Ibrani 10 - Porjanjian Boharu Torjomahan Baso Dilakng Soari-ari

Kristus nam posombahan inyo bondar-bondar mohapus dosa

¹ Porintah ongko poraturan di dalapm Hukupm Torat bayo sama'an kiasan mo doi' boko hal inyo boi' inyo datakng molalu'i Kristus. Hukupm Torat nantai kinyo monunju'an kosolamant'an inyo sobondarnyo. Obai nantai, boko urakng inyo datakng torus-monorus mombaba' posombahan inyo samo sotiap tohutn, sia' kinyo mungkitn monjadi sompurna di hadapan Allah agatn caro monuruti Hukupm Torat sama'an nantai.

² Soandainyo sia' inyo monyombah Allah agatn caro nantai, bondar-bondar monjadi borosih doi' dosa sia', jadi sia' kinyo paca'an mooso obai sia' ija' bodosa. Lopasnyo sia' mombaba' sokali kurbatn posombahan, sia' kinyo paca'an mombaba' posombahan agi'.

³ Apo obai boko kurbatn bonatakng nantai diposombahan sia' sotiap tohutn, justru mombulah sia' toingant agatn boko dosa sia'.

⁴ Obai, darah sapi sabukan agatn darah kambikng sabukan co mungkitn mohapus dosa.

^5-6 Obai nantai am watu Kristus datakng ko dunia ni'in, Sio bopandir ko Allah, “Duatn kinyo mohonda'i kurbatn bonatakng ongko posombahan. Duatn kinyo sonang agatn posombahan inyo ditunu'i. Duatn kinyo sonang agatn kurbatn bonatakng inyo di onju' oca' dosa urakng diamputi. Apo Duatn udah moonju' bukakng-tubuh pakai'-Ku.

⁷ Lalu Aku bopandir: ‘Ninam aku, oi Allah! Aku datakng pakai' molabuhan kohonda' Duatn, sama'an inyo di tulis mongona'i Aku di Buku Suci.’”

⁸ Dalapm pomandiran nantai, potamo-tamo Kristus bopandir, “Duatn kinyo mohonda'i kurbatn bonatakng ongko posombahan. Duatn kinyo sonang agatn posombahan inyo ditunu'i. Duatn kinyo sonang agatn kurbatn bonatakng inyo di onju' oca' dosa urakng di amputi.” Padohal, somuonyo nantai diposombahan monurut Hukupm Torat.

⁹ Lopas nantai Kristus bopandir, “Ninam Aku, oi Allah! Aku datakng pakai' molabuhan kohonda' Duatn.” Jadi, agatn pomandiran nantai, Sio mombalakan caro potamo inyo dipakai, pakai' mohapus dosa ongko monggonti'inyo agatn caro inyo boharu.

¹⁰ Obai, memang Yesus Kristus udah molabuhan kohonda' Allah. Ia'an, Sio momposombahan bukakng-tubuh-Nyo siku' sokali mo pakai' somanah-manahnyo. Sio molabuhan nantai oca' kito di borosihi doi' dosa kito.

¹¹ Monurut caro potamo, somuo imam molabuhan tugas sia' sotiap ari. Sia' boulakng-ulakng momposombahan boko kurbatn inyo samo. Apo, boko kurbatn nantai samo sokali co mohapusan dosa.

¹² Apo Kristus momposombahan sobuti' kurbatn mo pakai' somanah-manahnyo, ia'an diri-Nyo siku', pakai' mohapusan dosa. Lopas nantai, Sio dudu' di tompat inyo tohormat di sopia' kanan Allah.

¹³ Watu ni'in Sio monanti sampai Allah mombulah boko musuh-Nyo tundu' ko kuaso-Nyo.

¹⁴ Agatn momposombahan sobuti' kurbatn nantai, Sio mombulah oca' boko urakng ulih monjadi borosih doi' dosa sia'. Sio mombulah sia' monjadi sompurna pakai' somanah-manahnyo.

¹⁵ Roh Allah bosasi ko kito mongona'i nantai jam. Sio bopandir,

¹⁶ “Lopas watu nantai, sama'an ni'in pojanjian inyo tajahan Ku pulah agatn umant Israel: Aku tajahan moangga'an boko porintah-Ku dalapm pikiran sia' Aku tajahan monulisnyo dalapm hati sia'.”

¹⁷ Ongko Tuhatn bopandir agi', “Aku tajahan moamputi kosalahan sia', ongko kinyo monggonang agi' boko dosa sia'.”

¹⁸ Obai somuo dosa nantai udah diamputi, jadi conyiant kurbatn agi' inyo gola' diposombahan pakai' mohapus dosa.

