Galatia 3 - Porjanjian Boharu Torjomahan Baso Dilakng Soari-ari

Kito dianggap bondar di hadapan Allah bayo aman kito pocayo ko Yesus

¹ Boko somadikan di Galatia. Kaitn urakng budu! Kaitn udah dikotumbuki ulih ajaran urakng bukai! Sobondarnyo aku udah kalo monorakan agatn kotakan jolas mongona'i komatian Yesus Kristus di kayu salib.

² Timbasibo potakutanku ni'in: Ma'apo kaitn monorima' Roh Allah? Apobai kaitn monorima' Roh Allah obai kaitn monaati somuo porintah huatan poraturan Allah inyo ditulis Musa dalapm buku Hukupm Torat? Samo sokali cado! Kaitn monorima' Roh Allah obai kaitn pocayo Kabar Boi' mongona'i Yesus inyo aku boritoan ko kaitn!

³ Doi' watu nantai, Roh Allah moonji'i kokuatan huatan bimbikan ko kaitn oca' kaitn ulih hidup monyonangan hati Allah. Apobai kaitn bopikir watu ni'in kaitn ulih moncapai tujuan nantai agatn kokuatan siku'? Jangan kotakng budu!

⁴ Kaitn udah banya' moalapi ajab sonsaro obai pocayo ko Yesus. Jangan sampai somuo ajab sonsaro nantai co nyiant gunonyo.

⁵ Allah moonju' Roh-Nyo ko kaitn. Sio molabuhan banya' mujisat di antaro kaitn. Allah molabuhan nantai obai kaitn monaati somuo porintah huatan poraturan Allah inyo ditulis Musa dalapm buku Hukupm Torat? Samo sokali cado! Allah molabuhan nantai obai kaitn pocayo Kabar Boi' mongona'i Yesus inyo ku boritoan ko kaitn.

⁶ Hal nantai samo sama'an inyo tojadi agatn Abrahapm. Abrahapm pocayo ko Allah. Obai nantaiam, “Abrahapm dianggap bondar di hadapan Allah.”

⁷ Jadi, kaitn gola' mongoroti obai urakng inyo bondar-bondar umant Allah ia'an urakng inyo pocayo ko Allah.

⁸ Doi' komai, Allah ado hajat pakai' urakng bukainyo Yahudi. Aman sia' pocayo, jadi sia' dianggap bondar di hadapan Allah. Allah momboritoan Kabar Boi' nantai ko Abrahapm jouh-jouh ari sobolupmnyo. Kabar Boi' nantai totulis dalapm Buku Suci:, “Somuo banso paca'an diborokati molalu'i kolai.”

⁹ Jadi, Allah momborokati boko urakng pocayo, samo sama'an Abrahapm diborokati obai io pocayo ko Allah.

¹⁰ Apo sotiap urakng inyo bayo bousaha monaati Hukupm Torat, komungkitan paca'an kona' tulah, obai mungkitn sia' co ulih hala monaati somuo porintah huatan poraturan Allah nantai. Obai ado totulis dalapm Buku Suci: “Allah paca'an mohukupm boko urakng inyo kinyo hala sotia monaati somuo Hukupm Torat.”

¹¹ Jadi, urakng dianggap bondar di hadapan Allah bukainyo agatn caro monaati Hukupm Torat. Hal nantai udah jolas obai di dalapm Buku Suci ado pomandiran bukai agi' inyo totulis: “Boko urakng inyo pocayo ko Allah paca'an dianggap bondar di hadapan Allah. Sia' paca'an mondapat'an hidup inyo sobondarnyo.”

¹² Apo caro hidup monaati Hukupm Torat kinyo samo agatn caro hidup pocayo ko Allah. Malahan sobali'nyo, ‘boko urakng inyo bousaha monaati Hukupm Torat, sia' paca'an hala momporhatian porintah huatan poraturan nantai dalapm hidup sia'.’

¹³ Sobondarnyo, kito somuo gola' dihukupm obai kito kinyo hala ulih monaati somuo porintah huatan poraturan Allah inyo ditulis Musa dalapm buku Hukupm Torat. Apo Kristus monyolamant'an kito doi' hukupan nantai. Sio inyo monanggukng hukupan nantai pakai' kito. Watu Sio mati di kayu salib. Obai ado totulis dalapm Buku Suci, “Urakng inyo dipaku di kayu salib ia'an urakng inyo dihukupm Allah.”

¹⁴ Watu Yesus Kristus monyolamant'an kito doi' hukupan nantai, borokat inyo dionji'i ko Abrahapm dionji'i jam ko boko urakng bukainyo Yahudi. Solaitn nantai, aman kito pocayo ko Yesus, kito pan ulih monorima' Roh inyo dijanjian Allah.

