Efesus 3 - Porjanjian Boharu Torjomahan Baso Dilakng Soari-ari

Hajat Allah pakai' boko urakng bukainyo urakng Yahudi

¹ Nantaiam sobabnyo aku, Paulus ditamoan ko dalapm ponjara obai molayati Kristus Yesus momboritoan Kabar Boi' ko kaitn boko urakng bukainyo urakng Yahudi. Obai aku molabuhan nantai, jadi aku

² Tontu am kaitn udah mondinga' mongona'i tugas nantai inyo Allah onju' ko aku. Obai kasih karunia-Nyo, Sio moutus ku pakai' molayati kaitn.

³ Sio momboritoan ko aku roncana-Nyo inyo komai kinyo dikotohu'i monsio. Di pucu' Aku udah monulis socaro panda' ko kaitn mongona'i hal nantai.

⁴ Aman kaitn mombaconyo, kaitn paca'an momahami mongona'i roncana-Nyo inyo dilabuhan-Nyo molalu'i Kristus samo sama'an aku momahaminyo.

⁵ Pado joman komai, Allah kinyo momandiran roncana-Nyo nantai ko monsio. Apo watu ni'in, Sio momakai Roh-Nyo pakai' momadahannyo ko boko rasul ongko boko nabi inyo Sio pilih husus pakai' molayati Sio.

⁶ Sama'an ni'in hajat Allah nantai: Sio mombulah caronyo oca' boko urakng bukainyo urakng Yahudi dapat borokat samo sama'an urakng Yahudi jam. Aman sia' pocayo kabar boi' mongona'i Kristus, sia' monjadi satu umant bosamo agatn urakng Yahudi inyo pocayo. Sia' samo-samo dapat monorima' somuo inyo dijanjian, Allah molalu'i Kristus Yesus.

⁷ Allah monunju'an kasih karunia-Nyo, ko aku agatn moutus aku momboritoan Kabar Boi' nantai. Kuaso-Nyo bokorojo dalapm diriku sampai aku ulih molayati Sio.

⁸ Di antaro soluruh umant Allah, aku inyo kotakng kinyo pontikng. Apo, Allah totap monunju'an kasih karunia-Nyo ko aku agatn caro ni'in. Sio moutus ku momboritoan ko boko urakng bukainyo urakng Yahudi mongona'i somuo borokat inyo Kristus onju'. Kito kinyo ulih mombayakan somuo borokat inyo kotakng luar biaso nantai.

⁹ Allah pan moutusku pakai' monyatoan ko somuo urakng mongona'i roncana-Nyo pakai' boko urakng bukainyo urakng Yahudi. Doi' awal-mulonyo, Allah inyo mombulah somuo hal bolupm momandirannyo ko monsio mongona'i roncana-Nyo nantai.

¹⁰ Apo, Allah moatur somuonyo sama'an nantai oca' watu ni'in somuo kuaso di langit ulih moniant obai Sio hala bohikmat dalapm somuo hal. Allah monunju'an nantai ko sia' molalu'i la'apo inyo Sio pulah pakai' somuo urakng inyo pocayo, urakng Yahudi ongko urakng bukainyo urakng Yahudi.

¹¹ Ia'an Allah mombulah kito monjadi satu umant di dalapm Kristus Yesus, Tuhatn inyo bokuaso di pucu' kito. Nantai am roncana-Nyo doi' mulonyo pakai' somanah-manahnyo.

¹² Obai kito pocayo ko Kristus, jadi di dalapm Sio, kito bebas datakng ko Allah. Kito kinyo paca'an gola'.

¹³ Obai nantai, aku momuhun oca' kaitn jangan putus asa biar pan aku ditamoan ko dalapm ponjara. Aku mondorita' sama'an nantai obai aku molayati kaitn. Apo somuo pondorita'an ku nantai pakai' koboi'an kaitn.

Paulus bodoa oca' sia' mongotohu'i obai Kristus kotakng mongasihi sia'

¹⁴ Obai nantai aku tundu' monyungkapan di hadapan Allah Bopai.

¹⁵ Sio ia'an Bopai sotiap koluarga di sorugo ongko di bumi. Obai, somuo kito ado ongkah obai Sio nam.

¹⁶ Sio ia'an sumber somuo hal huatan kotakng mulia. Aku bodoa oca' Sio monulukng kaitn sosuai agatn sipat-Nyo nantai ia'an oca' Sio mombulah hati ongko jiwa kaitn kuat agatn kuaso doi' Roh-Nyo.

¹⁷ Agatn sama'an nantai Kristus hala diapm dalapm hati kaitn obai kaitn pocayo ko Sio. Kasih-Nyo monjadi dasar kohidupan kaitn huatan mombulah kaitn mongkitn kuat.

¹⁸ Aku bodoa oca' kaitn bosamo somuo urakng inyo pocayo ulih mongoroti obai Kristus kotakng mongasihi kaitn. Kasih-Nyo kotakng luar, kotakng panjakng, kotakng tinggi, huatan kotakng dalapm.

¹⁹ Kasih-Nyo kotakng bosar sampai kinyo ado urakng inyo ulih momahami somuonyo. Apo aku totap bodoa oca' kaitn ulih mongonal kasih nantai. Agatn sama'an nantai, hati huatan pikiran kaitn paca'an monjadi mongkitn bisi agatn somuo hal inyo ado di dalapm diri Allah.

²⁰ Topujiam Allah! Sio sanggup molabuhan banya' hal, lobih banya' doi' inyo ulih kito minto damo bayakan. Obai, kuaso-Nyo bokorojo di dalapm diri kito.

²¹ Topujiam Sio obai Sio mulia! Kohonda'nyo Allah dipuji obai Kristus Yesus ongko di dalapm boko urakng inyo pocayo ko Sio. Kohonda'nyo Allah dipuji turutn-tomurutn sampai somanah-manahnyo. Amin!