2 Tesalonika 1 - Porjanjian Boharu Torjomahan Baso Dilakng Soari-ari

Salapm doi' Paulus

¹ Ko inyo tohormat boko urakng inyo pocayo di kota Tesalonika. Kaitn inyo pocayo ko Allah Bopai kito huatan Yesus Kristus, Tuhatn kito. Salapm doi' aku, Paulus. Doi' Silas huatan Timotius jam.

² Kasih karunia ongko sonang-asau doi' Allah, Bopai kito, huatan doi' Tuhatn Yesus Kristus monyoroto'i kolai.

Paulus bosukur pakai' jomaat di Tesalonika

³ Boko somadikan, koi bosukur ko Allah obai kaitn. Cucu' mo koi bosukur obai kaitn mongkitn kuat pocayo ko Yesus. Somuo kaitn pan mongkitn mongasihi siku'-monyiku'.

⁴ Obai nantai, koi bangga mongisahan mongona'i kaitn ko boko jomaat inyo bukai. Koi mongisahan obai kaitn didorako'i huatan moalapi banya' kosusahan obai kaitn pocayo ko Yesus. Apo kaitn totap botahatn huatan pocayo.

⁵ Nantaiam butinyo obai Allah moadili monsio agatn adil. Kaitn dianggap cucu' monjadi warga Koraja'an Allah. Nianam alasan kaitn ajab sonsaro obai kaitn hidup di Koraja'an Allah nantai.

⁶ Memang bondar Allah hala moadili monsio agatn adil. Sio paca'an mohukupm sia' inyo mondorako'i kaitn.

⁷ Sio pan paca'an mongkongkanti'i kaitn inyo didorako'i. Ubo nian jam agatn koi. Hal nantai paca'an tojadi pado watu Yesus datakng agi' doi' sorugo. Allah paca'an monyatoan Yesus nantai Tuhatn di pucu' somuo hal. Yesus paca'an datakng bosamo boko molekat-Nyo inyo bokuaso. Api inyo bonyalo bosar paca'an mongoliliki Sio.

⁸ Sio paca'an mohukupm sia' inyo co honda' mongonal Allah, sia' co honda' pocayo Kabar Boi' mongona'i Yesus, Tuhatn kito.

⁹ Yesus paca'an mohukupm bonaso sia'. Ongko, sia' mooso'i hukupan nantai somanah-manahnyo. Sia' paca'an dibuakan ko tompat jouh doi' hadapan Tuhatn. Huatan sia' co kalo paca'an mooso'i komulia'an Yesus inyo bokuaso nantai.

¹⁰ Hukupan nantai paca'an tojadi timpu Yesus datakng agi'. Watu Sio datakng agi' somuo urakng inyo pocayo ko Sio momuji huatan hiratn agatn Sio. Sio paca'an dipuji obai Sio bulah sia' monjadi borosih doi' dosa. Kaitn tomansu' kolompok urakng nantai obai kaitn udah pocayo somuo inyo koi sampaian ko kaitn.

¹¹ Obai Allah mombalas somuo urakng agatn adil, koi hala mondoa'an kaitn. Koi bodoa oca' Allah moanggap kaitn cucu' pakai' ditingkau-Nyo. Koi pan bodoa oca' kuaso Allah monulukng kaitn pakai' molabuhan somuo inyo kaitn labuhan. Koi pan bodoa oca' Allah moonji'i kokuatan pakai' molabuhan somuo inyo kaitn labuhan obai pocayo ko Yesus.

¹² Obai nantaiam, damo Yesus, Tuhatn kito dimuliaan obai kaitn. Ubo nian jam, kaitn dimuliaan obai koboi'an Allah huatan Tuhatn kito Yesus Kristus.