Janji Allah lobih kuat daripado boko poraturan

¹⁵ Boko somadikan, aku moonji'i contoh inyo opat dialapi monsio. Umpamonyo, ado duo urakng inyo bulah sobuah porjanjian. Lopas jadi porjanjian nantai disahan, co nyiant siku' urakng pan inyo dapat mombalakan porjanjian nantai. Co nyiant siku' urakng pan inyo ulih monambahan sosuatu ko dalapm porjanjian nantai. Biar pan porjanjian nantai bayo di antaro monsio, porjanjian nantai kinyo ulih borubah.

¹⁶ Apotolagi' porjanjian doi' Allah “ko Abrahapm huatan ko koturutannyo.” Buku Suci kinyo momakai kato ‘Boko koturutannyo’ obai rotinyo bukai banya' urakng. Rotinyo bayo siku' urakng, ia'an Kristus.

¹⁷ Masud aku ubo ni'in: Allah udah tolobih doholu monsahan janji-Nyo. Hukupm Torat dionju' ko Musa ompat ratus tigo puluh tohutn lopas nantai. Jadi, Hukupm Torat nantai kinyo ulih mombalakan janji Allah doi' komai. Janji Allah nantai ija' bolaku.

¹⁸ Aman umpamonyo Allah moonji'i la'apo inyo Sio janjian ko siku' urakng obai urakng nantai monaati Hukupm Torat. Nantai rotinyo poonju' nantai kinyo dionju' obai Allah monjanjiannyo. Apo inyo bondar ia'an Allah moonji'i borokat ko Abrahapm obai Sio udah bulah porjanjian agatn Abrahapm.

¹⁹ Aman ubo nian, ma'apo Allah moonji'i Hukupm Torat ko Musa? Allah moonju' Hukupm Torat nantai oca' kito tohu obai kito molanggar boko porintah Allah. Allah bomasud oca' Hukupm Torat nantai totap monjago sampai watu koturutan Abrahapm inyo dijanjian nantai datakng, ia'an Yesus. Allah moonju' Hukupm Torat nantai molalu'i boko molekat inyo monyampaiannyo ko siku' monsio sobagai porontaro Allah agatn monsio.

²⁰ Siku' urakng porontaro momontikan lobih doi' sopihak, apo Allah totap siku' mo.

²¹ Apobai nantai boroti obai Hukupm Torat bolawatan agatn boko janji Allah? Tontunyo cado! Obai, umpamonyo Allah moonji'i Hukupm Torat pakai' moonji'i kohidupan ko monsio, ongko rotinyo monsio ulih dianggap bondar di hadapan Allah agatn monaati Hukupm Torat.

²² Apo di dalapm Buku Suci totulis obai somuo urakng di dunia dikuaso'i dosa. Agatn ubo nian, la'apo inyo Allah janjian molalu'i kopocaya'an ko Yesus Kristus nantai, Sio onju' ko boko urakng inyo pocayo.

Urakng inyo pocayo ko Yesus nantai ana' Allah

²³ Sobolupm datakng watunyo pakai' pocayo ko Yesus. Hukupm Torat nantai mongurukng huatan monjago kito, samo sama'an urakng inyo monjago ponjahat di ponjara. Kito dikurukng sampai watu pakai' pocayo ko Yesus nantai dinyatoan.

²⁴ Jadi, Allah moonji'i Hukupm Torat pakai' monjago kito sampai Kristus datakng, ia'an Yesus, Rajo Inyo Dijanjian Allah. Nantai tojadi oca' kito monjadi bondar di hadapan Allah obai kito pocayo ko Yesus.

²⁵ Ni'in udah watunyo kito ulih pocayo ko Sio. Obai nantai am, Hukupm Torat kinyo monjago kito agi'.

²⁶ Kaitn udah monjadi poana'an Allah obai kaitn pocayo ko Yesus Kristus.

²⁷ Kaitn somuo inyo udah dibaptis dalapm damo Kristus. Kaitn udah monorima' Yesus samo sama'an sikuꞌ urakng inyo mongona'an pakai'an inyo boharu

²⁸ Kaitn somuo monjadi satu dalapm Kristus Yesus. Allah kinyo monyongkayoan antaro urakng Yahudi damo urakng bukainyo Yahudi; antaro hulutn damo urakng bebas; antaro lolaki damo botina'.

²⁹ Obai kaitn nantai umputn Kristus, ongko kaitn monjadi sama'an koturutan Abrahapm. Kaitn monjadi waris inyo paca'an monorima' borokat doi' Allah inyo Allah janjian ko Abrahapm.