2 Tesalonika 2 - Porjanjian Boharu Torjomahan Baso Dilakng Soari-ari

Rajo inyo molawatn Allah sobolupm Yesus datakng agi' ko dunia

¹ Ni'in koi honda' monulis mongona'i watu kodatakan Yesus Kristus, Tuhatn kito huatan mongona'i Sio paca'an mongumpulan kito bosamo agatn Sio. Boko somadikan, koi momuhun

² oca' kaitn co bingung huatan tokonyant aman kaitn mondinga' borito obai Tuhatn udah datakng. Mungkitn ado urakng inyo mongatoan borito nantai doi' Allah damo mungkitn borito nantai doi' pomandiran damo doi' surat. Apotolagi' mungkitn borito nantai doi' koi.

³ Jangan kaitn pocayo huatan sampai disosatan ulih sopo pan agatn caro la'apo pan. Obai, sobolupm Yesus datakng, paca'an ado watunyo di mono banya' urakng monula' Allah. Ongko, Siku' urakng Rajo inyo jahat paca'an datakng. Yesus paca'an mombonasoan io.

⁴ Apo sobolupm io dibonasoan, io paca'an molawatn somuo hal inyo monsio anggap sobagai allah huatan somuo hal inyo disombah monsio. Io paca'an momandiran obai io lobih bokuaso doi' somuo allah nantai. Malahan, io paca'an mansu' ko dalapm Rumah Allah. Io paca'an dudu' di santai ongko moaku'i obai io nantai Allah.

⁵ Kaitn soharusnyo ingant obai watu aku bosamo agatn kaitn, aku udah opat momandiran ko kaitn mongona'i boko kojadian nantai.

⁶ Kaitn udah tohu kuaso inyo tongahan monahan Siku' Urakng Rajo inyo kotakng jahat nantai. Io ditahatn oca' io bayo datakng pado watu inyo ditontuan Allah.

⁷ Io paca'an totap ditahatn, apo socaro bototapu' kuaso inyo molawatn Allah udah mula'i bokorojo di dunia ni'in. Nono inyo monahan Rajo kotakng jahat nantai paca'an di buakan.

⁸ Hoyu' pado watu nantai Rajo inyo kotakng jahat nantai paca'an datakng. Apo, nono somuo kuasonyo paca'an dikalahan Yesus, Tuhatn di pucu' somuo hal. Yesus paca'an datakng agatn kuaso-Nyo. Yesus paca'an mombunuhnyo agatn pomandiran-Nyo mo.

⁹ Apo sobolupm Yesus bobali', Rajo inyo kotakng jahat nantai paca'an datakng agatn kuaso Rajo Sitatn. Io paca'an molabuhan somuo macapm mujisat inyo palsu huatan boko tando inyo palsu.

¹⁰ Io momakai somuo macapm caro inyo jahat pakai' monyosat'an boko urakng huatan paca'an bohasil mongontumbuki sia' inyo paca'an bonaso. Sia' kinyo paca'an disolamant'an obai sia' co honda' pocayo Kabar Boi' inyo bondar mongona'i Yesus.

¹¹ Obai nantai am, Allah paca'an bulah hati sia' mudah disosatan sampai sia' pocayo ko pomandiran tumbukan nantai.

¹² Allah molabuhan nantai oca' somuo urakng kinyo pocayo Kabar Boi' inyo bondar huatan somuo urakng inyo sonang agatn boko hal inyo jahat dihukupm.

Kaitn gola' totap bondar-bondar pocayo

^13-14 Apo, boko somadikan, Tuhatn mongasihi kaitn. Koi bosukur ko Allah obai kaitn. Cucu' koi bosukur obai Allah momilih kaitn. Doi' mulonyo, Allah momilih kaitn oca' kaitn disolamant'an. Koi momboritoan Kabar Boi' inyo bondar ko kaitn. Ongko kaitn pocayo borito nantai. Roh Allah jam hala bulah kaitn mongkitn suci. Nianam caro kaitn ditingkau ongko disolamant'an oca' kaitn bodapat bagian doi' kohormatan Yesus Kristus, Tuhatn kito.

¹⁵ Obai nantai am, boko somadikan, totap pocayo agatn kuat ajaran inyo udah koi sampaian boi' molalu'i pomandiran damo pan molalu'i boko surat.

¹⁶ Allah Bopai huatan Yesus Kristus, Tuhatn kito, mongasihi kito. Sio monguat'an hati kito somanah-manahnyo. Sio jam bulah kito kotakng yakitn obai Sio paca'an momonuhi somuo janji inyo boi' pakai' kito. Koi bodoa oca' Allah Bopai huatan Yesus Kristus, Tuhatn kito

¹⁷ monguat'an hati kaitn oca' kaitn hala molabuhan huatan momandiran boko hal inyo boi'.