Filipi 1 - Porjanjian Boharu Torjomahan Baso Dilakng Soari-ari

Salapm doi' Paulus

¹ Surat ni'in doi' ku, Paulus bosamo agatn Timotius. Koi urakng inyo bokorojo molayati Kristus Yesus. Surat ni'in pakai' somuo urakng husus umputn Allah di kota Filipi inyo bosatu dalapm Kristus Yesus, tomansu' agatn somuo ponotua' ongko diakon jomaat.

² Aku bodoa oca' Allah Bopai kito ongko Tuhatn Yesus Kristus monunju'an kasih karunia ongko moonji'i sonang-asau ko kaitn.

Paulus bosukur ongko bodoa pakai' jomaat di Filipi

³ Sotiap kali aku moingant kaitn, aku moucap sukur ko Allahku.

⁴ Sotiap kali aku bodoa pakai' kaitn somuo, aku hala bodoa agatn sonang-nyamanam.

⁵ Aku bosukur ongko sonang-nyamanam ubo nantai obai doi' mulonyo kaitn pocayo sampai watu ni'in kaitn bokorojo samo agatn aku oca' Kabar Boi' ulih diboritoan.

⁶ Allah udah mula'i pokoroja'an inyo boi' ko kaitn. Aku yakitn Sio tajahan torus mongorojoan nantai udah jadiam watu ari Kristus Yesus datakng agi'.

⁷ Memang pantas aku bopikir ubo nian mongona'i somuo kaitn obai aku kotakan mongasihi kaitn. Obai, kaitn hala monulukng ku dalapm polayatan ku, ia'an nantai polayatan inyo Tuhatn onju' ko aku obai Sio honda' monunju'an kasih karunia-Nyo ko aku. Timpu aku ado di dalapm ponjara, timpu ku mombela Kabar Boi' tohadap urakng inyo molawatnnyo, timpu ku mombutian Kabar Boi' nantai bondar, kaitn hala monulukng ku dalapm polayatan nantai.

⁸ Jadi, Allah tohu obai aku togonangan kaitn somuo obai aku mongasihi kaitn samo sama'an Kristus Yesus mongasihi kaitn.

⁹ Ninam doaku pakai' kaitn: Mudahan kaitn mongkitn mongasihi Allah ongko urakng bukai ongko mongkitn mongotohu'i ongko mongoroti lapo inyo bondar

¹⁰ agatn caro nantai kaitn ulih momilih lapo inyo kotakng boi'. Agatn ubo nian, hidup kaitn tajahan borosih doi' dosa. Kaitn co tajahan disalahan watu ari Kristus datakng agi'.

¹¹ Hidup kaitn tajahan molimpah agatn porbuatan inyo bondar-bondar boi' inyo ongkah ulih dihasilan Yesus Kristus. Jadi Allah tajahan dipuji ongko dimuliaan.

Biar pan Paulus di ponjara, Kabar Boi' totap diboritoan

¹² Boko somadikan, memang aku moalapi boboropo kosusahan. Apo, aku honda' kaitn mongotohu'i obai boko hal ni'in mombulah oca' lobih banya' urakng mondinga' ongko pocayo agatn Kabar Boi'.

¹³ Jadi, alasanku ditamoan ko dalapm ponjara udah jolas bagi somuo urakng di si'itn, tomansu' somuo projurit inyo monjago tompat ku ditahatn dalapm istana rajo ni'in. Somuo sia' tohu obai aku di ponjara obai aku molayati Kristus.

¹⁴ Solaitn nantai, watu ku di ponjara, aku monjadi toladatn bagi boko somadikan kito inyo pocayo ko Tuhatn Yesus. Kobanya'an doi' sia' monjadi mongkitn borani momboritoan Kabar Boi'. Sia' co gola' momadahan Pomandiran Allah nantai.

¹⁵ Memang ado urakng inyo momboritoan mongona'i Kristus obai sia' tungi ia'an sia' honda' oca' boko urakng tuyut sia' daripado aku. Apo ado jam urakng inyo momboritoan mongona'i Kristus doi' hati inyo borosih.

