2 Timotius 3 - Porjanjian Boharu Torjomahan Baso Dilakng Soari-ari

Kojahatan monsio pado ari-ari toahir

¹ Dinga'an bo pomandiranku ni'in, Timotius. Ari-ari toahir paca'an tojadi boko bomacapm inyo monyonsaroan.

² Boko urakng paca'an mondoholuan kohonda' diri sia' siku'. Sia' paca'an kaha'-kolobu' agatn duit. Sia' paca'an buhau, hala moninggian diri, hala mohayam urakng bukai, hala co monaati urakng tuho sia'. Sia' co tohu botorima' kasih, co honda' hidup mohormati Allah.

³ Sia' co tohu mongasihi huatan moamputi urakng bukai. Sia' hala bojahat urakng bukai. Sia' co ulih mongondalian diri sia'. Sia' hala mondorako'i urakng bukai, bonci' agatn somuo hal inyo boi'.

⁴ Ari-ari toahir ni'in, boko urakng paca'an hala monyorahan kawal sia' ko musuh. Sia' co paca'an bopikir panjakng. Sia' paca'an hala buhau. Sia' paca'an hala monyonangan diri sia' daripado monyonangan Allah.

⁵ Kotiat'annyo sia' hidup sosuai agatn kohonda' Allah. Apo sobondarnyo, sia' co honda' tundu' agatn kuaso Allah dalapm hidup sia'. Padohan mondinga'an boko urakng sama'an nantai.

⁶ Ado di antaro sia', inyo bokokolit mansu' ko dalapm boko rumah. Lalu sia' mongkongkanti'i boko botina' inyo mudah digolaga'i huatan banya' dosa ongko dikuaso'i bomacapm kohonda'.

⁷ Boko botina' nantai bolajar boko ajaran boharu. Apo sia' co kalo mampu monorima' ajaran inyo bondar.

⁸ Boko urakng nantai bisi pikiran inyo jahat huatan udah co pocayo agi'. Sia' molawatn ajaran inyo bondar, samo sama'an Yanes ongko Yambres molawatn Musa.

⁹ Apo, samo sama'an inyo tojadi ko Yanes huatan Yambres, boko urakng nantai kinyo ulih molabuhan la'apo pan, obai kobuduan sia' udah dikotohu'i boko urakng banya'.

Hala mongajar ajaran inyo bondar

¹⁰ Apo kolai udah mongotohu'i ajaranku. Kolai udah moniru caro hidupku. Kolai udah pocayo ko Yesus samo sama'an aku. Kolai udah moikuti tujuan hidupku. Kolai udah moniant aku sabar agatn urakng bukai huatan mongasihi sia'. Kolai udah mongotohu'i obai aku totap kuat

¹¹ watu aku mohadapi ajab sonsaro huatan watu urakng mondorako'iku. Kolai moingant agatn jolas la'apo inyo tojadi di kota Antiokhia, Ikonium, ongko Listra. Di su'utn, aku didorako'i agatn bomacapm caro. Apo Tuhatn monyolamant'an aku doi' somuonyo nantai!

¹² Memang boko urakng inyo bondar-bondar honda' hidup monyonangan Allah, ia'an somuo urakng inyo pocayo ko Kristus Yesus, sia' paca'an didorako'i.

¹³ Sodakan boko urakng jahat huatan boko urakng inyo hala tumbukan, sia' paca'an mongkitn jahat. Sia' monyosat'an urakng bukai. Urakng bukai pan monyosat'an sia'.

¹⁴ Apo kolai gola' totap pocayo ko ajaran inyo udah kolai polajari. Kolai udah monjadi yakitn obai nantai ajaran inyo bondar. Kolai udah konal agatn koi inyo mongajar kolai. Kolai tohu obai koi ulih dipocayoan jadi, hala pocayo ajaran inyo bondar nantai.

¹⁵ Kolai gola' hala pocayo nantai jam obai, tangga'i kolai ija' kocit, kolai bolajar Buku Suci. Buku Suci mampu bulah kolai mongoroti mongona'i kosolamant'an molalu'i kopocaya'an ko Kristus Yesus.

¹⁶ Soluruh Buku Suci ado obai bimbikan Allah. Obai nantai, somuo inyo ditulis di santai sangant boguno. Buku Suci boguno pakai' mongajar boko hal inyo bondar, pakai' moolikan urakng doi' kosalahan, pakai' mongomboi'i caro hidupnyo huatan pakai' monunju'an caro hidup inyo bondar dihadapan Allah.

¹⁷ Jadi, Buku Suci boguno pakai' bulah boko urakng inyo molayati Allah mampu molabuhan sotiap pokoroja'an inyo boi'.