2 Tesalonika 3 - Porjanjian Boharu Torjomahan Baso Dilakng Soari-ari

Paulus minto didoaan

¹ Solanjutnyo, boko somadikan tulukng doa'an koi oca' pomandiran Tuhatn tosebar agatn copat ko tompat bukai. Bodoa jam oca' boko urakng mohormati, pocayo ongko monaati boko ajaran nantai, samo sama'an kaitn.

² Apo kinyo somuo urakng paca'an pocayo ko Yesus. Obai nantaiam, bodoa oca' koi dilinduki doi' boko urakng inyo jahat huatan inyo honda' mondorako'i koi.

³ Apo Tuhatn Yesus hala sotia. Sio paca'an monguat'an hati kaitn. Sio paca'an molinduki kaitn doi' Rajo Sitatn.

⁴ Koi yakitn Tuhatn paca'an monulukng kaitn. Koi yakitn kaitn tongahan molabuhan somuo inyo koi ajaran ko kaitn. Kaitn paca'an torus molabuhan nantai jam.

⁵ Koi bodoa oca' Tuhatn Yesus monulukng kaitn pakai' torus mongotohu'i obai Allah mongasihi kaitn. Koi pan bodoa oca' kaitn ulih kuat watu kaitn didorako'i samo sama'an Kristus kuat watu Sio didorako'i.

Somuo urakng pocayo gola' bokorojo

⁶ Boko somadikan, koi mondinga' ado urakng pocayo inyo losa' bokorojo. Sia' co honda' hidup sosuai agatn ajaran inyo koi sampaian ko kaitn. Obai koi ado hak doi' Tuhatn Yesus Kristus, koi monyiuh kaitn: Jangan bokawal agatn boko urakng inyo hidup sama'an nantai.

⁷ Kaitn siku' udah tohu obai kaitn gola' monumpakng caro hidup koi. Watu koi bosamo agatn kaitn, koi co pocalan.

⁸ Koi co kalo makatn co bobayar. Koi uyuh jorih bokorojo siakng malapm pakai' momonuhi kopontikan koi siku'. Jadi, koi co kalo mouyuhi kaitn.

⁹ Sobondarnyo, koi ado hak pakai' monuntut la'apo inyo koi pontikan ko kaitn. Apo koi co molabuhan hal nantai. Koi bokorojo somombondarannyo oca' kaitn ulih monumpakng caro hidup nantai.

¹⁰ Watu koi ija' bosamo agatn kaitn pan, koi moonji'i poringant'an, “Aman ado urakng inyo kinyo honda' bogota'-bokorojo, padohan dionji'i pomakatn am.”

¹¹ Koi mongatoan somuo ni'in obai koi mondinga' ado urakng pocayo inyo pocalan. Sia' co honda' bogota'-bokorojo. Sia' bayo sibuk sonjumpat'an urusan urakng bukai.

¹² Obai koi ado hak doi' Tuhatn Yesus Kristus, koi monyiuh huatan moonji'i poringant'an ni'in ko sia': Hidupcam agatn caro inyo boi'. Bokorojocam pakai' momonuhi kopontikan hidup siku'.

¹³ Boko somadikan somuo, koi bopandir: Jangan hora' molabuhan boko porbuatan inyo boi'.

¹⁴ Aman ado urakng inyo kinyo mongikuti boko ajaran koi dalapm surat ni'in, pontiat'ancam sopo io. Jangan bokawal agatn io oca' io monjadi malu obai kosalahannyo nantai.

¹⁵ Apo jangan jam moanggap io sobagai musuh apo totap olikan ja'am io sobagai somadikan.

Paulus moahiri suratnyo

¹⁶ Ni'inan koi bodoa ko Tuhatn Yesus inyo moonji'i kito sonang-asau. Koi bodoa oca' dalapm somuo hal Sio hala moonji'i kaitn sonang-asau. Koi bodoa oca' Sio pan hala monyoroto'i kaitn somuo.

¹⁷ Salapm doi' aku, Paulus. Aku monulis salapm ni'in agatn jariku siku'. Aku momakai caro ni'in dalapm sotiap suratku oca' kaitn tohu surat ni'in ia'an tulisanku.

¹⁸ Aku bodoa oca' Yesus Kristus, Tuhatn kito, hala monunju'an koboi'an-Nyo ko kaitn somuo.