Galatia 4 - Porjanjian Boharu Torjomahan Baso Dilakng Soari-ari

^1-2 Aku monogasan hal ni'in: Siku' urakng ana' paca'an monguaso'i somuo hal inyo diwarisan bopainyo dionju' ko io. Apo aman ana' nantai ija' bobia', paca'an ado boko polayatn inyo ditugasan pakai' monjago ana'nyo. Ado jam boko polayatn pakai' mourus kodampuan umputn ana'nyo nantai. Ana' inyo muda' nantai gola' monaati boko polayatn nantai. Obai nantaiam, ana' nantai samo sama'an siku' urakng hulutn. Niannam koadaan ana' nantai sampai watu inyo ditontuan bopainyo.

³ Ubo nian jam agatn kito. Komai, kito sama'an bobia' inyo ija' kocit obai kito dikuaso'i boko poraturan doi' bomacapm-macapm agama di dunia ni'in.

⁴ Apo topat watu inyo ditontuan Allah, Sio moutus Ana'-Nyo, ko dunia ni'in inyo lahir doi' siku' urakng botina'. Yesus monaati somuo porintah ongko poraturan Allah inyo ditulis Musa dalapm buku Hukupm Torat.

⁵ Jadi, Yesus diutus pakai' mombebasan boko urakng doi' kuaso Hukupm Torat. Agatn ubo nian, kito ulih ditorima' sobagai poana'an Allah.

⁶ Obai kito boko poana'an Allah, ongko Sio moutus Roh Ana'-Nyo ko kito. Roh-Nyo mansu' ko dalapm hati kito. Roh-Nyo bulah kito bodoa somombondarnyo agatn mongatoan, ‘Bopai, oi Bopaiku’.

⁷ Obai somuo inyo Allah labuhan nantai, kaitn bukainyo boko hulutnnyo agi' inyo gola' monaati Hukupm Torat. Apo kaitn udah monjadi poana'an Allah huatan monjadi waris inyo monorima' somuo hal inyo dijanjian-Nyo.

Paulus kuatir boko urakng Galatia co pocayo agi' Kabar Boi' inyo bondar

⁸ Apo komai, kaitn bolupm ado hubukan agatn Allah. Kaitn monyombah boko duato inyo kinyo bondar. Kaitn monjadi boko hulutn boko duato nantai.

⁹ Apo ni'in kaitn udah ado hubukan agatn Allah. Kata'an lobih topat aman aku mongatoan obai Allah inyo bulah hubukan agatn kaitn. Obai nantai, jangan bobali' agi' monaati boko roh dunia inyo co bokuaso huatan co nyiant gunonyo. Jangan monjadi boko hulutn sia'.

¹⁰ Kaitn ija' morayaan boko ari pado boko bulatn, boko musipm, boko tohutn totontu.

¹¹ Jadi, aku kuatir aman uyuh jorihku pakai' kaitn monjadi co nyiant rotinyo.

¹² Ni'inan, boko somadikan, aku muhun oca' kaitn monjadi samo sama'an aku. Obai aku pan monjadi samo sama'an kaitn. Sokomai, kaitn hala boi' hati agatn aku.

¹³ Pasti kaitn ija' ingant potamo kali aku datakng ko kaitn. Aku sampat momboritoan Kabar Boi' ko kaitn obai bukakng-tubuhku boponyakit.

¹⁴ Biar pan watu nantai bukakng-tubuhku boponyakit, hal nantai kinyo bulah kaitn pakai' monula' damo mohayam aku. Apo malahan sobali'nyo. Kaitn monorima' aku agatn boi' samo sama'an kaitn monorima' molekat damo Kristus Yesus siku'.

¹⁵ Timpu nantai, kaitn mooso diborokati. Aku yakitn kaitn siap monulukng aku agatn caro la'apo pan. Kaitn pan siap moncungkil mato kaitn siku' ongko moonju' ko aku aman soandainyo hal nantai ulih monulukng aku. Apo ni'in kaitn mooso kinyo sonang agatn aku.

