2 Yohanes 1 - Porjanjian Boharu Torjomahan Baso Dilakng Soari-ari

Salapm doi' Yohanes

¹ Surat ni'in doi' ku, inyo momimpitn kaitn. Ko inyo tohormat: Indai inyo udah dipilih Allah huatan poana'an kolai. Aku bondar-bondar mongasihi kaitn. Bukainyo bayo aku, apo kaitn pan dikasihi jam ulih somuo urakng inyo pocayo agatn ajaran inyo bondar.

² Obai kito sosamo pocayo agatn ajaran inyo bondar ongko kito paca'an pocayo somanah-manahnyo.

³ Allah Bopai ongko Ana'-Nyo, Yesus Kristus paca'an monunju'an koboi'an-Nyo, monunju'an kasih sayang-Nyo, ongko moonji'i sonang-asau ko kito inyo hidup dalapm kobondaran ongko hala mongasihi.

Kito gola' hidup sosuai agatn ajaran inyo bondar huatan hala mongasihi

⁴ Aku kotakan sonang mondinga' obai sobagi'an doi' poana'an kolai monuruti porintah inyo Allah Bopai onju' ko kito, ia'an pakai' hidup sosuai agatn ajaran inyo bondar.

⁵ Watu ni'in, aku minto ko Indai oca' kito hala mongasihi. Porintah nantai bukainyo porintah boharu inyo hoyu' ku tulis ko kaitn. Porintah nantai ia'an porintah inyo udah ado doi' mulonyo.

⁶ Ninam rotinyo mongasihi agatn sobondarnyo, ia'an nantai kito gola' monuruti boko porintah Allah. Ongko ninam porintah inyo udah kaitn dinga' doi' somulo, ia'an nantai kaitn gola' hidup hala mongasihi.

⁷ Aku momadahan somuonyo nantai obai, di mono-mono di dunia ni'in udah ado banya' boko urakng inyo moajaran boko hal inyo salah. Sia' co pocayo obai Yesus Kristus udah datakam ko dunia ni'in monjadi monsio. Urakng ubo nantaiam musuh Kristus inyo hala monyosat'an monsio.

⁸ Obai nantai, jagocam diri kaitn oca' kaitn co sosat. Koi udah bokorojo molayati oca' kaitn pocayo agatn ajaran inyo bondar. Jangan sampai kaitn kohilakan hasil pokoroja'an koi nantai. Bousahacam oca' kaitn totap monorima' upah kaitn doi' Allah.

⁹ Urakng inyo monuruti ajaran inyo salah doi' ajaran Kristus nantai, boroti Allah conyiant di dalapm hatinyo. Apo urakng inyo hidupnyo monuruti ajaran Kristus, boroti Allah Bopai ongko Ana'-Nyo ado dalapm hatinyo

¹⁰ Jadi, aman ado urakng inyo datakng momboritoan ajaran inyo bukai doi' ajaran Kristus, jangan kaitn korumahan. Malahan, jangan disalapi.

¹¹ Obai, urakng inyo monyalapi urakng ubo nian, boroti io monulukng urakng nantai dalapm porbuatannyo inyo jahat.

Pomandiran ponutup Yohanes dalapm suratnyo

¹² Ija' banya' hal inyo honda' ku padahan ko kaitn. Apo aku cuku honda' momakai surat. Aku boharap ulih mondataki kaitn lalu ulih bopandir bohadapan. Aku honda' sama'an nantai oca' kito samo mooso'i sonang-nyamanam soponuhnyo.

¹³ Salapm ko kolai doi' poana'an somadikan botina' kolai inyo dipilih Allah jam.