Efesus 5 - Porjanjian Boharu Torjomahan Baso Dilakng Soari-ari

Caro hidup dalapm torakng

¹ Obai nantai, boko somadikan, sobagai poana'an Allah inyo dikasihi-Nyo, kaitn gola' moikuti toladatn Allah.

² Kaitn gola' mongasihi urakng bukai samo sama'an Kristus udah mongasihi kaitn ia'an Sio monyorahan diri-Nyo monjadi kurbatn posombahan pakai' monanggukng hukupan dosa kito. Sio monjadi posombahan harupm inyo monyonangan Allah.

³ Jangan bulah dosa bomporajoan. Jangan bulah boko hal inyo kinyo sonunuh. Jangan kaha'-kolobu'. Boko hal nantai samo sokali kinyo cucu' pakai' umant husus umputn Allah.

⁴ Jangan momakai kato-pandir kinyo boi', kato-pandir inyo kinyo boguno, kato-pandir jahat. Boko hal nantai kinyo cucu' jam. Sobali'nyo, kaitn gola' moucap sukur ko Allah.

⁵ Kotohu'i cam ni'in: urakng inyo bulah dosa bomporajoan, urakng inyo bulah boko hal inyo kinyo sonunuh, urakng inyo kaha'-kolobu' (kaha'-kolobu' nantai rotinyo monjadian boko kohonda'-Nyo samo sama'an tuhatn sia'), somuo sia' kinyo ulih monjadi anggota Koraja'an Kristus huatan Allah.

⁶ Jangan totipu aman ado urakng inyo monyampaian ajaran inyo bukainyo doi' nantai. Pomandirannyo kinyo bondar. Obai, pastiam Allah paca'an mohukupm boko urakng inyo molabuhan somuo macapm porbuatan jahat nantai, ia'an boko urakng inyo kinyo taat ko Sio.

⁷ Obai nantai, kaitn jangan jumpat bulah kojahatan bosamo agatn sia'.

⁸ Memang komainyo kaitn bodiapm di dalapm kogolapan. Apo watu ni'in kaitn udah mansu' ko dalapm torakng obai kaitn mongonal Tuhatn Yesus. Jadi, kaitn gola' hidup agatn caro inyo sosuai pakai' boko urakng inyo hidup di dalapm torakng.

⁹ Obai ni'inan, hasil doi' caro hidup dalapm torakng nantai: urakng nantai bulah koboi'an, bondar di hadapan Allah, huatan moikuti ajaran inyo bondar.

¹⁰ Kaitn gola' bousaha bolajar la'apo inyo monyonangan Tuhatn.

¹¹ Jangan kaitn jumpat molabuhan boko porbuatan urakng inyo ija' hidup dalapm kogolapan. Somuo nantai sia-sia ja'am. Apo kaitn gola' botindak oca' boko porbuatan sia' kotohuan.

¹² Boko porbuatan inyo diombakan sia' nantai kotakng jahat. Aman kito kisahan pan mongona'i nantai, kito monjadi malu.

¹³ Apo somuo porbuatan monjadi kotohuan aman torakng bosinar ko io. Obai, torakng mombulah somuo hal monjadi jolas.

¹⁴ Nantaiam sobabnyo ado pomandiran ni'in, “Oi kulo inyo tidu', huascam! Kulo inyo mati, bobali' hidup cam! Kristus paca'an bosinar ko kulo.”

¹⁵ Obai nantai, kaitn gola' porotian caro hidup kaitn. Jangan hidup sama'an boko urakng inyo budu, apo hidup cam sama'an urakng bohikmat.

¹⁶ Gunoan cam sotiap kosompatan pakai' bulah koboi'an. Obai, joman ni'in ia'an joman inyo jahat.

¹⁷ Jangan budu, apo bousaha cam oca' kaitn mongoroti la'apo inyo dikohonda'i Tuhatn.

¹⁸ Jangan kaitn mabu' obai anggur, obai urakng mabu' kinyo ulih monahan kohonda' bukakng-tubuhnyo. Apo kaitn gola' moikuti Roh Allah,

¹⁹ popado bopandir cam agatn momakai kato-pandir doi' mazmur, puji-pujian huatan nyanyian rohani. Bonyanyi cam momuji Tuhatn agatn hati inyo rindakng.

²⁰ Hala bosukur cam ko Allah Bopai kito pakai' somuo hal, bosukur cam ko Sio dalapm damo Tuhatn kito, Yesus Kristus.

Caro hidup laki-bini

²¹ Kaitn gola' hala tundu' ko inyo bukainyo jam pakai' mohormati Kristus.

²² Ko boko botina' inyo udah kawitn aku momandiran: kaitn gola' mohormati laki samo sama'an kaitn mohormati Tuhatn.

²³ Obai laki ia'an kopala' doi' bini samo sama'an Kristus ia'an kopala' somuo urakng inyo pocayo ko Sio. Sio monyolamant'an sia' inyo monjadi sama'an bukakng-tubuh-Nyo siku'.

²⁴ Obai nantai dalapm somuo hal bini gola' mohormati lakinyo samo sama'an boko urakng pocayo mohormati Kristus.

²⁵ Ko somuo lolaki inyo udah kawitn aku momandiran: kaitn gola' mongasihi bini kaitn samo sama'an Kristus udah mongasihi boko urakng pocayo. Sio monyorahan diri-Nyo sampai mati

²⁶ oca' sia' monjadi borosih doi' dosa sia'. Sio momakai ara'i huatan Pomandiran Allah pakai' mombulah sia' borosih.

²⁷ Agatn sama'an nantai, Kristus mombulah oca' sia' ulih bodiritn di hadapan-Nyo sobagai jomaat inyo mulia, kinyo bodosa, kinyo ado kosalahan la'apo pan. Sia' bondar-bondar monjadi borosih huatan kinyo ulih disalahan.

²⁸ Nanam caronyo laki gola' mongasihi bininyo, samo sama'an io mongasihi bukakng-tubuhnyo siku'. Aman laki mongasihi bininyo, nantai samo sama'an io mongasihi dirinyo siku'.

²⁹ Conyiant urakng inyo mombonci' bukakng-tubuhnyo siku'. Malahan io mongombolo huatan morawatnyo. Nantai samo sama'an inyo dilabuhan Kristus pakai' jomaat-Nyo,

³⁰ Obai kito ia'an boko anggota bukakng-tubuh-Nyo.

³¹ Ado pomandiran ni'in inyo totulis di dalapm Buku Suci, “Obai nantai, boko lolaki paca'an moninggalan indai-bopainyo lopasnyo bokopal agatn bininyo. Sampai koduo urakng nantai monjadi sobukakng-sotubuh.”

³² Roti pomandiran nantai kotakng dalapm. Apo inyo ku masud ia'an hubukan antaro Kristus ongko jomaat-Nyo.

³³ Biar pan sama'an nantai, ado jam rotinyo pakai' kaitn siku'-monyiku': Sotiap laki gola' mongasihi bininyo sama'an io mongasihi dirinyo siku'. Sotiap bini gola' mohormati lakinyo.