2 Timotius 2 - Porjanjian Boharu Torjomahan Baso Dilakng Soari-ari

Totap molayati biar pan mohadapi ajab sonsaro

¹ Timotius, ana'ku, gunoan cam kokuatan doi' Kristus Yesus pakai' kolai lobih kuat pocayo ko Sio.

² Kolai udah mondinga' aku mongajar di hadapan urakng banya'. Jadi, ajarancam ajaran nantai ko boko urakng inyo ulih dipocayo huatan pandai mongajar urakng bukai.

³ Kolai gola' sama'an sikuꞌ urakng projurit inyo boi' pakai' Yesus Kristus agatn tuyut ajab sonsaro samoan agatn Sio.

⁴ Siku' urakng projurit inyo tongahan botugas, io kinyo momikiran pokoroja'an bukai. Aman molabuhan nantai, io monyonangan hati kopala' pasukannyo.

⁵ Ado contoh bukai. Siku' urakng inyo jumpat dalapm potandikan gola' monuruti boko poraturan potandikan. Aman cado, io kinyo monang.

⁶ Ado contoh inyo bukai agi'. Aman siku' urakng potani bokorojo koras, io paca'an monjadi urakng inyo potamo mooso'i hasil doi' pokoroja'annyo.

⁷ Pikirancam boko contoh nantai! Obai, Tuhatn paca'an monulukng oca' kolai mongoroti lobih dalapm mongona'i somuonyo nantai.

⁸ Kabar Boi' inyo aku boritoan ia'an mongona'i Yesus Kristus, koturutan Rajo Daud. Sionam Kristus inyo udah bobali' hidup doi' komatian.

⁹ Obai aku momboritoan Kabar Boi' nantai, aku ajab sonsaro, malahan aku ditahatn agatn rantai dalapm ponjara ubonyo aku sama'an ponjahat. Apo pomboritoan pomandiran Allah kinyo totongga'an.

¹⁰ Jadi, aku botahatn mohadapi somuo macapm ajab sonsaro oca' boko urakng inyo dipilih Allah dapat kosolamant'an molalu'i Kristus Yesus huatan hidup tohormat somanah-manahnyo.

^11-13 “Aman kito mati bosamo Yesus, kito pan paca'an hidup bosamo Sio. Aman kito botahatn mohadapi ajab sonsaro, kito pan paca'an momorintah bosamo agatn Sio sama'an boko rajo. Apo aman kito momandiran obai kito co konal agatn Sio, Sio paca'an momandiran obai Sio co konal agatn kito. Biar pan kito co sotia ko Sio, Sio pagutn sotia ko kito, Obai Sio co dapat molawatn diri-Nyo siku'.” Bondaram pomandiran ni'in.

Poringant'an mongona'i boko ajaran inyo kinyo bondar

¹⁴ Kolai gola' torus moingant'an jomaat mongona'i boko hal nantai. Nosihat'icam sia' agatn togas, Allah moniant porbuatan kito. Jadi, padohan botikakng mongona'i boko sotilah. Co nyiant gunonyo. Malah, pomandiran sama'an nantai monyosat'an boko urakng inyo mondinga'an nantai.

¹⁵ Bousahacam oca' Allah moanggap kolai siku' urakng inyo rajitn bokorojo. Jadicam siku' urakng pogai inyo kinyo gola' malu obai somuo pokoroja'annyo boi'. Ajarancam agatn topat ajaran inyo bondar.

¹⁶ Jangan bondinga'an boko urakng inyo bopandir mongona'i boko hal inyo co boonsu'an huatan boko hal inyo co mohormati Allah. Obai ajaran sia' bayo bulah boko urakng mongkitn lobih jahat.

¹⁷ Ajaran sia' inyo salah nantai monyebar samo sama'an ponyakit kulit inyo bogola'i. Duo urakng inyo mongajar ajaran inyo salah sama'an nantai ia'an Himeneus huatan Filetus.

¹⁸ Sia' duo nantai kinyo pocayo agi' agatn ajaran inyo bondar. Sia' duo mongajar obai Allah udah bulah boko urakng hidup agi' doi' komatian watu ni'in. Obai ajaran nantai, ongko sia' bulah boboropo urakng inyo pocayo co pocayo agi' ko Yesus huatan ajaran inyo bondar.

¹⁹ Apo Allah bulah pondasi inyo kuat, inyo kinyo toguyakng. Di pucu' pondasi nantai totulis, “Tuhatn mongonal boko urakng inyo bondar-bondar umputn Sio,” huatan “Urakng inyo bopandir aman io nantai umputn Allah, urakng nantai gola' botongga' molabuhan inyo jahat.”

²⁰ Di dalapm rumah inyo bosar ado bomacapm pokakas. Ado inyo dipulah doi' omas ongko pira'. Ado jam boko inyo dipulah doi' kayu ongko tanah liat. Boko pokakas nantai ado inyo digunoan pakai' pogota'an inyo pontikng, ado jam inyo digunoan pakai' pogota'an inyo kinyo gaho pontikng.

²¹ Boko urakng inyo monyongkayoan diri doi' boko hal inyo kinyo gaho pontikng nantai samo sama'an boko pokakas inyo digunoan pakai' pogota'an inyo pontikng. Io disongkayoan pakai' pogota'an inyo husus. Io cucu' dipakai Tuhatn huatan siap dipakai pakai' pokoroja'an la'apo pan inyo boi'.

²² Timotius, padohan sonjumpat'an kolaku'an urakng muda' inyo jahat. Apo bousahacam oca' kolai bulah inyo bondar di hadapan Allah. Totap sotia ko Allah huatan kasihicam urakng bukai. Bousahacam oca' hidup damai agatn urakng bukai. Labuhancam somuo nantai bosamo agatn boko urakng inyo monyombah Tuhatn agatn hati inyo somombondarannyo.

²³ Jangan mondinga'an boko urakng inyo botikakng mongona'i boko hal inyo budu huatan kinyo boonsu'an. Somuo nantai bayo bulah urakng boporap.

²⁴ Urakng inyo molayati Tuhatn co ulih bokolohi. Io gola' ramah ko somuo urakng. Io gola' corodi' mongajar. Io pan gola' hala sabar.

²⁵ Io gola' onsi' mongajar boko urakng inyo gala' molawatn. Sopo tohu Allah moonji'i kosompatan ko boko urakng inyo gala' molawatn nantai pakai' botongga' bulah dosa huatan tohu mongonal ajaran inyo bondar.

²⁶ Agatn ubo nian, boko urakng monjadi sadar huatan lopas doi' joyat Rajo Sitatn. Joyat nantai inyo udah mongujut sia' somanah ni'innam, sampai sia' jumpat kohonda' Rajo Sitatn.