Efesus 2 - Porjanjian Boharu Torjomahan Baso Dilakng Soari-ari

Allah moonji'i hidup boharu

¹ Komai, kaitn udah mati socaro rohani obai kaitn bodosa huatan molanggar boko porintah Allah.

² Watu nantai, caro hidup kaitn samo sama'an boko urakng di dunia ni'in inyo kinyo mongonal Allah. Kaitn tuyut Rajo Sitatn inyo bokuaso di langit di pucu' somuo kuaso jahat. Io ia'an roh inyo bokorojo dalapm hati boko urakng inyo kinyo monaati Allah.

³ Sobondarnyo, komai kito somuo hidup agatn caro inyo sama'an nantai am. Kito monjumpati boko kohonda' bukakng-tubuh kito. Kito hidup sosuai agatn pikiran huatan kohonda' kito siku'. Porangai kito ia'an porangai boko urakng inyo soharusnyo dihukupm Allah samo sama'an boko urakng bukai.

⁴ Apo Allah kotakng bobolas kasihan Sio kotakng mongasihi kito.

⁵ Biar pan komai kito udah mati socaro rohani obai dosa kito, Allah udah moonji'i kito kohidupan boharu bosamo-samo agatn Kristus. Kaitn disolamant'an ongkah obai Allah monunju'an kasih karunia-Nyo ko kaitn.

⁶ Samo sama'an Allah moangkat ongko moonji'i tompat tohormat di sorugo ko Kristus, Allah mombulah nantai jam pakai' kito obai kito di dalapm Kristus Yesus.

⁷ Nantai am caronyo Allah monunju'an kasih karunia-Nyo ko kito dalapm Kristus Yesus. Allah molabuhan nantai oca' pado masa-masa nononyo boko urakng ulih moniant obai Sio kotakng boi'.

⁸ Obai kaitn disolamant'an obai Allah monunju'an kasih karunia-Nyo ko kaitn huatan obai kaitn pocayo ko Kristus Yesus. Nantai bukainyo boko hal inyo kaitn usahaan, apo boko hal inyo Allah onju' ko kaitn.

⁹ Kito disolamant'an agatn caro nantai oca' co nyiant urakng inyo ulih momuji dirinyo siku' tontu-ubo io disolamant'an obai io bulah koboi'an.

¹⁰ Obai kito ni'in pulahan Allah huatan molalu'i Kristus, Allah mombulah kito oca' kito molabuhan boko hal inyo boi', ia'an boko pokoroja'an inyo udah Sio siap'an sobolupmnyo pakai' kito.

Allah mombulah somuo urakng inyo pocayo monjadi umat-Nyo

¹¹ Obai nantai, boko somadikan, ingant cam koadaan kaitn komai. Kaitn lahir sobagai boko urakng bukainyo urakng Yahudi. Urakng Yahudi mongatoan sia' umant Allah obai sia' disunant, boko hal inyo dikorojoan jari monsio aja'am. Sia' monyobut kaitn boko urakng inyo kinyo disunant inyokinyo tomansu' umant Allah.

¹² Watu nantai, kaitn bolupm mongonal Kristus. Kaitn ia'an urakng asikng, bukainyo warga banso Israel inyo dipilih Allah. Kaitn bukainyo urakng inyo bodapat la'apo pan inyo dijanjian Allah. Jadi, kaitn co nyiant harapan. Kaitn hidup di dunia ni'in kinyo mongonal Allah.

¹³ Apo watu ni'in kaitn kinyo sama'an nian agi' am obai kaitn di dalapm Kristus Yesus. Komai kaitn jouh doi' Allah apo watu ni'in kaitn monjadi dampikng obai darah Kristus.

¹⁴ Sio nam inyo mombulah kito bodamai. Komainyo urakng Yahudi bokonjahatan agatn urakng bukainyo Yahudi. Apo Kristus mombulah somuo kito inyo pocayo doi' duo pihak nantai monjadi satu umant. Umpamonyo Sio morobahan tembok inyo momisahan kito.

^15-16 Komainyo urakng Yahudi monaati somuo porintah huatan poraturan di Hukupm Torat oca' dosa sia' diamputi ongko sia' ulih bodamai agi' agatn Allah. Apo watu Kristus monjadi monsio huatan mati di kayu salib, Sio mombulah agatn caro nantai kinyo ulih di pakai' agi', obai Sio inyo monanggukng hukupan dosa somuo urakng. Agatn sama'an nantai, Sio mombulah oca' somuo urakng inyo pocayo doi' duo pihak nantai, urakng Yahudi ongko urakng bukainyo Yahudi, sia' ulih bodamai agi' agatn Allah. Kristus molabuhan somuo nantai oca' sia' monjadi satu umant inyo boharu di dalapm Sio. Boko urakng inyo pocayo doi' duo pihak nantai bodamai agatn inyo bukainyo. Sia' kinyo bokonjahatan agi' obai porbuatan Kristus di kayu salib.

¹⁷ Kristus udah datakng momboritoan obai boko urakng ulih bodamai agi' agatn Allah. Sio momboritoan nantai ko kaitn boko urakng bukainyo Yahudi inyo jouh doi' Allah ongko ko sia'boko urakng Yahudi inyo dampikng.

¹⁸ Kito doi' koduo pihak nantai ulih datakng ko Allah Bopai agatn caro inyo samo, ia'an molalu'i Kristus. Somuo kito dionji'i Roh Allah inyo samo inyo mombulah nantai tojadi.

¹⁹ Obai nantai, kaitn bukainyo urakng asikng agi'. Kaitn bukainyo urakng inyo jouh doi' Allah. Apo kaitn monjadi satu umant bosamo agatn boko urakng bukainyo inyo husus umputn Allah. Kaitn monjadi boko anggota koluarga Allah.

²⁰ Kaitn samo sama'an rumah inyo ditinjakan di pucu' pondasi batu, ia'an boko rasul ongko boko nabi, huatan Kristus Yesus nantai sobagai batu inyo kotakng pontikng.

²¹ Sio mombulah somuo bagian rumah nantai, ia'an kito inyo bobeda, huatan monjadi tosusutn rapi sampai rumah nantai monjadi mongkitn bosar. Rumah nantai monjadi Rumah Allah inyo husus pakai' Tuhatn.

²² Obai kaitn di dalapm Kristus, jadi kaitn pan monjadi bagian rumah nantai inyo ditinjakan monjadi kodiapan Allah, ia'an Roh-Nyo tinggal di dalapmnyo.