Galatia 6 - Porjanjian Boharu Torjomahan Baso Dilakng Soari-ari

Kohonda'nyo kaitn gola' hala bontulukan

¹ Boko somadikan, aman siku' urakng di antaro kaitn ditomuan bulah dosa. Jadi, kaitn inyo hidupnyo dipimpitn Roh Allah gola' monulukng urakng nantai. Kaitn gola' monulukng io oca' io tongga' bulah dosa nantai. Apo, kaitn gola' molabuhan nantai agatn hati inyo tulus. Boboi'cam! Ingant, jangan sampai kaitn pan bulah dosa jam.

² Kohonda'nyo kaitn gola' hala bontulukan, monulukng kosusahan urakng bukai. Nantaiam kaitn hidup sosuai agatn porintah Kristus pakai' salikng mongasihi.

³ Mungkitn ado urakng inyo kinyo honda' monulukng urakng bukai obai io moanggap dirinyo lobih pontikng doi' urakng bukai. Urakng inyo bopikir salah sama'an nantai, sobondarnyo io kinyo pontikng. Nantai, io bayo ngontumbuki dirinyo siku'.

⁴ Jadi, jangan mombandikan diri kaitn agatn urakng bukai. Poriso'icam porbuatan kaitn siku'. Agatn caro nantai, kaitn ulih bangga obai porbuatan kaitn siku', bukai obai kaitn moanggap diri kaitn lobih boi' doi' urakng bukai.

⁵ Sotiap urakng gola' botanggukng jawab agatn porbuatan diri kaitn siku'.

⁶ Urakng inyo monorima' ajaran doi' Allah gola' monulukng kohidupan urakng inyo mongajarnyo.

⁷ Jangan ngontumbuki diri siku'! Co nyiant urakng inyo ulih mompormainan Allah. Sotiap urakng paca'an mondapat'an sosuai agatn porbuatannyo.

⁸ Urakng inyo hidup sosuai agatn kohonda' dirinyo siku' paca'an bonaso. Apo urakng inyo hidup sosuai agatn kohonda' Roh Allah paca'an mondapat'an hidup somanah-manahnyo doi' Roh Allah.

⁹ Obai nantai, jangan botongga' bulah koboi'an. Pado watu inyo ditontuan Allah, kito paca'an mondapat'an somuo inyo dijanjian-Nyo. Kito paca'an mondapat'annyo, aman kito kinyo botongga' bulah koboi'an.

¹⁰ Obai nantai, huncapm kito bulah koboi'an sotiap kali ado kosompatan. Huncapm kito bulah koboi'an ko somuo urakng, hususnyo ko sosamo urakng inyo pocayo agatn Yesus.

Paulus Moahiri suratnyo

¹¹ Pontiat'ancam kotakng bosar tulisan ni'in. Aku monulis agatn jariku siku'.

¹² Ado boko urakng inyo honda' mompangkakan kohebatan diri siku' dalapm boko hal inyo kotiat'an. Sia' nantaiam inyo bousaha momoso kaitn pakai' bosunant oca' kaitn ulih disolamant'an, bukainyo bayo obai Kristus mati di kayu salib. Sia' molabuhan nantai oca' sia' kinyo didorako'i boko urakng yahudi.

¹³ Sia' nantai udah disunant. Apo sia' kinyo monaati somuo porintah huatan poraturan Allah inyo ditulis Musa dalapm buku Hukupm Torat. Sia' bayo honda' kaitn disunant oca' sia' ulih mombuhau'i.

¹⁴ Apo aku kinyo buhau agatn porbuatan la'apo pan inyo aku labuhan. Aku bayo sonang agatn porbuatan Yesus Kristus. Sio mati di kayu salib pakai' mombuka' jalatn oca' urakng ulih disolamant'an. Sio nantai Tuhatn kito, ia'an kito inyo pocayo ko Sio. Obai nantai, ubonyo aku pan disaliban tohadap somuo hal inyo duniawi. Aku kinyo morogo'i boko hal inyo dirogo'i boko urakng inyo ado di dunia ni'in. Boko urakng inyo ado di dunia ni'in pan kinyo morogo'i boko hal inyo aku rogo'i.

¹⁵ Disunant kata'an co bosunant nantai co nyiant bedanyo. Inyo pontikng ia'an kito hidup agatn caro inyo boharu.

¹⁶ Aku bodoa oca' Allah moonji'i sonang-asau ko somuo urakng inyo hidup sama'an nantai. Aku bodoa oca' Allah jam monunju'an koboi'an-Nyo ko kito. Kito ninam inyo monjadi umant Allah inyo bondar.

¹⁷ Aku didorako'i obai aku rasul Yesus. Di bukakngku ija' ado bokas boko luko didorako'i. Obai nantai, mula'i doi' ni'in, jangannam ado urakng inyo monyusahan aku.

¹⁸ Boko somadikan, Aku bodoa oca' Tuhatn kito Yesus Kristus hala momborokati kaitn. Amin!