¹⁶ Aku totap momandiran la'apo inyo bondar ko kaitn. Kata'an obai nantaiam kaitn moanggap aku sobagai musuh?

¹⁷ Ni'inan ado boko urakng inyo mongajar obai kaitn gola' monaati somuo Hukupm Torat. Sia' rajitn bousaha mondudus kaitn pakai' moikuti sia'. Apo, tujuan sia' kinyo boi'. Sia' honda' monyongkayoan kaitn doi' ajaran aku inyo bondar. Sia' honda' molabuhan nantai oca' kaitn rajitn bopihak ko sia' mo.

¹⁸ Memang boi' aman kaitn rajitn apo aman kaitn rajitn agatn tujuan inyo boi'. Kaitn gola' hala mongikuti ajaran inyo bondar, bukainyo bayo aman aku ado bosamo agatn kaitn.

¹⁹ Uai boko poana'anku. Aku ajab sonsaro agi' samo sama'an siku' urakng botina' ajab sonsaro tongahan mohidap-porut. Aku paca'an hala ajab sonsaro sampai kaitn monjadi samo sama'an Kristus.

²⁰ Aku kotakng togonang ado bosamo agatn kaitn watu ni'in oca' aku ulih bopandir ko kaitn agatn caro inyo lobih boi'. Obai aku udah alah-gupuh am agatn kaitn.

Contoh doi' Hagar urakng hulutn ongko Sara urakng bebas

²¹ Ni'inan aku momadahan ko kaitn inyo honda' hidup dibabah kuaso somuo porintah huatan poraturan Allah inyo ditulis Musa dalapm buku Hukupm Torat. Sobondarnyo kaitn mongoroti cado agatn tulisan Musa?

^22-23 Obai di dalapm boko buku Musa ado kisah ni'in: Abrahapm bisi duo ana' lolaki. Siku' urakng ana' dilahiran siku' urakng hulutn. Ana' nantai dilahiran sosuai agatn hajat monsio. Ana' Abrahapm inyo koduo dilahiran siku' urakng bebas. Ana' nantai dilahiran sosuai agatn hajat Allah.

^24-25 Koduo poindaian nantai molambakan duo porjanjian Allah. Hagar molambakan Hukupm Torat inyo Allah onju' ko Banso Yahudi di Gunung Sinai di nogori Arab. Hagar boana'an poana'an inyo monjadi hulutn. Jadi, Hagar pan molambakan Yerusalem watu ni'in di dunia, obai sia' samo sama'an hulutn inyo hidup toposo monaati Hukupm Torat.

²⁶ Apo indai inyo molambakan Yerusalem di sorugo ia'an urakng bebas. Io samo sama'an indai kito.

²⁷ Ajaran nantai totulis dalapm Buku Suci, “Hai kolai inyo komai manang inyo kinyo kalo boana'an; ni'inan rindakng-rigahcam! Hai kolai inyo co kalo ajab sonsaro mohidap-porut; ni'inan rindakngcam ongko bosura'-lahap! Obai komai, kolai rambakng. Apo kolai paca'an bisi lobih banya' koturutan daripado botina' inyo bolaki.”

²⁸ Boko somadikan! Kaitn samo sama'an Ishak obai samo-samo lahir obai janji Allah.

²⁹ Watu joman komai, ana' inyo dilahiran sosuai agatn kuaso Roh Allah didorako'i ulih ana' inyo dilahiran sosuai agatn hajat monsio. Hal nantai jam tojadi watu ni'in.

³⁰ Apo, dinga'ancam pomandiran ni'in doi' Buku Suci “Tundukng ja'am botina' hulutn nantai agatn ana'nyo. Obai, ana' doi' hulutn nantai kinyo paca'an bodapat kodampuan doi' bopainyo. Ongkah ana' doi' botina' inyo bebas paca'an dionji'i ulih bopainyo.”

³¹ Jadi, boko somadikan, ku togasan: Kito bukainyo sama'an boko poana'an doi' botina' hulutn nantai. Apo kito sama'an boko poana'an doi' botina' inyo bebas.