Galatia 2 - Porjanjian Boharu Torjomahan Baso Dilakng Soari-ari

Boko rasul di Yerusalem sotuju agatn polayatan Paulus

^1-2 Lopas jadi ompat bolas tohutn, aku botula' agi' ko Yerusalem agatn bimbikan Allah. Aku ko siatn bosamo Barnabas. Titus pan tuyut bosamo aku. Di Yerusalem, ado boko pomimpitn urakng inyo pocayo. Boko pomimpitn nantai dianggap tohormat. Aku moadoan potomuan husus bayo agatn sia' mo. Dalapm potomuan nantai, aku monjolasan ko boko pomimpitn nantai isi Kabar Boi' inyo aku boritoan ko boko banso bukai Yahudi. Aku monjolasan polayatanku nantai obai aku kuatir mungkitn polayatan aku watu komai ulih monjadi co boroti jam.

³ Titus bosamo agatn aku timpu nantai. Io nantai bukainyo urakng Yunani. Apo ruponyo sia' kinyo momoso oca' io disunant.

⁴ Memang ado boko urakng inyo monyosahan oca' urakng inyo pocayo agatn Yesus gola' disunant. Apo sia' inyo monyosahan nantai kinyo bondar-bondar pocayo agatn Yesus. Sia' mansu' dalapm kolompok kito socaro bokokolit. Sia' honda' mohalaki caro hidup kito inyo bebas doi' koharusan pakai' monaati Hukupm Torat. Kito bebas doi' nantai obai kito disolamant'an ulih mo Yesus Kristus. Apo sobondarnyo, sia' honda' oca' kito jam gola' monaati Hukupm Torat samo sama'an siku' urakng hulutn gola' monaati habakngnyo.

⁵ Apo sodikit pan koi kinyo sotuju agatn kohonda' sia' nantai. Obai koi honda' oca' kaitn hala pocayo agatn Kabar Boi' inyo bondar.

⁶ Sokali agi' somadikan, aku udah monjolasan polayatan aku ko pomimpitn di Yerusalem. Biar pan sia' dianggap tohormat, aku co poduli agatn kodudu'an sia' nantai. Obai Allah pan co poduli aman boko urakng dianggap pontikng kata'an cado. Apo boko pomimpitn nantai sotuju agatn aku. Sia' kinyo momosoan la'apo pan ko Kabar Boi' inyo aku boritoan.

⁷ Malah, sia' monjadi sadar obai Allah udah moutus aku. Allah udah moutus aku pakai' momboritoan Kabar Boi' ko urakng bukainyo Yahudi, samo sama'an Allah moutus Petrus ko urakng Yahudi.

⁸ Sia' monjadi sadar agatn nantai obai Allah udah moonji'i kuaso ko aku pakai' monjadi rasul ko urakng bukainyo Yahudi, samo sama'an Allah moonji'i kuaso ko Petrus pakai' monjadi rasul ko urakng Yahudi.

⁹ Doi' kolompok pomimpitn nantai, Yakobus, Petrus ongko Yohanes bisi tanggukng-jawab inyo kotakan bosar. Sia' monjadi sadar mongona'i koboi'an inyo Allah onju' ko aku. Watu sia' monjadi sadar agatn nantai, sia' bosalapan agatn aku ongko Barnabas. Nantai monjadi tando obai sia' sotuju agatn Kabar Boi' inyo aku boritoan. Sia' sotuju aman koi momboritoan ko urakng bukai Yahudi, huatan sia' momboritoan ko urakng Yahudi.

¹⁰ Sia' bayo momuhun oca' koi hala monulukng urakng jaro. Memang aku udah somombondarnyo honda' molabuhan nantai.

Paulus monogur Petrus

¹¹ Apo, suatu kali aku moolikan Petrus obai porbuatannyo salah. Nantai tojadi timpu Petrus mondataki kota Antiokhia.

