Efesus 6 - Porjanjian Boharu Torjomahan Baso Dilakng Soari-ari

Hubukan antaro boko anggota rumah tanggo

¹ Boko poana'an aku momadahan: kaitn gola' monurut agatn urakng tuho kaitn di dalapm Tuhatn. Nantai am caro hidup inyo bondar.

² Di Buku Suci ado porintah ni'in, “Rogo'i bopai ongko indai kolai.” Porintah ni'in ia'an porintah potamo inyo ado janji jam. Ni'inan janjinyo:

³ “Oca' kulo bahagia huatan bodapat umur panjakng di dunia ni'in.”

⁴ Boko pombopaian aku momadahan: Jangan congkit ko boko poana'an kaitn, jangan sampai mombulah sia' godi. Apo kaitn gola' mondidik sia' agatn ajaran ongko nosihat doi' Tuhatn.

⁵ Ko boko hulutn aku momadahan: kaitn gola' monurut agatn habakng kaitn inyo ado di dunia ni'in. Tundu' ko sia' agatn hormat huatan hati inyo jujur, samo sama'an caro kaitn monaati Kristus.

⁶ Kaitn gola' monurut agatn sia' bukainyo obai kaitn honda' di tiat huatan dipuji sia', apo obai kaitn ia'an boko urakng inyo molayati Kristus ongko hati kaitn honda' molabuhan la'apo inyo di kohonda'i Allah.

⁷ Labuhan somuo pokoroja'an kaitn agatn sonang hati, ubo kaitn bokorojo pakai' Tuhatn, bukainyo bayo monsio.

⁸ Kaitn tohu obai somuo urakng, ia'an hulutn damo urakng bebas, aman sia' bulah koboi'an, jadi sia' paca'an monorima' balasan doi' Tuhatn.

⁹ Ko boko habakng aku momadahan: kaitn pan gola' boi' hati ko boko hulutn kaitn. Jangan hala moancapm sia'. Ingantcam! Tuhatn di sorugo ia'an Tuhatn inyo bokuaso di pucu' sia' ongko kaitn. Sio kinyo momihak ko boko urakng totontu.

Caro molawatn kuaso jahat

¹⁰ Jadi, kohonda'nyo kaitn monjadi kuat agatn kokuatan inyo kaitn dapatan doi' kuaso Tuhatn, obai kaitn bosatu agatn Sio.

¹¹ Kaitn gola' momakai somuo sonjato inyo dionju' Allah ko kaitn oca' kaitn dapat botahatn molawatn boko hajat inyo dipulah Rajo Sitatn pakai' monipu kaitn.

¹² Obai kito boparakng bukatnnyo molawatn monsio apo molawatn somuo macapm kuaso golap di dunia ni'in, huatan molawatn somuo boko roh jahat di awakng-awakng.

¹³ Jadi, kaitn gola' momakai somuo sonjato inyo di onju' Allah oca' watu kaitn disorakng ulih kuaso jahat, kaitn mampu botahatn molawatn nantai. Lalu, lopas kaitn bojuakng sampai ahir pakai' molawatn kuaso jahat nantai, kaitn paca'an totap kuat botahatn.

¹⁴ Sama'an ni'in caronyo kaitn ulih totap kuat botahatn: Kaitn gola' mongobat punggukng kaitn agatn kosotiaan ko Allah ongko momakai kotulusan sobagai baju bosi kaitn.

¹⁵ Kaitn gola' siap momboritoan Kabar Boi' inyo mombaba' sonang-asau monjadi sopatu kaitn.

¹⁶ Dalapm somuo koadaan, kaitn gola' totap kuat pocayo ko Kristus. Nantai ia'an porisai inyo ulih dipakai kaitn pakai' mombuta'i somuo ana' panah boapi doi' Rajo Sitatn.

¹⁷ Torima' cam kosolamant'an sobagai tokulu' baja inyo molinduki kopala' kaitn. Ongko pakaicam Pomandiran Allah sobagai podakng inyo dionju' Roh Allah.

¹⁸ Kaitn gola' hala waspada oca' sotiap watu kaitn ulih bodoa agatn dibimbikng Roh Allah. Pakaicam somuo macapm doa huatan pomuhunan ko Allah. Jangan botongga' bodoa pakai' somuo urakng inyo pocayo.

¹⁹ Bodoa jam pakai' ku, oca' sotiap watu aku bopandir, Allah moonji'i kato-kato ko aku. Bodoa jam oca' aku borani momboritoan Kabar Boi' mongona'i hajat Allah inyo komainyo kinyo dikotohu'i monsio.

²⁰ Memang aku diutus pakai' momboritoan Kabar Boi' nantai. Nianam alasannyo aku ditamoan ko dalapm ponjara. Jadi, bodoacam oca' aku borani momadahan Kabar Boi' nantai, sama'an inyo gola' ku labuhan.

Pomandiran toahir Paulus dalapm suratnyo

^21-22 Aku moutus Tikhikus ko kaitn. Io ia'an somadikan kito inyo tokasih. Io sotia molayati Tuhatn. Aku moutus io oca' kaitn mongotohu'i borito mongona'i aku ongko boko somadikan inyo ado bosamoku. Io paca'an momadahan somuonyo ko kaitn. Agatn sama'an nantai, io paca'an monguat'an hati kaitn.

²³ Boko somadikan, aku bodoa oca' Allah Bopai ongko Tuhatn Yesus Kristus moonji'i sonang-asau ko kaitn huatan mombulah kaitn mongkitn mongasihi huatan mongkitn pocayo ko Sio.

²⁴ Aku bodoa oca' Sio monunju'an kasih karunia ko kaitn somuo inyo mongasihi Tuhatn kito Yesus Kristus agatn kasih inyo kinyo tohu botongga'.