Efesus 4 - Porjanjian Boharu Torjomahan Baso Dilakng Soari-ari

Jomaat gola' bosatu dalapm Kristus

¹ Obai nantai, sama'an ni'inan nosihat doi' ku, ia'an aku inyo ditamoan ko dalapm ponjara obai aku molayati Tuhatn Yesus. Kaitn udah ditingkau monjadi umant Allah. Jadi, aku muhun oca' kaitn hidup agatn caro inyo cucu' pakai' boko urakng inyo ditingkau sama'an nantai.

² Ia'an, kaitn gola' hala rondah hati, lomah-lombut huatan sabar. Tunju'an kasih kolai agatn caro hala tulukng-monulukng.

³ Bousaha cam bondar-bondar hidup damai agatn uyakng bukai oca' kaitn totap bosatu dalapm Roh Allah.

⁴ Obai, somuo kito inyo pocayo samo sama'an sobukakng-sotubuh. Ongkah ado siku' Roh Allah. Sama'an nian jam kaitn inyo ditingkau ado sobuah harapan inyo samo, ia'an kaitn yakitn moharap'an somuo inyo dijanjian Allah ko kito.

⁵ Ongkah ado siku' Tuhatn inyo bokuaso di pucu' kito. Kito ado suti' kopocaya'an ongko suti' baptisan inyo samo.

⁶ Ongkah ado siku' Allah, siku' Bopai somuo urakng inyo pocayo. Sio bokuaso di pucu' somuo hal, bokorojo molalu'i somuo hal, ongko ada'an dalapm somuo hal.

⁷ Apo Kristus moonji'i komampuan husus ko kito siku'-monyiku' sosuai agatn kohonda'-Nyo.

⁸ Nantai am sobabnyo ado pomandiran ni'in dalapm buku Suci, “Timpu Sio noi' ko tompat inyo tinggi, Sio mombaba' boko urakng inyo Sio kalahan watu boparakng. Sio pan moonji'i bomacapm hadiah ko boko urakng.”

⁹ Porotian cam dalapm ayat nantai ado kato, ‘Sio noi'’. Pasti nantai boroti sobolupmnyo Sio pan udah turutn ko tompat inyo palikng babah di bumi ni'in.

¹⁰ Jadi, Kristus inyo udah turutn ko dunia ni'in, Sio jam inyo udah noi' ko tompat inyo jouh lobih tinggi doi' somuo langit. Nantai tojadi oca' Sio ulih momonuhi somuo hal agatn koboradaan-Nyo.

¹¹ Sio nam inyo moonji'i komampuan husus ko boko urakng. Ado inyo dionji'i komampuan husus pakai' monjadi boko rasul. Ado inyo bukai dionji'i komampuan husus pakai' monjadi nabi. Ado inyo bukainyo agi' di onji'i komampuan husus pakai' momboritoan Kabar Boi'. Ado jam inyo dionji'i komampuan husus pakai' mombimbikng jomaat samo samaꞌan gombala. Ado jam inyo dionji'i komampuan husus pakai' mongajar.

¹² Kristus moonji'i boko komampuan nantai oca' sia' ulih mombulah somuo urakng bukai inyo pocayo monjadi mampu pakai' molayati Sio. Agatn sama'an nantai, soluruh jomaat botumbuh huatan monjadi kuat dalapm Kristus.

¹³ Kito somuo gola' molayati inyo bukai agatn ubo nian kito monjadi kuat bosatu obai kito somongkitn pocayo huatan somongkitn mongonal Ana' Allah. Kito pan botumbuh sampai monjadi sompurna sama'an Kristus. Kito monjadi kuat pocayo sama'an urakng dewasa

¹⁴ bukainyo sama'an boko bobia' agi' inyo mudah ditipu agatn somuo macapm ajaran inyo salah. Kito kinyo pocayo ko boko urakng licik nantai inyo honda' mombulah urakng monjadi sosat.

