2 Timotius 4 - Porjanjian Boharu Torjomahan Baso Dilakng Soari-ari

Totap molayati Tuhatn agatn boi'

¹ Dinga'anbo! Kristus Yesus momorintah dalapm Koraja'an Allah somanah-manahnyo. Sio paca'an datakng bobali' agi' ko dunia ni'in. Watu nantai, Sio paca'an mohakipi somuo urakng, boi' urakng inyo ija' hidup honda' pan urakng inyo udah mati. Obai nantai dihadapan Kristus Yesus huatan Allah moonji'i boko potunju' ni'in ko kolai:

² Boritoancam pomandiran Allah! Boritoancam agatn torus-monorus sotiap watu. Tulukngcam boko urakng oca' mongomboi'i caro hidupnyo. Olikancam urakng inyo bulah kosalahan. Padahicam huatan onji'i somangant ko boko urakng oca' hala bulah koboi'an. Labuhancam somuo nantai agatn sabar. Labuhancam somuonyo nantai kapikng mongajar Pomandiran Allah.

³ Obai paca'an datakng watunyo, boko urakng kinyo honda' monorima' ajaran inyo bondar. Sia' bayo monuruti kohonda' sia' siku' mo. Jadi, sia' paca'an mongumpulan boko guru inyo moajaran boko hal inyo nyamanam sia' dinga'.

⁴ Sia' kinyo honda' mondinga'an ajaran inyo bondar. Apo, sia' honda' pocayo boko sangan inyo dipulah-pulah.

⁵ Apo kolai gola' hala bopikir agatn jolas dalapm somuo hal. Botahatncam mohadapi ajab sonsaro. Boritoancam Kabar Boi' ko boko urakng inyo bolupm kalo mondinga'nyo. Labuhancam somuo tugas dalapm polayatan kolai.

⁶ Aku moonji'i boko potunju' nantai ko kolai obai kinyo manah agi' aku paca'an mati. Ni'in, aku siap monyorahan hidupku samo sama'an urakng monyorahan kurbatn posombahan ko Allah.

⁷ Aku udah bouyuh-jorih agatn boi', aku udah moahiri potandikan huatan aku totap sotia sampai ahir.

⁸ Tuhatn udah monyiap'an hadiah inyo bondar ko aku. Sio nantai Hakipm inyo paca'an mohakipi somuo urakng agatn adil. Watu nantai, Sio paca'an moonji'i hadiah nantai pakai' aku huatan somuo urakng inyo rindu Sio datakng bobali' agi' ko dunia ni'in.

Posatn pontal husus pakai' Timotius

⁹ Bousahacam datakng ko aku, aman ulih socopatnyo

¹⁰ obai Kreskes udah botula' ko propinsi Galatia. Titus botula' ko propinsi Dalmatia. Demas pan botula' ko kota Tesalonika. Apo Demas moninggalan aku obai io kotakng kidah agatn boko kosonangan di dunia ni'in.

¹¹ Ni'in pan bayo Lukas inyo ija' bosamo agatn aku. Watu kolai datakng, pocaki Markus oca' io tuyut bosamo kolai. Aku honda' io datakng jam obai io monjadi urakng inyo monulukng dalapm polayatan.

¹² Tikhikus pan udah aku utusam ko kota Efesus.

¹³ Dalapm pojalatan ko si'itn, timpu kolai molalu'i kota Troas, kuti'cam baju tobal inyo aku tinggalan ko Karpus di santai. Baba' jam somuo bukuku, hususnyo boko buku inyo pontikng.

¹⁴ Ado tukakng tompo inyo bodamo Aleksander. Io udah molabuhan banya' hal inyo jahat pakai' molawatn polayatanku. Obai nantai, Tuhatn paca'an mohukupm io.

¹⁵ Apo kolai pan gola' boboi' agatn io nantai, obai io kotakng molawatn ajaran kito.

¹⁶ Potamo kali aku mombela diri di pongadilan, co nyiant siku' urakng pan inyo monulukng aku. Somuonyo udah moninggalanku. Aku bodoa oca' Tuhatn moamputi sia' nantai.

¹⁷ Apo, watu nantai, Tuhatn monyoroto'iku. Sio moonji'i kokuatan ko aku. Obai nantai, aku ulih momboritoan Kabar Boi' ko urakng inyo bukainyo urakng Yahudi. Watu nantai, aku co dihukupm mati samo sama'an lopas doi' tontorokapan bonatakng buas.

¹⁸ Tuhatn paca'an monyolamant'an aku doi' somuo usaha urakng jahat. Sio paca'an mombaba'ku agatn solamant ko dalapm Korajaan-Nyo di sorugo. Huncapm kito momuji Sio somanah-manahnyo. Amin!

¹⁹ Sampaiancam salapm ko Priska ongko Akwila. Sampaian jam salapm ko somuo urakng inyo tinggal dalapm rumah Onesiforus.

²⁰ Erastus ija' ado di kota Korintus. Trofimus tongahan sakit, watu aku moninggalan io di kota Miletus.

²¹ Bousahacam datakng sobolupm musipm bonakau. Ebulus, Pudes, Linus, Klaudia, huatan somuo urakng pocayo bukai mongiripm salapm ko kolai.

²² Aku bodoa oca' Tuhatn monyoroto'i kolai, Timotius. Aku bodoa oca' Tuhatn monunju'an koboi'an-Nyo ko somuo kaitn.