3 Yohanes 1 - Porjanjian Boharu Torjomahan Baso Dilakng Soari-ari

Salapm doi' Yohanes

¹ Surat ni'in doi'ku, inyo momimpitn jomaat. Ko inyo tohormat: Gayus inyo tokasih. Inyo ku kasihi obai kito sosamo pocayo agatn ajaran inyo bondar.

² Somadikanku inyo tokasih, aku bodoa mudah-mudahan somuonyo boi'-boi' agatn kolai. Mudah-mudahan kolai sehat-sehat jam, samo sama'an aku udah tohu obai kolai totap pocayo agatn kuat.

³ Obai, boboropo somadikan datakng lalu momadahan mongona'i kolai, ia'an nantai obai kolai hidup sosuai agatn ajaran inyo bondar. (Memang ubo nianam caro hidup kolai.) Timpu sia' momadahannyo, nantai aku kotakan sonang.

⁴ Conyiant ado hal bukai inyo bulah ku lobih sonang daripado mondinga' obai boko poana'anku hidup sosuai agatn ajaran inyo bondar.

Gayus monulukng urakng inyo momboritoan Kabar Boi'

⁵ Somadikanku inyo tokasih, kolai sotia ko Tuhatn agatn somuo potulukan inyo kolai onju' ko boko somadikan kito. Kolai monulukng sia' biar pan kolai co mongonal sia'.

⁶ Sia' udah momadahannyo di pohadapan jomaat di si'itn mongona'i kasih kolai. Watu ni'in aku muhun kolai pakai' hala monulukng sia' oca' sia' ulih monorusan pojalatan sia'. Labuhancam nantai agatn caro inyo monyonangan hati Allah.

⁷ Obai, sia' botula' momboritoan mongona'i Kristus ko boko urakng inyo bolupm pocayo, huatan sia' co minto lapopan doi' boko urakng nantai.

⁸ Jadi, kito gola' monulukng sia'. Agatn ubo nantaiam, kito ulih monjadi boko urakng inyo bokorojo samo agatn sia' pakai' monyebaran ajaran inyo bondar.

Diotrefes inyo jahat

⁹ Aku udah monulis surat ko jomaat di si'itan. Apo, Diotrefes inyo honda' monjadi pomimpitn, kinyo honda' monuruti pandir koi.

¹⁰ Obai nantaiam, watu ku datakng nononyo, aku paca'an mombungkar somuo porbuatan inyo io pulah ia'an nantai io mongatoan inyo jahat ongko bulah kotumbukan mongona'i koi. Apo, porbuatan jahat nantai bolupm cukup pakai' io. Timpu boko somadikan datakng, io kinyo honda' monorima' sia'. Malahan, io morarakng boko urakng inyo honda' monulukng sia'. Aman ado boko urakng inyo honda' monulukng sia', io monundukng oca' boko urakng nantai koluar doi' jomaat.

¹¹ Somadikanku inyo tokasih, jangannam monumpakng boko hal inyo jahat. Tumpakngcam inyo boi'. Urakng inyo bulah koboi'an, io boasal doi' Allah. Apo urakng inyo bulah kojahatan, io co kalo mongonal Allah.

Demetrius inyo boi'

¹² Mongona'i Demetrius boko urakng mongatoan io nantai urakng boi'. Kohidupan io sikuꞌ inyo monunju'an nantai obai io hidup sosuai agatn ajaran inyo bondar. Koi pan mongatoan io urakng inyo boi'. Ongko kolai tohu obai koi hala momandiran inyo bondar.

Yohanes moahiri suratnyo

¹³ Ija' banya' hal inyo pontikng ku padahan ko kaitn. Apo cuku honda' momakai surat.

¹⁴ Aku boharap co manah agi' aku ulih monjongu' kolai lalu kito ulih bopandir bohadapan.

¹⁵ Mudah-mudahan Tuhatn moonji'i sonang-asau ko kolai! Boko pokawalan koi mongiripm salapm ko kolai. Sampaianba salapm doi' ku ko boko kawal di su'utan siku'-monyiku'.