Galatia 5 - Porjanjian Boharu Torjomahan Baso Dilakng Soari-ari

Yesus mombebasan kito doi' boko poraturan agama

¹ Kristus udah mombebasan kito oca' kito bondar-bondar bebas. Obai nantai am, jangan bobali' agi' samo sama'an hulutn inyo gola' momikul bobatn.

² Aku, Paulus, inyo bopandir ko kaitn. Dinga'ancam pomandiranku! Aman kaitn disunant, jadi komatian Kristus pakai' kaitn kinyo paca'an boguno.

³ Sokali agi' aku mongatoan ko kaitn. Somuo urakng inyo moonju' dirinyo pakai' disunant, sia' gola' monaati somuo Hukupm Torat.

⁴ Aman kaitn bousaha bulah diri kaitn monjadi bondar di hadapan Allah agatn caro monaati Hukupm Torat, rotinyo kaitn momotusan hubukan agatn Kristus. Agatn ubo nian kaitn monula' koboi'an Allah.

⁵ Apo kito pocayo ko Yesus huatan Roh Allah monulukng kito. Aman ubo nian, kito monantian agatn yakitn huatan moharap watunyo Allah moanggap kito bondar.

⁶ Obai, hal bosunant kata'an kinyo bosunant co nyiant bedanyo di kito inyo ado di dalapm Kristus Yesus. Inyo pontikng ia'an aman kito pocayo ko Yesus huatan kopocaya'an nantai monyurukan kito pakai' mongasihi urakng bukai.

⁷ Sokomai kaitn monunju'an komajuan cukup boi' watu tuyut Yesus. Jangan dilongahan urakng bukai honda' mohalak-halaki kaitn. Jangan sampai kaitn co monaati ajaran inyo bondar.

⁸ Allah moningkau kaitn pakai' monjadi pongikut Yesus. Ajaran inyo salah nantai kinyo doi' Sio.

⁹ Ingantcam: Kojahatan inyo kotiat'annyo kocit ado pongaruh bosar samo sama'an sodikit ragi mompongaruhi adonan roti oca'nyo mongombakng.

¹⁰ Apo Tuhatn bulahku yakitn obai kaitn kinyo paca'an pocayo ko ajaran inyo bukainyo doi' ajaranku. Allah paca'an mohukupm sopo pan urakngnyo inyo mongacauan pikiran kaitn.

¹¹ Aku ija' didorako'i ulih sia' inyo pocayo obai boko urakng gola' disunant oca' ditorima' Allah. Jadi, pasti aku kinyo momboritoan mongona'i sunant. Aku momboritoan mongona'i caro Yesus mati di kayu salib pakai' mombuka' jalatn kosolamant'an. Soandainyo aku momboritoan mongona'i sunant daripado mongona'i komatian Yesus nantai, ongko aku kinyo paca'an bulah sia' godi sama'an aku agi'.

¹² Apo, bayo bosunant ja'am kinyo cukup pakai' boko urakng nantai inyo mongacauan pikiran kaitn. Lobih boi' sia' monota' butuh sia' somuonyo!

Roh Allah mombimbikng oca' hidup monyonangan Allah daripado kohonda' monsio

¹³ Boko somadikan, kaitn udah dipilih Allah pakai' monjadi urakng inyo bebas. Apo nantai kinyo boroti kaitn bebas pakai' hidup sosuai agatn kohonda' diri kaitn inyo jahat. Sobali'nyo, hala molayati siku'-monyiku' agatn ponuh kasih.

¹⁴ Obai somuo porintah ongko poraturan Allah di buku Hukupm Torat tocakup dalapm sobuti' porintah, “Kasihicam sosamo kolai sama'an kolai mongasihi diri kolai siku'.”

¹⁵ Jangan sama'an bonatakng ganas inyo hala monyorakng ongko mongotap. Boboi' cam aman kaitn molabuhan inyo sama'an nantai kaitn salikng mombonasoan.

¹⁶ Dinga'anbo pomandiranku! Torus-monorus hidup sosuai kohonda' Roh Allah. Jadi, kaitn kinyo paca'an mongosihan kohonda' diri kaitn inyo jahat.

¹⁷ Kohonda' diri kaitn inyo jahat botontakan agatn kohonda' Roh Allah. Ongko kohonda' Roh Allah botontakan agatn kohonda' diri kaitn. Koduo kohonda' nantai hala bolawatan hinggatn kaitn kinyo hala molabuhan boko hal boi' inyo honda' dilabuhan.

¹⁸ Aman kaitn hidup dibimbikng Roh Allah, kaitn kinyo gola' hidup monaati Hukupm Torat.

¹⁹ Udah kotakng jolas boko porbuatan urakng inyo hidup sosuai agatn kohonda' diri inyo jahat. Sobagai contoh: Molaki-mbini di luar pokawitan, molabuhan inyo pomali, moikuti kohonda' diri siku',

²⁰ monyombah boko duato, momakai ponohu, bonci' agatn urakng bukai, boporap, mooso hiri hati, monjadi ponggodian, momontikan diri siku', monyobab'an popocahan antaro dongan somadikan,

²¹ mongohonda'i umputn urakng bukai, hala komabu'an, ngosihan nyao, ongko boko dosa inyo bukai sama'an nantai. Aku moingant'an kaitn sama'an inyo kalo kuingant'an ko kaitn sobolupmnyo: Boko urakng inyo hala molabuhan boko hal sama'an nantai kinyo paca'an monjadi warga Koraja'an Allah.

²² Apo aman kaitn hidup sosuai agatn kohonda' Roh Allah, ia'an: hala mongasihi, rindakng-rigah, hidup sonang dalapm hati, sabar, gala' monulukng, gala' bulah koboi'an, sotia,

²³ onsi' ngoroti, monguaso'i diri. Co nyiant poraturan mono pan inyo morarakng urakng honda' hidup sama'an nantai!

²⁴ Boko urakng inyo monjadi pongikut Kristus Yesus, sia' udah monyaliban somuo napsu ongko kohonda' diri inyo jahat.

²⁵ Roh Allah udah morubah hidup kito monjadi boharu. Obai niannam, kito pan gola' hala hidup sosuai agatn bimbikan Roh Allah.

²⁶ Janganam kito monjadi buhau. Janganam kito hala bulah urakng bukai godi. Janganam kito hala honda' barakng umputn urakng bukai.