¹² Dinga' ni'innan kisahnyo: Mulonyo Petrus ado di Antiokhia, io makatn bosamo-samo urakng bukainyo Yahudi inyo pocayo agatn Yesus. Lopas nian ado rombokan urakng Yahudi datakng doi' Yerusalem. Sia' diutus ulih Yakobus. Jadi, watu sia' datakng, Petrus kinyo honda' makatn agi' bosamo urakng bukai Yahudi obai io gola' disalahan ulih rombokan nantai. Io mula'i monjouhan diri doi' sia'.

¹³ Petrus molabuhan nantai pakai' monyonangan rombokan nantai. Io bulah sama'an urakng pompadah boi'. Boko urakng Yahudi inyo bukai pan moniru porbuatan Petrus inyo salah nantai. Malahan Barnabas siku' sonjumpat'an bulah sama'an sia'.

¹⁴ Porbuatan sia' kinyo sosuai agatn Kabar Boi' inyo bondar. Jadi, watu aku moniant nantai, aku monogur Petrus di muka' urakng banya'. Katoku, “Kolai urakng Yahudi. Apo kolai udah ulih hidup sama'an urakng bukainyo Yahudi. Obai nantai, jangan momoso boko urakng bukai Yahudi monaati boko poraturan agama Yahudi.”

Urakng disolamant'an aman pocayo agatn Yesus

¹⁵ Koi: Paulus, Petrus ongko urakng Yahudi bukai inyo pocayo nantai koturutan urakng Yahudi. Urakng Yahudi moanggap somuo “urakng bukai Yahudi nantai ‘urakng bodosa’.”

¹⁶ Sokomai koi bopikir sama'an nantai jam. Apo ni'in koi udah mongotohu'i obai co nyiant urakng dipohitukan bondar di hadapan Allah obai sia' monaati Hukupm Torat. Urakng dipohitukan bondar di hadapan Allah bayo obai sia' pocayo agatn Yesus. Nanam alasan koi udah pocayo agatn Kristus Yesus. Koi dipohitukan bondar di hadapan Allah obai koi pocayo agatn Kristus, bukainyo obai koi monaati Hukupm Torat. Hal nantai udah totulis dalapm Buku Suci, “Jadi co nyiant siku' urakng pan inyo dipohitukan bondar dihadapan Allah” agatn caro monaati Hukupm Torat.

¹⁷ Koi pocayo koi dipohitukan bondar di hadapan Allah obai koi pocayo ko Kristus. Apo aman udah molabuhan nantai, koi dianggap ‘urakng bodosa’ sama'an urakng bukainyo Yahudi. Apobai nantai boroti Kristus bulah koi bodosa? Pasti cado!

¹⁸ Aku udah moruntuhan ajaran obai dosa urakng diamputi aman io monaati Hukupm Torat. Nah, aman aku monumpakng boko caro sama'an nantai agi' hoyu' aku bondar-bondar monjadi urakng bodosa.

¹⁹ Hukupm nantaiam bulah aku sadar aku co ulih disolamant'an agatn caro nantai. Ni'in, aku udah dibebasan doi' monaati Hukupm Torat nantai oca' aku ulih hidup monyonangan hati Allah. Watu Kristus mati di kayu salib ubo nian jam aku pan mati.

²⁰ Obai aku kinyo hidup agi' agatn caro sama'an komai. Ni'in, Kristus monontuan caro hidupku. Aku hidup di dunia ni'in agatn caro boharu obai aku pocayo ko Sio. Sio nantai Ana' Allah inyo kotakan mongasihi aku. Sio monyorahan diri-Nyo sampai mati sobagai kurbatn inyo monggonti'i aku.

²¹ Aku co paca'an kalo monula' koboi'an doi' Allah nantai inyo sobondarnyo kito kinyo cucu' monorima'nyo! Kito kinyo ulih dipohitukan bondar dihadapan Allah aman kito bousaha monaati somuo porintah huatan poraturan Allah dalapm Hukupm Torat. Ongkonyo kito ulih dipohitukan bondar agatn caro nantai, boroti Kristus mati kinyo ado rotinyo.