Galatia 1 - Porjanjian Boharu Torjomahan Baso Dilakng Soari-ari

Salapm doi' Paulus

^1-2 Ko inyo tohormat boko kolompok urakng inyo pocayo agatn Yesus di propinsi Galatia: Surat ni'in doi' aku, Paulus, huatan pan doi' somuo urakng pocayo inyo ado bosamo agatn aku. Aku monjadi rasul bukainyo obai dipilih monsio, pan kinyo diutus ulih monsio. Aku dipilih huatan diutus ulih Rajo Inyo Dijanjian Allah, pakai' momboritoan Kabar Boi' ulih Allah Bopai. Aku pan diutus ulih Allah Bopai inyo bulah Yesus bobali' hidup doi' komatian.

³ Aku bodoa oca' Allah Bopai kito huatan Tuhatn Yesus Kristus moonji'i sonang-asau ko kaitn hala monunju'an koboi'an ko kaitn ongko Yesus jam.

⁴ Yesus monyorahan diri-Nyo huatan mati di kayu salib. Agatn porbuatan nantai, Sio monyolamant'an kito doi' hukupan boko dosa kito. Sio molabuhan nantai pakai' monyolamant'an kito doi' kojahatan inyo ado di joman ni'in jam. Somuo nantai tojadi sosuai agatn kohonda' Allah.

⁵ Huncapm kito momuji Allah somanah-manahnyo. Amin!

Bayo ado sobuti' Kabar mongona'i kosolamant'an inyo bondar

⁶ Yesus Kristus udah monunju'an koboi'an-Nyo ko kaitn. Agatn caro nantai Allah momilih kaitn pakai' hidup sosuai agatn ajaran nantai. Apo dalapm watu inyo kotakan copat kaitn udah moninggalan Allah. Ni'inan kaitn moikuti suatu ‘kabar boi'’ inyo bukai.

⁷ Apo nantai bukai Kabar Boi' inyo bondar! Boko urakng inyo moajaran nantai honda' morubah Kabar Boi' mongona'i Yesus Kristus, ia'an Rajo Inyo Dijanjian Allah. Sia' moncubo monggonti'i Kabar Boi' inyo bondar nantai agatn kabar inyo salah. Jadi, sia' bulah kaitn monjadi kacau.

⁸ Apo koi udah momboritoan ko kaitn Kabar Boi' inyo bondar. Sopo ja' inyo momboritoan ko kaitn suatu kabar boi' inyo bukai doi' nantai, mudahan Allah mohukupm sia'. Soandainyo ado di antaro koi boko rasul Yesus damo molekat doi' sorugo pan inyo momboritoan kabar boi' inyo bobeda, mudahan Allah inyo paca'an mohukupm io.

⁹ Sokomainyo koi udah momandiran mongona'i hal nantai. Ni'inan, aku momandiran pomandiran nantai agi'. Aman ado urakng inyo momboritoan ko kaitn suatu kabar boi' inyo bobeda doi' inyo udah kaitn dinga' doi' koi, mudahan Allah mohukupm urakng nantai.

¹⁰ Agatn pomandiran nantai, udah jolas aku kinyo bousaha monyonangan monsio. Aku bayo bousaha monyonangan hati Allah mo! Soandainyo aku bousaha monyonangan monsio, nantai paca'an bulah aku co agi' monjadi hulutn umputn Rajo Inyo Dijanjian Allah.

Allah momilih Paulus monjadi rasul Yesus

¹¹ Boko somadikan, aku somombondarnyo honda' oca' kaitn mongoroti mongona'i Kabar Boi' inyo aku boritoan. Kabar Boi' nantai kinyo bodasaran doi' pikiran monsio.

¹² Obai aku co monorima' borito nantai doi' monsio. Co nyiant urakng inyo moajari aku mongona'i borito nantai. Yesus Kristus siku', inyo monyatoan Kabar Boi' nantai ko aku.

¹³ Apo, sobolupm aku pocayo ko Yesus, aku hidup sosuai agatn agama Yahudi. Kaitn udah mongotohu'i caro hidupku sokomai dalapm agama Yahudi nantai. Aku kotakan mondorako'i boko urakng inyo pocayo ko Yesus. Aku bousaha pakai' mombonasoan sia'.

¹⁴ Aku kotakng rajitn bolajar somuo poraturan agama Yahudi. Aku bolajar nantai lobih doi' somuo urakng Yahudi bukai inyo soumur agatn aku. Aku jam kotakan monaati somuo poraturan doi' angki-bayatn kito nantai.

¹⁵ Apo, Allah ado hajat husus pakai' aku. Sio momilih aku watu aku ija' dalapm porut indaiku. Sio momilih aku pakai' monjadi rasul Yesus, Ana'-Nyo. Sio molabuhan nantai bukai obai aku bujur bondar, apo obai Sio kotakng boi' ko aku. Jadi, Allah sonang

¹⁶ monyatoan Yesus ko aku. Allah molabuhan nantai oca' aku momboritoan ko boko urakng bukai Yahudi mongona'i Yesus. Jadi, aku dapat pongorotian mongona'i Yesus lansukng doi' Sio siku' huatan aku co minto siku' urakng pan momadahiku.

¹⁷ Udah ado boko urakng inyo monjadi rasul Yesus sobolupm aku. Timpu nantai, sia' ado di kota Yerusalem. Apo, aku co botula' ko su'utn huatan co dipadahi ulih sia'. Aku botula' ko tanah Arab ongko bobali' agi' ko kota Damsyik.

¹⁸ Tigo tohutn lopas nian, hoyu' aku botula' ko Yerusalem. Aku honda' monomu'i rasul Petrus. Aku diapm sosamo agatn io somanah lima' bolas ari.

¹⁹ Timpu nantai aku co botomu agatn boko rasul inyo bukai kocuali Yakobus, somadikan Tuhatn Yesus.

²⁰ Allah monjadi sasi aku. Somuo inyo aku tulisan ko kolai ni'in bondar. Aku co bulah kotumbukan.

²¹ Lopas aku ado di Yerusalem, aku co mondataki boko kota bukai di propinsi Yudea nantai. Aku botula' ko boboropo kota di propinsi Siria huatan Kilikia.

²² Obai nantai, boko jomaat Kristus di Yudea bolupm kalo botomu agatn aku socaro lansukng.

²³ Sia' bayo mondinga' borito mongona'i aku. Ado boko urakng inyo momandiran, “Sokomai io mondorako'i obai koi pocayo ko Yesus. Io bousaha pakai' mombonasoan koi. Apo ni'inan io siku' momboritoan Kabar Boi' mongona'i Yesus nantai, Kabar Boi' inyo komai honda' io bonasoan.”

²⁴ Jadi, sia' momuji Allah obai Allah udah morubah caro hidupku.