Filemon 1 - Porjanjian Boharu Torjomahan Baso Dilakng Soari-ari

Salapm ko Filemon doi' Paulus

¹ Surat ni'in doi' aku, Paulus. Aku di ponjara obai aku molayati Kristus Yesus. Salapm jam doi' Timotius, somadikan kito. Surat ni'in ko Filemon inyo tokasih. Inyo bokorojosamo agatn koi molayati Tuhatn.

² Ongko ko Apfia, somadikan soiman kito, huatan Arkhipus inyo bokorojo humpas-pulas molayati Tuhatn bosamo agatn kito. Surat ni'in pan ko somuo jomaat inyo bokumpul di rumah kolai, Filemon.

³ Aku bodoa ko Allah Bopai kito ongko Tuhatn Yesus Kristus monunju'an koboi'an ko kolai ongko moonju' sonang-asau jam ko kolai.

Paulus bosukur obai Filemon pocayo ko Yesus huatan mongasihi urakng bukai

⁴ Sotiap kali aku mondoa'an kolai, aku bosukur ko Allahku.

⁵ Aku bosukur obai aku mondinga' obai kolai bondar-bondar pocayo ko Tuhatn Yesus huatan kolai pan mongasihi somuo urakng inyo husus umputn Allah.

⁶ Aku bodoa oca' hubukan boi' antaro kolai agatn urakng bukai inyo pocayo ni'in ado hasilnyo: Kolai ulih mongotohu'i mongona'i somuo inyo boi' inyo umputn kito dalapm Kristus.

⁷ Somadikanku! Kolai udah monyegaran hati boko urakng inyo husus umputn Allah. Obai kasih kolai nantai, jadi aku kotakan sonang bondar huatan hati ku botambah somangant.

Paulus minto oca' Filemon monorima' Onesimus agatn boboi'

⁸ Obai nantai, sobagai somadikan inyo sosamo pocayo di dalapm Kristus aku ulih momorintah kolai molabuhan la'apo pan, inyo gola' kolai labuhan,

⁹ Apo, obai aku mongasihi kolai, soboi'nyo aku mominto ja'am. (Aku, Paulus, udah tuhoam ongkopan ni'in tongahan ditahatn dalapm ponjara obai Kristus Yesus.)

¹⁰ Porminta'anku ni'in ia'an mongona'i Onesimus. Watu ku di dalapm ponjara ni'in, io monjadi samo sama'an ana'ku siku' obai aku monulukng io monjadi pocayo ko Yesus.

¹¹ Komai, memang io nan pacal kolai inyo kinyo boguno. Apo, ni'in io monjadi kotakan boguno bagi kolai ongko bagi ku jam.

¹² Aku kotakan mongasihi io, apo ni'in aku monyiuh io bobali' ko kolai.

¹³ Sobondarnyo, aku honda' oca' io totap bosamo agatn aku. Io ulih monggonti'i kolai pakai' monulukng ku somanah aku ija' di dalapm ponjara obai aku momboritoan Kabar Boi'.

¹⁴ Apo, aku co honda' molabuhan nantai aman kinyo posotujuan kolai lobih holu. Obai, aku co honda' momoso kolai oca' io diapm di si'itn. Aku honda' kolai bulah koboi'an nantai doi' kohonda' kolai siku'.

¹⁵ Memang io udah bosongkayo doi' kolai pakai' somontaromo. Apo, mungkitn Allah mombiaran nantai tojadi oca' io sampat monjadi pocayo ko Yesus lalu kolai ulih monorima' io agi' pakai' somanah-manahnyo.

¹⁶ Masud ku, io bukainyo bayo pacal kolai. Io lobih doi' nantai. Watu ni'in, io nam somadikan soiman inyo tokasih. Aku udah mongasihi io. Nononyo kolai pan gola' mongasihi io lobih doi' nantai agi', obai io nam pacal kolai huatan obai kaitn somadikan di dalapm Tuhatn.

¹⁷ Jadi, aman kolai moanggap aku somadikan soiman kolai, torima' cam Onesimus agi' samo sama'an kolai monorima' aku jam.

¹⁸ Aman io udah bulah kosalahan damo bohutakng ko kolai, biaram aku inyo mombayar somuonyo nantai.

¹⁹ Aku, Paulus, monulis ni'in agatn jariku siku' pakai' monjaminnyo: “Aku tajahan molunasinyo nantai.” (Apo, jangan tongkolupatn kolai bohutakng agatn aku ia'an nantai kohidupan kolai inyo boharu dalapm Yesus Kristus.)

²⁰ Oi, Somadikanku! Ku harap kolai monjadi boguno bagiku obai kito somadikan dalapm Tuhatn Yesus Kristus. Hiburcam hatiku agatn monorima' Onesimus agi'.

²¹ Aku monulis surat ni'in obai aku yakitn kolai tajahan taat. Aku tohu kolai tajahan molabuhan lobih doi' nantai agi'.

²² Solaitn nantai pan, tulukng siap'an tompat ponoluntukan di rumah kolai pakai' ku. Obai, aku yakitn Allah paca'an mongabulan doa kaitn sampai aku dibebasan lalu ulih bobali' agi' ko kaitn.

Pomandiran toahir Paulus dalapm suratnyo

²³ Salapm doi' Epafras inyo ado bosamo ku di ponjara obai io molayati Kristus Yesus.

²⁴ Salapm jam doi' Markus, Aristarkhus, Demas huatan Lukas, ia'an boko kawal inyo bokorojosamo agatn ku pakai' momboritoan Kabar Boi'.

²⁵ Aku bodoa oca' Tuhatn Yesus Kristus hala boi' hati-Nyo ko kaitn.