Datakng ko Allah agatn totap pocayo biar pan mohadapi pondorita'an

^19-20 Jadi, boko somadikan, obai Yesus mati pakai' kito, jadi watu ni'in kito ulih mansu' ko dalapm hadirat Allah. Samo sama'an sia' ulih mansu' ko bolikat tidikng ia'an ko dalapm Ruakan Maho Suci di Rumah Allah. Obai, bukakng-tubuh Yesus siku' monjadi tidikng nantai. Sio udah mombuka' jalatn boharu nantai pakai' jalatn kito inyo moonji'i kohidupan.

²¹ Sio ia'an Imam Agukng kito inyo momimpitn Rumah Allah.

²² Obai nantai, mara kito datakng dampikng ko Allah agatn hati inyo boi' ongko bondar-bondar kuat pocayo. Obai, hati kito udah diborosihi doi' pikiran jahat, ongko bukakng-tubuh kito udah diborosihi agatn ara'i inyo murni.

²³ Mara kito yakitn moharap'an somuo inyo dijanjian Allah. Nantai am harapan inyo udah kito pocayo'i. Kito ulih moyakiti mongona'i nantai obai Sio inyo monjanjiannyo hala ulih dipocayo.

²⁴ Mara kito hala monulukng inyo bukai ongko hala moingant'an inyo bukainyo pakai' mongasihi ongko bulah koboi'an.

²⁵ Jangannam kito botongga' bokumpul sombayakng, sama'an inyo udah biaso dilabuhan boko urakng. Apo, mara kito hala monguat'an hati inyo bukainyo, lobih-lobih agi' obai kito udah tohu kinyo manah agi' Tuhatn tajahan bobali' datakng.

²⁶ Obai, aman kito songajo bulah dosa lopas kito monorima' ajaran inyo bondar, jadi conyiant kurbatn posombahan agi' inyo ulih mohapus dosa nantai.

²⁷ Kito bayo monanti hukupan doi' Allah, ia'an api inyo honggur inyo tajahan mombonasoan somuo urakng inyo molawatn Sio!

²⁸ Watu joman komai, aman duo damo tigo urakng bosasi obai ado urakng inyo monula' Hukupm Allah inyo dionju' Musa, jadi urakng nantai dihukupm mati. Conyiant amputn-adilnyo inyo ditunju'an ko io.

²⁹ Jadi, urakng inyo kinyo morogo'i Ana' Allah cucu' dihukupm lobih borat agi'. Urakng nantai moremehan darah Yesus inyo mombulah io monjadi borosih doi' dosanyo, ia'an darah Yesus inyo monsahan pojanjian boharu doi' Allah. Urakng nantai mohayam Roh Allah inyo monunju'an kasih karunia.

³⁰ Pasti urakng sama'an nantai tajahan kotakng nontu dihukupm obai kito tohu Allah bopandir, “Akunam inyo bohak mombalas. Akuam inyo tajahan mohukupm!” Ado jam pomandiran ni'in, “Tuhatn tajahan mohakipi umat-Nyo.”

³¹ Jadi, ngeri' bondar aman urakng bodosa sama'an nantai huatan gola' dihukupm Allah inyo hidup.

³² Apo, ingantcam watu solopas kaitn boharu pocayo ko Yesus ongko hidup dalapm torakng. Pado watu nantai, kaitn kotakng ajab sonsaro apo kaitn totap kuat botahatn.

³³ Sowatu-watu kaitn dihanyam huatan disiksa di hadapan urakng banya'. Kadakng pan kaitn jumpat mondorita' agatn urakng inyo dipoulahan sama'an nantai.

³⁴ Kaitn jumpat mondorita' agatn sia' inyo ditamoan ko ponjara. Timpu kodampuan kaitn dirampas, kaitn totap sonang-nyaman. Obai, kaitn tohu kaitn ija' ado kodampuan inyo lobih boi', ia'an kodampuan di sorugo inyo tahatn somanah-manahnyo.

³⁵ Obai nantai, jangannam kaitn monyorah. Aman kaitn totap kuat pocayo, jadi nononyo kaitn tajahan bodapat upah bosar.

³⁶ Kaitn gola' sabar botahatn oca' kaitn ulih molabuhan kohonda' Allah. Agatn sama'an nantai, kaitn tajahan monorima' borokat inyo Sio janjian.

³⁷ Ingantcam pomandiran inyo ditulis ni'in di Buku Suci: “Sio inyo tajahan datakng kinyo paca'an monunda'-nunda'. Kinyo manah agi', Sio datakng.

³⁸ Umant-Ku inyo bondar paca'an pocayo, jadi sia' tajahan bodapat hidup inyo sobondar-bondarnyo. Apo aman ado inyo mundur jadi Aku co sonang agatn io.”

³⁹ Apo kito bukainyo boko urakng inyo mundur ongko bonaso kito ia'an boko urakng inyo pocayo huatan disolamant'an.