¹⁶ Sia' tohu obai Allah momilihku pakai' mombela Kabar Boi' tohadap urakng inyo molawatnnyo. Jadi, sia' honda' momboritoan mongona'i Kristus obai sia' mongasihi Allah ongko aku.

¹⁷ Apo boko urakng inyo tungi nantai, conyiant ado tujuan inyo boi'. Sia' ongkah momontikan diri sia' siku'. Sia' monyangko porbuatan sia' nantai tajahan mombulah koadaan ku dalapm ponjara lobih susah.

¹⁸ Apo co apo-apo! Biar pan urakng ado tujuan lapo ja', doi' hati inyo bondar kata'an salah, inyo pontikng sia' momboritoan mongona'i Kristus. Obai sia' molabuhan nantai, jadi aku sonang-nyamanam. Aku tajahan totap sonang-nyamanam jam,

¹⁹ obai aku udah tohu ponuntukng somuo ni'in, ia'an agatn boko doa kaitn ongko agatn potulukan doi' Roh Yesus Kristus, jadi aku tajahan dibebasan.

²⁰ Aku kotakng honda' ongko moharap'an obai aku co bulah boko-lapo inyo bulah ku monjadi malu di hadapan Tuhatn. Apo aku boharap aku tajahan monjadi borani watu ni'in samo sama'an aku hala borani sobolupmnyo. Agatn ubo nantai, aman aku mati damo hidup, Kristus tajahan dimuliaan agatn lapo ja' inyo tojadi ko bukakng-tubuhku.

²¹ Obai, bagiku, aman aku hidup, aku hidup pakai' Kristus. Aman aku mati, aku untukng.

²² Apo, aman aku hidup di dunia ni'in, polayatanku tajahan kotakng boguno. Jadi, aku co tohu mono inyo gola' ku pilih ia'an hidup damo mati.

²³ Aku ditari' di antaro koduo hal nantai! Aku honda' moninggalan dunia ni'in lalu diapm bosamo agatn Kristus. Memang nantai lobih boi' bagi ku.

²⁴ Apo kaitn lobih pontikng aku totap diapm di dunia ni'in.

²⁵ Jadi, aku yakitn mongona'i ni'in: Aku tajahan totap diapm di dunia ni'in bosamo agatn kaitn oca' kaitn mongkitn kuat pocayo ongko mongkitn sonang-nyamanam obai nantai.

²⁶ Jadi, watu aku bobali' ko kaitn nononyo, kaitn tajahan mooso mongkitn bangga obai Kristus Yesus mombulah oca' nantai ulih tojadi.

Nosihat oca' totap botahatn tohadap urakng inyo molawatn sia'

²⁷ Lapo ja' inyo tojadi ko aku, inyo pontikng ia'an kaitn hidup sosuai agatn Kabar Boi' mongona'i Kristus. Agatn ubo nian, aman aku ulih datakng botomu agatn kaitn damo cuku datakng ongko bayo mondinga' mongona'i kaitn, jadi aku tajahan tohu obai kaitn totap kuat pocayo. Aku tajahan tohu kaitn bosatu hati ongko bojuakng bosamo pakai' kopocaya'an inyo sosuai agatn Kabar Boi' nantai.

²⁸ Jangan gola' tohadap boko urakng inyo molawatn kaitn ubo nantai. Nantai monjadi tando bagi sia' obai sia' tajahan bonaso. Nantai jam monjadi tando bagi kaitn obai kaitn tajahan disolamant'an. Somuonyo nantai doi' Allah.

²⁹ Obai, Allah udah moonji'i kosompatan ko kaitn bukainyo bayo pakai' pocayo ko Kristus, apo pakai' mondorita' obai Kristus jam.

³⁰ Ia'an nantai sama'an inyo udah kaitn tiat tojadi ko aku ongko inyo kaitn dinga' tojadi ko aku watu ni'in.