mesir inyo ulih monjadi umputn io.

²⁷ Obai Musa pocayo, jadi io borani moninggalan Mesir. Io kinyo gola' dikogodi'i Rajo Mesir. Io totap botahatn mohadapi pondorita'an soakatn-akatn io ulih moniantAllah inyo kinyo ulih di tiat pakai' mato.

²⁸ Obai Musa pocayo, jadi io moadoan Paskah ongko monyiuh urakng Israel momociran darah ana' domba di tihakng lawakng rumah sia' oca' boko ana' kojula'an sia' kinyo dibunuh Molekat Komatian.

²⁹ Obai urakng Israel pocayo, jadi sia' ulih monyomboraki Lout Mirah, sama'an sia' bojalatn di tanah darat. Apo, watu urakng Mesir moncubo monyomborakng jam, sia' tonggolapm.

³⁰ Obaiurakng Israel pocayo, jadi sia' mombulah boko tembok kota Yerikho ruruh lopas sia' mongolilikinyo somanah tujuh ari.

³¹ Rahab ia'an lahukng. Apo, obai io pocayo, jadi io kinyo jumpat bonaso bosamo agatn boko urakng di kota io inyo molawatn Allah. Obai, io monulukng boko urakng doi' Israel inyo mohimpo kota io.

³² Ija' banya' agi' urakng inyo ulih aku sobut'an. Apo watunyo kinyo cukup pakai' bopandir mongona'i Gideon, Barak, Simson, Yefta, Daud, Samuel, ongko boko nabi.

³³ Obai sia' pocayo, jadi sia' mongalahan boko koraja'an, sia' bulah inyo bondar, sia' mondapat borokat inyo dijanjian Allah. Ado doi' sia' inyo mongatupan nyao boko singa.

³⁴ Ado inyo suba' solamant doi' api inyo kotakng honggur. Ado inyo udah lopas doi' urakng inyo honda' mombunuh sia'. Sia' lomah, apo monjadi kuat. Sia' monjadi kuat dalapm boparakng sampai sia' ulih mongalahan boko tontara banso asikng.

³⁵ Boko botina' bobali' monorima' urakng doi' koluarga sia' inyo udah mati obai sia' bobali' hidup. Apo ado jam boko urakng inyo rela didorako'i sampai mati. Aman sia' botongga' pocayo, sia' ulih dibebasan. Apo sia' totap pocayo oca' lopas sia' dihukupm mati, sia' tajahan hidup agi' lalu mondapat'an hidup inyo lobih boi' di sorugo.

³⁶ Ado boko urakng inyo pocayo inyo dihanyam, dicambuk, dikobat agatn rantai ongko inyo ditamoan ko dalapm ponjara.

³⁷ Sia' ditikapm agatn batu sampai mati, ado inyo disayat agatn gorgaji, ongko inyo dibunuh agatn podakng. Ado inyo kinyo ado kodiapan huatan bayo bopakaian inyo dipulah doi' kulit domba damo kulit kambikng. Sia' jaro, bouyuh-bojorih ongko didorako'i.

³⁸ (Dunia ni'in bukainyo tompat inyo cucu' pakai' somuo urakng nantai.) Ado doi' sia' inyo conyiant kodiapan. Sia' bodiapm di padakng pasir mo damo diboko bukit, damo diboko gua, kondua'annyo di boko lubakng tanah.

³⁹ Allah sonang agatn somuo urakng ni'in obai sia' pocayo. Apo sia' bolupm dapat boko hal inyo dijanjian Allah

⁴⁰ obai Sio ado hajat inyo lobih boi' pakai' kito. Ia'an nantai sia' monjadi sompurna nononyo pado watu inyo samo agatn kito.