Filipi 4 - Porjanjian Boharu Torjomahan Baso Dilakng Soari-ari

Paulus moonju' boboropo potunju' toahir

¹ Obai nantai, boko somadikan inyo ku kasihi, kaitn gola' totap kuat pocayo agatn Yesus. Aku togonangan kaitn somuo. Kaitn mombulahku sonang-nyamanam. Aku sonang obai kaitn ia'an hasil polayatanku samo sama'an mahkota inyo ku dapat.

² Ko Euodia ongko Sintikhe, aku kotakan momuhun oca' kaitn bosatu di dalapm Tuhatn.

³ Ko Sunsugos, kawalku inyo sotia, aku minto oca' kolai monulukng duo urakng botina' nantai. Obai, sia' udah bogota' humpas-pulas bosamo agatn aku pakai' momboritoan Kabar Boi', samo sama'an Klemens ongko boko urakng bukai inyo bokorojo bosamo agatn aku. Somuo damo sia' ado dalapm Buku Kohidupan.

⁴ Somuo kaitn gola' hala sonang-nyamanam di dalapm Tuhatn! Sokali agi' ku padahan: Sonang-nyamancam!

⁵ Honda'nyo somuo urakng ulih moniant sikap kaitn inyo boi' hati. Ingant! Tuhatn Yesus kinyo manah agi' datakng am.

⁶ Jangan gola' mongona'i lapo pan, apo bodoacam mongona'i la'apo pan. Agatn oso sukur, padahan cam ko Allah lapo inyo honda' kaitn pinto.

⁷ Jadi, Allah tajahan moonji'i kaitn sonang-asau inyo monsio kinyo mongoroti. Damai nantai tajahan monjago hati ongko pikiran kaitn di dalapm Kristus Yesus.

⁸ Ahirnyo, boko somadikan ku, kaitn gola' hala momikiran mongona'i boko hal inyo bondar, inyo patut dirogo'i, inyo adil, inyo borosih doi' kojahatan, inyo manis, inyo loma' didinga'. Pokoknyo, pikiran cam mongona'i la'apo pan inyo boi' ongko patut dipuji.

⁹ Solaitn nantai, kaitn gola' hidup sosuai agatn ajaran inyo ku sampaian ko kaitn. Labuhancam lapo inyo kaitn torima' doi' ku. Turuticam boko pomandiran inyo kaitn dinga' doi' ku. Labuhancam boko porbuatan inyo kaitn tiat udah ku labuhan. Agatn ubo nantai, Allah inyo moonji'i sonang-asau tajahan monyoroto'i kaitn.

Paulus bosukur obai jomaat Filipi mongiripan duit pakai' monulukng io

¹⁰ Aku kotakan sonang-nyamanam dalapm Tuhatn obai ahirnyo kaitn ulih monunju'an obai kaitn momporhatianku. Memang kaitn hala momporhatianku, apo komai kaitn bolupm ado kosompatan monunju'annyo.

¹¹ Agatn pandir mongona'i ni'in, aku co bomasud aku ija' ado kokurakan. Obai, aku udah bolajar mooso tokosih dalapm koadaan lapo ja'.

¹² Aku udah moalapi hidup kokurakan ongko hidup bokolobihan. Aku udah mongotohu'i rahasianyo pakai' mohadapi somuo koadaan nantai. Aman aku konyang bodamo kolaparan, aman aku ado kolobihan doi' inyo dipontikan damo kurakng,

¹³ aku mampu mohadapi somuo koadaan obai Kristus moonji'i kokuatan ko aku.

¹⁴ Apo, boi' jam kaitn udah monulukng ku di dalapm koadaan uyuh ni'in.

¹⁵ Boko somadikanku di Filipi! Kaitn siku' udah tohu obai watu ku mula'i momboritoan Kabar Boi', pas aku botula' doi' propinsi Makedonia, conyiant jomaat inyo bukai inyo bokorojo samo agatn aku pakai' hala moonji'i ongko monorima' borokat. Bayo kaitn inyo mondukukng ku agatn caro nantai.

¹⁶ Malahan, timpu aku di kota Tesalonika, kaitn mongiripan bantu'an ko aku sokali duo kali.

¹⁷ Aku momandiran nantai bukainyo pakai' bogoyap bantu'an agi' doi' kaitn. Apo aku honda' oca' Tuhatn somongkitn momborokati kaitn obai kaitn udah monulukngku.

¹⁸ Ni'in, aku udah ado somuo inyo ku pontikan, malahan lobih doi' nantai, obai aku udah monorima' doi' Epafroditus somuo inyo kaitn kiripan. Allah sonang agatn poonju' kaitn nantai inyo samo sama'an posombahan inyo bou harupm damo kurbatn bonatakng inyo Sio torima' agatn sonang hati.

¹⁹ Allahku kotakan dampu. Sio tajahan momonuhi somuo inyo kaitn pontikan di dalapm Kristus Yesus.

²⁰ Topujicam Allah Bopai kito somanah-manahnyo! Amin.

Paulus moahiri suratnyo

²¹ Padahan salapm tangga'i ku ko somuo urakng husus umputn Allah dalapm Kristus Yesus. Salapm ko kaitn tangga'i boko somadikanku inyo bosamo agatn aku di si'itn.

²² Salapm ko kaitn tangga'i somuo umant Allah di si'itn, hususnyo tangga'i boko urakng inyo pocayo inyo bokorojo di istana Rajo Roma.

²³ Aku bodoa oca' Tuhatn Yesus Kristus hala monunju'an kasih karunia-Nyo ko kaitn.