¹⁵ Apo kito pocayo agatn kuat ajaran inyo bondar huatan agatn hati inyo mongasihi urakng bukai. Agatn sama'an nantai, kito botumbuh monjadi samo sama'an Kristus, pomimpitn kito. Sio samo sama'an kopala'

¹⁶ doi' somuo anggota bukakng-tubuh inyo tosusutn rapi huatan bohubukan kuat agatn boko anggotanyo. Aman sotiap anggota bokorojo sosuai agatn komampuan husus inyo dionju'nyo, jadi Kristus mombulah soluruh bukakng-tubuh botumbuh dalapm kasih.

Hidup agatn caro boharu inyo monyonangan Tuhatn

¹⁷ Obai nantai aku momandiran ni'in, malahan aku monyiuh kaitn dalapm Tuhatn: Jangan agi' hidup sama'an boko urakng inyo kinyo mongonal Allah. Pikiran sia' sia-sia.

¹⁸ Sia' kinyo dapat mongoroti mongona'i Allah obai sia' tinggal di dalapm potakng, jouh doi' kohidupan inyo dionju' Allah. Obai, sia' kinyo mongonal Allah, huatan obai sia' korikng hati.

¹⁹ Sia' kinyo tohu malu. Agatn sama'an nantai, sia' hala monjumpati kohonda' bukakng-tubuh huatan bulah somuo macapm dosa bomporajoan sokohonda' hati sia'.

²⁰ Apo nantai bukainyo caro hidup inyo kaitn polajari watu kaitn dipadahi mongona'i Kristus.

²¹ Obai, timpu kaitn mondinga' mongona'i Sio, kaitn monorima' ajaran inyo bondar mongona'i Yesus.

²² Kaitn diajar pakai' moninggalan caro hidup kaitn inyo manah nantai, ia'an kohidupan kaitn inyo monjadi rusa' obai kaitn monjumpati boko kohonda' inyo monipu kaitn.

²³ Kaitn dipadahi pakai' borubah hati huatan pikiran kaitn

²⁴ oca' kaitn hidup agatn caro inyo boharu, ia'an kohidupan inyo dionju' Allah oca' kaitn mongkitn samo sama'an Sio. Masudnyo, kaitn bondar-bondar hidup bondar dihadapan-Nyo huatan hidup borosih doi' dosa.

²⁵ Obai nantai, jangan tumbukan. Kaitn gola' momadahan inyo bondar ko boko somadikan inyo bukainyo. Obai, kito sosamo anggota umant Allah.

²⁶ Aman kaitn godi, jangan sampai mombulah kaitn bodosa. Kaitn gola' botongga' godi sobolupm matoari tonggolapm.

²⁷ Jangan molongahan Rajo Sitatn pakai' mombulah kaitn bodosa.

²⁸ Urakng inyo komainyo pongolit jangan mongolit agi'. Apo io gola' bokorojo koras agatn jarinyo siku', mombulah boko hal inyo boi', oca' io ulih monulukng urakng bukai inyo ado kopontikannyo.

²⁹ Aman kaitn bopandir, jangan momakai boko pandir inyo jahat. Apo pakaicam boko pandir inyo boi' pakai' monguat'an hati urakng bukai sosuai agatn kopontikan sia'. Agatn sama'an nantai boko urakng inyo mondinga' pandir nantai bodapat koboi'an.

³⁰ Jangan mombulah Roh Allah salu'. Obai, Allah udah moonju' Roh-Nyo ko kaitn sobagai tando obai kaitn paca'an di solamat'an watu ahir joman.

³¹ Jangan agi' sakit hati, somu, godi. Jangan boporap damo mohayam urakng bukai. Jangan bulah somuo macapm kojahatan sama'an nantai.

³² Apo kaitn gola' boi' hati huatan monunju'an bolas-kasihan. Kaitn gola' moamputi urakng bukai samo sama'an Allah moamputi kaitn molalu'i Kristus.