Ibrani 1 - Porjanjian Boharu Torjomahan Baso Dilakng Soari-ari

Allah bopandir ko kito molalu'i Ana'-Nyo

¹ Ija' joman komai mo, Allah bopandir ko angki-bayatn kito molalu'i boko nabi. Allah bopandir nanam-konanam ko sia' agatn bomacapm caro.

² Apo, watu ari-ari toahir ni'in Allah bopandir ko kito molalu'i Ana'-Nyo. Allah udah monotap'an Ana'-Nyo inyo bohak momuku'i somuo hal. Molalu'i Sio, Allah mombulah sogolintaran alapm.

³ Sio momancaran komulia'an Allah. Sio nam gambar inyo nyata doi' diri Allah siku'. Somuo hal totap botahatn doi' pomandiran-Nyo inyo bokuaso. Lopas Sio mati oca' monsio ulih diborosihi doi' boko dosa, lalu Sio noi' ko sorugo ongko dudu' di tompat inyo tohormat di sopia' kanan Allah inyo kotakng bokuaso.

⁴ Jadi, Sio jouh lobih tohormat doi' boko molekat. Sio dionji'i damo inyo jouh lobih tohormat doi' damo inyo dionju' ko sia'.

Ana' Allah lobih pontikng doi' boko molekat

⁵ Kito tohu nantai obai Allah kinyo kalo bopandir sama'an ni'in ko siku' molekat pan, “Kolai ia'an Ana'-Ku. Sari ni'in Aku udah monunju'an obai Aku ninam Bopai Kolai.” Allah pan kinyo kalo bopandir sama'an ni'in mongona'i ko siku' molekat, “Aku tajahan monjadi Bopai-Nyo, ongko Io tajahan monjadi Ana'-Ku.”

⁶ Apo watu, Allah moutus Ana'-Nyo inyo kojula'an ko dunia ni'in, Allah bopandir, “Somuo molekat Allah gola' monyombah Io.”

⁷ Allah bopandir dinga' ni'in mongona'i boko molekat, “Allah mombulah boko molekat-Nyo monjadi angin, boko hulutn-Nyo monjadi api bonyalo.”

⁸ Apo Allah bopandir dinga' ni'in mongona'i Ana'-Nyo, “Duatn, oi Allah, momorintah di pucu' tahta Duatn somanah-manahnyo. Duatn momorintah agatn adil di dalapm Koraja'an Duatn.

⁹ Duatn sonang aman urakng bulah inyo bondar, apo Duatn kinyo sonang aman urakng mombulah inyo jahat. Nantai am sobabnyo Allah, Allah Duatn monuyungan minya' di pucu' Duatn sobagai tando Sio mohormati Duatn lobih doi' boko pokawalan Duatn. Ponghormatan nantai mombulah Duatn sonang-nyaman.”

¹⁰ Allah pan bopandir dinga' ni'in mongona'i Ana'-Nyo, “Doi' mulonyo, oi Tuhatn, Duatn mombulah bumi. Duatn mombulah langit agatn jari Duatn siku'.

¹¹ Somuonyo nantai paca'an lonyap, apo Duatn totap ada'an somanah-manahnyo. Langit ongko bumi ni'in paca'an monjadi samo sama'an pakai'an inyo buru'.

¹² Duatn tajahan molipat sogolintaran alapm samo sama'an jubah dilipat Duatn tajahan monggonti sogolintaran alapm ni'in samo sama'an urakng monggonti pakai'an. Apo Duatn totap samo somanah-manahnyo. Duatn kinyo tajahan boahir.”

¹³ Allah pan bopandir dinga' ni'in ko Ana'-Nyo, bukainyo ko boko molekat-Nyo, “Dudu' cam di tompat inyo tohormat di sopia' kanan-Ku, Dudu' cam di santai sampai Aku mombulah boko musuh Kolai tundu' agatn kuaso Kolai.”

¹⁴ Apo boko molekat ia'an boko roh inyo molayati Allah. Sia' diutus pakai' monulukng boko urakng inyo tajahan monorima' kosolamant'an.