Filipi 2 - Porjanjian Boharu Torjomahan Baso Dilakng Soari-ari

Nosihat oca' bosatu ongko morendahan diri samo sama'an Kristus

¹ Jadi, hati kaitn ulih dikuatan obai kaitn di dalapm Kristus. Kaitn ulih dihibur obai ado kasih di dalapm Kristus. Kaitn ulih hidup bosatu agatn Roh Allah. Kaitn ulih hala mongasihi ongko hala onju'-bori' agatn siku'-monyiku'.

² Obai somuo nantai, pulahcam hati ku lobih sonang agi' agatn molabuhan boko hal ni'in: Hidupcam di dalapm kosatuan. Hala mongasihi siku'-monyiku'. Kohonda'nyo pikiran ongko tujuan kaitn hala samo.

³ Jangan buhau ongko bogoyap pujian sia-sia. Apo, rondahancam hati kaitn. Anggap ja' urakng bukai lobih pontikng doi' kolai siku'.

⁴ Jangan bayo momporhatian kopontikan kolai siku'. Apo, porhatian jam kopontikan urakng bukai.

⁵ Kohonda'nyo pomikiran kaitn gola' samo sama'an pomikiran Kristus Yesus.

⁶ Memang bondar, Yesus Kristus samo agatn Allah. Apo, Sio kinyo bopikir Sio gola' momportahatan kodudu'an nantai.

⁷ Sobali'nyo, Sio molopasan somuo nantai. Sio datakng ko dunia ni'in monjadi samo sama'an hulutn. Sio monjadi samo agatn monsio.

⁸ Apotolagi', watu Sio monjadi monsio, Sio morendahan diri-Nyo ongko taat agatn kohonda' Allah sampai mati ia'an mati di kayu salib.

⁹ Nantai sobabnyo Allah mombulah Sio monjadi kotakng pontikng. Allah moonju' damo ko Sio inyo lobih bokuaso di pucu' somuo inyo bukai.

¹⁰ Allah molabuhan nantai oca' la'apo pan tajahan tundu' monyombah damo Yesus, Ia'an nantai la'apo pan inyo ado di langit, di bumi, ongko di babah bumi.

¹¹ Somuonyo tajahan moaku'i obai Yesus Kristus ia'an Tuhatn di pucu' la'apo pan. Agatn ubo nantai, Allah Bopai tajahan dipuji.

Hidup agatn caro inyo bondar di dalapm dunia inyo jahat

¹² Boko somadikanku inyo ku kasihi, kaitn hala monaati Allah. Jadi, totap gola' ongko mohormati Sio kapikng kaitn bousaha hidup agatn caro inyo cucu' pakai' boko urakng inyo udah disolamant'an. Kaitn gola' molabuhan nantai bukai aja' sama'an komai timpu aku bosamo agatn kaitn apo lobih agi' watu ni'in watu aku co bosamo agatn kaitn.

¹³ Obai, Allah siku' bokorojo di dalapm kaitn. Sio moonju' ko kaitn kohonda' ongko komampuan pakai' monyonangan Sio.

¹⁴ Watu kaitn molabuhan lapo ja', jangan botuta'-bomamai ongko jangan botikakng.

¹⁵ Agatn ubo nantai, kaitn hidup agatn caro inyo bondar ongko borosih. Kaitn hidup ubo poana'an Allah inyo culih disalahan biar pan kaitn ado di tongah-tongah boko urakng inyo jahat ongko co mongonal caro hidup inyo bondar. Jadi, kaitn monjadi torakng bagi sia', samo sama'an boko bintakng inyo bocohayo di dunia ni'in.

¹⁶ Ia'an nantai, kaitn monunju'an ko sia' Pomandiran Allah inyo moonji'i hidup inyo sobondarnyo. Aman kaitn hidup sama'an nian, aku tajahan bangga watu ari Kristus datakng agi' obai kaitn monjadi buti obai polayatan ku kinyo pocumo. Ado hasil doi' pogota'an humpas-pulasku.

¹⁷ Apo, aku tajahan totap sonang-nyamanam aman aku dibunuh. Obai, kaitn pocayo ko Kristus ongko hidup molayati-Nyo. Kaitn monjadi samo sama'an kurbatn posombahan ko Allah. Aman aku dibunuh, rotinyo darahku ditumpahan di pucu' posombahan kaitn nantai. Jadi, aku sonang-nyamanam ongko aku tuyut sonang-nyamanam jam agatn kaitn.

¹⁸ Ubo nian jam, kaitn gola' sonang-nyamanam ongko tuyut sonang-nyamanam agatn aku.

Timotius ongko Epafroditus

¹⁹ Aku boharap Tuhatn Yesus tajahan mombulah oca' aku ulih hagar moutus Timotius ko kaitn. Agatn ubo nantai, hati ku tajahan tenang mondinga' borito mongona'i kaitn doi' io.

²⁰ Conyiant urakng bukai samo sama'an Timotius inyo bosamo agatn aku. Io sohati agatn aku ongko bobondar momporhatian kopontikan kaitn.

²¹ Somuo urakng bukai bayo momporhatian kopontikan sia' siku' bukainyo kopontikan Yesus Kristus.

²² Kaitn siku' udah tohu obai Timotius kotakan boguno. Io udah bogota' humpas-pulas bosamo agatn aku pakai' momboritoan Kabar Boi'. Io monulukngku samo sama'an ana' monulukng bopainyo.

²³ Jadi, lopas ku mongotohu'i mongona'i koputusan kasus pongadilanku, aku boharap pakai' hagar moutus io ko kaitn.

²⁴ Apo, aku yakitn obai Tuhatn tajahan mombulah oca' aku siku' ulih hagar datakng ko kaitn jam.

²⁵ Apo, timpu ni'in, aku mooso pontikng mongiripm Epafroditus agi' ko kaitn. Komai, kaitn moutus io pakai' monulukng ku dalapm ponjara di si'itan. Io udah monjadi somadikanku inyo bokorojo ongko bojuakng pakai' Kristus bosamo ku.

²⁶ Apo io togonangan kaitn somuo. Hatinyo golisah obai io mongotohu'i kaitn udah mondinga' obai io boponyakit di si'itn.

²⁷ Memang bondar, io sakit, hampir mati. Apo Allah monunju'an bolas kasihan ko io. Bukainyo bayo io ja', apo Allah monunju'an kasih sayang-Nyo jam ko aku. Allah kinyo mombiaran io mati, oca' ponyalu'ku nantai kinyo botambah.

²⁸ Obai nantai, mongkitn bondar aku honda' monyiuh io agi' ko kaitn oca' kaitn ulih sonang-nyamanam agi' watu kaitn moniant io. Hatiku tajahan monjadi lobih tenang jam.

²⁹ Jadi, halucam io agatn caro inyo pantas pakai' somadikan di dalapm Tuhatn, ia'an nantai agatn sonang-nyamanam. Kaitn gola' morogo'i boko urakng sama'an io.

³⁰ Io hampir mati obai io bokorojo pakai' Kristus. Io rela mati somanah io mowakili kaitn pakai' monulukngku.