Filipi 3 - Porjanjian Boharu Torjomahan Baso Dilakng Soari-ari

Hidup sosuai agatn kohonda' Yesus Kristus, Tuhatn inyo bokuaso di pucu' kito

¹ Ahirnyo, boko somadikanku, kaitn sonang-nyamancam di dalapm Tuhatn. Bilo apo mo aman aku monulis agi' mongona'i boko hal ni'in ko kaitn. Boko hal ni'in monjago oca' kaitn totap hidup sosuai agatn kohonda' Tuhatn.

² Boboi'cam tohadap boko urakng inyo mongajaran obai urakng gola' disunant pakai' monjadi umant Allah. Sia' jahat ongko bobohayo sama'an kudu' liar.

³ Sobondarnyo, umant Allah ia'an kito inyo dibimbikng Roh-Nyo pakai' monyombah Sio. Ni'inan tando ‘sunant’ inyo bondar. Kito bosukur obai Kristus Yesus monyolamant'an kito. Kito co boharap ko boko porbuatan monsio.

⁴ Soandainyo boko hal nantai ulih monyolamant'an kito, aku ado alasan pakai' boharap ko boko hal nantai. Mungkitn urakng bukai bopikir sia' ado alasan pakai' moharap'an ko boko hal nantai. Apo, alasan ku lobih kuat daripado sia'.

⁵ Aku disunant watu ku lahir boumur kodolapatn ari. Aku urakng Israel doi' suku Benyamin. Aku bondar-bondar urakng Ibrani asli. Aman urakng bukai honda' momuji diri obai sia' mongotohu'i Hukupm Torat, aku doi' kolompok Farisi inyo mongotohu'i somuonyo.

⁶ Aman urakng bukai honda' momuji diri obai sia' boagama agatn giat, aku bondar-bondar giat ia'an pan komai aku mondorako'i boko urakng inyo pocayo ko Yesus. Aman urakng bukai honda' momuji diri obai sia' hidup agatn caro inyo bondar-bondar monaati Hukupm Torat, aku cuku cacat dalapm monaati Hukupm Torat.

⁷ Komai, aku bopikir somuo nantai mombulah ku untukng. Apo, watu ni'in aku udah mongonal Kristus. Jadi, aku boanggapan boko hal nantai conyiant ado rotinyo.

⁸ Malahan aku moanggap la'apo pan conyiant ado rotinyo dibandikan agatn mongonal Kristus Yesus, Tuhatnku. Nantai jouh lobih pontikng daripado somuo hal inyo bukai. Nantaiam sobabnyo aku co boharap agi' ko boko hal nantai. Aku moanggap somuo hal nantai samo sama'an sampah oca' aku ulih mongonal Kristus,

⁹ ongko oca' aku ulih bosatu agatn Sio. Aku monjadi bondar di hadapan Allah bukainyo obai usaha ku siku' monaati Hukupm Torat. Aku monjadi bondar obai aku pocayo agatn Kristus. Allah inyo molabuhan nantai. Sio mombulah monsio monjadi bondar di hadapan-Nyo aman sia' pocayo.

¹⁰ Aku bondar-bondar honda' mongonal Kristus. Aku honda' moalapi kuaso inyo mombulah Sio bobali' hidup agi' doi' komatian. Aku honda' tuyut mondorita' samo sama'an Sio ongko rela mati samo sama'an Sio.

¹¹ Agatn ubo nian, aku yakitn boharap aku pan tajahan bobali' hidup doi' komatian.

¹² Aku co bomasud aku udah moncapai tujuan nantai! Memang aku bolupm sompurna. Apo aku hala bousaha pakai' moncapai tujuan nantai. Obai, nantaiam hajat Kristus Yesus bagiku timpu Sio moningkau ku monjadi umputn-Nyo.

¹³ Boko somadikan, aku co bopikir aku udah moncapai tujuan nantai. Apo ado sobuti' hal inyo ku labuhan. Ia'an, aku co momporhatian boko hal di joman komai ongko bousaha pakai' moncapai tujuan inyo ado di pohadapanku.

¹⁴ Aku samo sama'an urakng dalapm polomba'an inyo bonggidi'an oca' mondapat'an hadiahnyo. Hadiahku ia'an Allah moningkauku pakai' hidup bosamo agatn Sio di sorugo. Nantai ulih tojadi ongkah obai Kristus Yesus.

¹⁵ Obai nantai, somuo kito inyo kuat pocayo ko Yesus gola' bopikir agatn caro nantai. Apo aman ado urakng di antaro kaitn inyo bopikir agatn caro inyo bukai, jadi Allah tajahan monjolasannyo ko kolai jam.

¹⁶ Apo, inyo pontikng kito totap hidup agatn caro watu ni'in inyo udah Allah tunju'an ko kito.

¹⁷ Boko somadikan, tuyutcam toladatnku. Porhatiancam boko urakng inyo hidup sosuai agatn toladatn koi.

¹⁸ Obai, ado banya' urakng inyo hidupnyo morusa' roti komatian Kristus di kayu salib. Aku udah opat am momadahi kaitn mongona'i nantai. Watu ni'in aku kapikng monangis, momadahi kaitn mongona'i nantai agi'.

¹⁹ Ponjadi'nyo, boko urakng nantai tajahan bonaso. Sia' hidup monuruti kohonda' tubuh sia' siku' daripado hidup monuruti kohonda' Allah. Sia' bangga mongona'i boko porbuatan sia' inyo jahat inyo soharusnyo mombulah sia' malu. Sia' bayo bopikir mongona'i boko hal di dunia ni'in mo.

²⁰ Apo, kito ninam pondudu' di sorugo. Doi' su'utan jam kito monantian Ponyolamant kito, Tuhatn Yesus Kristus, datakng agi'.

²¹ Sio ado kuaso pakai' mombulah somuo la'apo pan tundu' agatn Sio. Agatn kuaso-Nyo nantai, bukakng-tubuh kito ni'in inyo lomah ongko ulih diloloan, Sio tajahan morubah monjadi samo sama'an bukakng-tubuh Sio inyo mulia.